MIKÂ 2 - Mara Bible RV (BSI)

Tlybaituhpazy hupona

¹ Hmo pha leipa patuapaluapa ta, Ama rakhô liata moleina a pachâpadypazy cha, Ama hu a po na! Ama ku liata a ypa biehneina a châpa vâta, My khih a vaw dei nahta ama hriapazi tyh.

² Lyuzy uahvapa ta chhu ei ta, Ozy chhao uahvapa ta amâ la tyh; Chyhsa o chhu ei ta, Chyhsa ryu ama chhu tyh.

³ Chavâta Abeipa ta hetana heta a tah: Pachâ teh u, he pho châna heta chhiena pachhuahpanoh na ta, Cha tawhna chata a pachha thei aw veih ei chi. Chhiena daihti a châ awpa vâta, Akhotlâh kawpa ta a hlaihlâ thei khao aw veih ei chi.

⁴ Cha noh liata cha, Cha reipachhie aw ei ta, He chaphôhtuna hla heta ama cha pasipasawh aw: “Tlokhuh paraopa eima châ haw; Ei phopi tovyuh panano ta, Kei tawhta a pasie haw? Ngiapâna paosaituhpazy hnohta, Eima lyuzy a pie ha ei.”

⁵ Chavâta nuby a daopa ta, Abeipa pakhypi liata râh a rai awpa Chyhsa hnei khao aw veih ei chi.

⁶ Ama hrohsopazy ta, “Bie chho leipa u la, Cha hawhpa bie cha chho khah u; Chhiena miah vaw tlô thlu aw vei,” Tahpa ta bie ama chho.

⁷ Hy Zakaw pathlazy saih u, Cha hawhpa bie cha reih awpa a châ ma? Abeipa Thlahpa cha, A palôh a tataotahâpa a châ ma? Chazy cha ano taopa a châ ma? Âdopa ta a ypa chô liata cha, Ei biezy ta phana tao vei ma?

⁸ Châhrasala atlia tawhta cha, Ei phopi ta chariah hawhta thyu ei chi ta, Thlalôh kawpa ta châ chapiapazy cha, Ama chysia phapazy pahluhpa ei chi ta, Adyuhna lâ tawhta a vaw liepazy hawhta nama tao tyh.

⁹ Ei phopi chanôzy cha, Ama ngiaryh kawna ama ozy tawhta papua ei chi ta, Ei rônahna cha, Ama sawzy tawhta chhâzaw ta nama lapa haw.

¹⁰ Thyu u la, sie teh u, He he namâ pahâ nawpa su châ vei; Paraotuhpa hmo pathaih leipa yna su châ ta, Raona pasa ngaitapa ta a cha parao pathlei aw ei.

¹¹ Chyhsa ta a khiekhâpa ta, Ziza nata haipa biezy reih sala, “Kresawhti nata sahma kyh ei cha chho aw ei,” A tah khiahta cha, Cha phopi hrohsopa a châ aw.

¹² Hy Zakaw y, nama zydua ta cha awpakhy tlai aw ei na ta, Izarei laibâhpazy cha ei pakhy aw; Mietaku o liata mietakuzy hawhta Cha pahmaohpakhy aw ei na ta, Sibiepa su liata mietakuzy hawhta Ei pahmaohpakhy aw ei; Zasâh manôh ama châpa vâta, Kalihpi ama to aw.

¹³ Thokhy a chatôhtuhpa ama hmia lâta sie ta, Chatôh lymâpa ta chhikao tlô ei ta, Chhikao tawhta ama pua. Ama bei cha ama hmia lâta sie ta, Abeipa cha ama luh chô lâta a sie.