MIKÂ 1 - Mara Bible RV (BSI)

¹ He he Zudâh bei Zôthâ, Ahâza nata Hezekia zy amâ bei nota, Môrese khihpa Mikâ hnohta Samâri nata Zerusale kyh Abeipa bie a vaw tlôpa a châ.

Raona a vaw tlô hai

² Hy phopizy saih u, thei u la, Nama zydua ta thei teh u; Hy leilô y, nathlie la, A chhôh lia a ypa zydua chhao nathlie teh u. Abeipa Zehôvâh ta cha leih ei ta, Abeipa ta Achhyna o pathaihpa tawhta a cha leih ei.

³ Pachâ teh u, Abeipa cha a yna tawhta vaw pua ta, Za chô aw ta alei su sâhpazy phei ta a tly aw.

⁴ Mei liata kheihlôh a zaopa hawhta, Pâdawhpa liata ti a chakhaopa hawhta, Tlâhpizy cha ano ry liata zao aw ei ta, Saikaozy ama kaichheih aw.

⁵ Cha zydua cha Zakaw paraona vâta châ ta, Izarei phopi moleina vâta a châ. Zakaw paraona cha khâpa maw? Samâri châ vei ma? Zudâh su sâhpa cha khâpa maw? Zerusale châ vei ma?

⁶ Chavâta Samâri cha, Lyu liata apuapa pahmaohna ta tao aw na ta, Kre lo nawpa su ta ei tao aw; Alôzy Saikao lâ pahluah aw na ta, Â bônazy ei palâsa aw.

⁷ A nothlahpa khazoh zydua cha, Pakeichheih khaipa châ aw ta, A hlao zydua mei ta rao khaipa a châ aw. A nothlahpa khazoh zydua cha, Ei parao khai aw; Âzuahnô ta â zuana ty hmâpa ta A pahmaohpazy châ ei ta, Âzuahnô ty châta hmâ heihpa ama châ aw.

⁸ Cha vâna chata chapa ta ei rôh aw; Chysia pahluh aw na ta, Thluahruapa ta ei y aw; Changie hawhta chaphôhtu aw na ta, Pavawpi hawhta mâchhie ei sa aw.

⁹ A hmah patlâh thei awpa châ khao vei; A hmah ta Zudâh tlô ha ta, Zerusale liata ei phopi thokhy chhikao taih a tlô haw.

Chariahzy Zerusale amâ hnia

¹⁰ Kâthâ liata chho leipa u la, A cha rai ta cha khah u; Bethâpharâ khihpi liata Dohlei liata a hluah teh u.

¹¹ Hy Saphi mo saih u, Thluahruapa ta sie u la, Nozapa ta sie syulyu ha teh u. Zanâ mo cha vaw pua veih ei; Betheze liata chaphôhtuna y ta, Chavâta cha bao thei khao aw vei.

¹² Abeipa tawhta chhiena vaw tlô ta, Zerusale thokhy chhikao a vaw tlô hapa vâta, Marô mo cha ngiatiah leipa ta Hmo phapa ama hâ.

¹³ Hy Lakhi mo saih u, Arâzy cha talailih liata buh teh u; Lakhi cha Zaio sawchanô moleina athaona a châ; Izarei moleinazy cha, Nâma liata hmôpa châ tlôh ta.

¹⁴ Chavâta Môrese Kâthâ hnohta Pathliena hmo pie aw chi ta, Akazi ozy cha, Izarei beizy châta dôveina hmo a châ aw.

¹⁵ Hy Mâresâ mo saih u, Châ pahnietuhpa a vaw chhi heih aw na ta, Izarei rônahna cha Adulâ taihta a vaw tlô aw.

¹⁶ Na sâ a ngyupa ta na luh a papôlô teh; Na saw mopakiapazy cha, Seichâna lâ ama cha siesai awpa vâta, Vâkhieh hawhta na luh a papôlô teh.