MATHAI 9 - Mara Bible RV (BSI)

Zisu ta asypa a patlâh

¹ Zisu cha balyh liata kiah ta, haosâ lâ chaka ta, ano khih lâ sie ta.

² Chyhsa thokha ta asypa pakha a rakhô chhaota ano lâ a vaw sy ei ta. Zisu ta amâ ngiapâna a hmô nahta, asypa hnohta, “Ei sawchapawpa, thlalôhpa ta y mah y, na moleinazy a ngiahthaipa a châ haw,” tah ta.

³ Ryhpa pachutuhpa thokhazy ta ama palôhrupa ta, “He chyhsa heta Khazohpa a reipachhie he,” tah ei ta.

⁴ Zisu ta ama pachânazy cha pahnopa ta, “Khazia nama palôh liata hmo moleipa nama pachâ?

⁵ Kheihawhpa ma a rei a nao via aw, ‘Na moleinazy a ngiahthaipa a châ haw,’ tahpa ma, ‘Thyu la sie teh,’ tahpa maw?

⁶ He hmo he, chyhsa Sawchapawpa he moleinazy a ngiahthai theina biehneina khizaw liata a hnei tahpa nama pahno nawpa ta taopa a châ,” tah ta. Asypa hnohta, “Thyu la, na hmohphaw la la, na o lâ a di teh,” tah ta.

⁷ Asypa cha thyu ta, a o lâ a di ha ta.

⁸ Zawpizy ta cha cha ama hmô nahta, chi ngaita ei ta, chyhsapazy hnohta cha hawhpa biehneina a pietuhpa Khazohpa cha reithai ei ta.

Zisu ta Mathai a aw

⁹ Cha su tawhta Zisu cha sie lymâ ta, chhie kheina su liata atyuhpa chyhsa pakha a moh Mathai ama tahpa hmô ta, a hnohta, “Na zi teh,” tah ta. Thyu ta, zi ha ta.

¹⁰ O liata pati ama dôh hai nota, chhiekheituhpa nata moleipa hluhpi a vy ei ta, Zisu nata a pachupazy cha pati dôh lâh ei ta.

¹¹ Phârisaihzy ta cha cha ama hmô nahta, a pachupazy hnohta, “Khazia nama pachutuhpa heta chhiekheituhpazy nata moleipazy pati a dôh lâh thlâh ha ei?” tah ei ta.

¹² Zisu ta cha bie cha a thei nahta, ama hnohta, “Atlâhpazy ta dawhty a ngiah leipa ei ta, tlâhleipazy ta amâ ngiah.

¹³ Vawh u la, ‘Atheihna khoh leipa na ta, zawngiahna ei khoh,’ tahpa bie yzie cha a kei chu teh u. Chyhsa siapazy pado awpa ta a zupa châ leipa na ta, moleipazy pado awpa ta a zupa tlao ei châ,” tah ta.

Kâhvileina kyh hiahrina

¹⁴ Zawhâna pachupazy a hnohta a vy ei ta, “Khazia keimo nata Phârisaihzy he kâhvileipa ta y tyh pi ta, na pachupazy he kâhvileipa ta ama y hra vei?” tah ei ta.

¹⁵ Zisu ta ama hnohta, “Myuhneituhpa a y thlâh ha nota, ahneina kyhchhi a hlaopazy mâchhie ama sa aw ma? Ama hry tawhta myuhneituhpa lana daihti vaw tlô aw ta, cha tita deikua cha kâhvileipa ta ama y aw.

¹⁶ Ahy hmahta pohthâ thiehpa ta chysia parohpa baithla beih veih ei. Ama baithla khiahta cha, a baithlana ta chysia parohpa cha hrie aw ta, â hrie lao ha aw.

¹⁷ Savo titheih parohpa liata kresawhti thiehpa ryh beih hra veih ei. Ama ryh khiahta cha, savo titheih cha pa aw ta, kresawhti a leih aw ta, savo titheih cha a parao ha aw. Kresawhti thiehpa cha savo titheih thiehpa liata ama ryh tyh, chatanachata amâ boh raihrie aw,” tah ta.

Chanô hawti pathyuna nata chanô patlâhna

¹⁸ Cha biezy cha Zisu ta ama hnohta a rei hai nota, ryureituhpa pakha a vy ta, a hmiakô liata a bôh ta, a hnohta, “Tahmâ tlai kha ei sawchanô thi ta, châhrasala a vy la, a chô liata na ku pahnieh la, a hroh heih aw,” tah ta.

¹⁹ Zisu cha thyu ta, a pachupazy chhaota ryureituhpa cha pazi ei ta.

²⁰ Chanô pakha kô hrawh hleino thi lohpa ta tlâhleipa ta a hnôh lâta pazi ta, a poh pai hria ta,

²¹ “A poh pai chhâ ei hria khiahta cha, patlâhpa ta ei y aw,” tahpa ta pachâ ta.

²² Zisu cha a vaw heih ta, chanô cha hmô ta, a hnohta, “Ei sawchanô, thlalôhpa ta y mah y. Nâ ngiapâna ta a cha patlâh haw,” tah ta. Cha dawh liana chata chanô cha patlâhpa ta y ha ta.

²³ Zisu cha ryureituhpa o a tlô nahta, ramo tôtuhpazy nata zawpi a tymâ ngaitapazy hmô ta,

²⁴ ama hnohta, “Pua teh u, hawtinô he thi vei, â môpa a châ hih,” tah ta. Zisu cha pahneisao ei ta.

²⁵ Châhrasala zawpizy cha khôtho lâ ama pua khai nahta, a ngia ta, hawtinô cha a ku ta patu ta, kaw thyu ha ta.

²⁶ Cha thâtih cha, a chheipâh râh zydua liata pathâh ta.

Mochaopa pano mo pavâsana

²⁷ Cha su tawhta Zisu cha sie lymâ ta, mochaopa pano ta ano pazi ei ta, “Dâvi Sawchapawpa, miah ngiachhie teh,” tahpa ta ao paro ngaitapa ta awh ei ta.

²⁸ O chhôh lâ â ngia nahta, mochaopazy cha a hnohta a vy ei ta, Zisu ta ama hnohta, “He hmo he ei tao thei tahpa namâ ngiapâ ma?” tah ta. Âmo ta a hnohta, “Abeipa y, eimâ ngiapâ na” tah ei ta.

²⁹ Ama mo cha hria ta, ama hnohta, “Namâ ngiapâna hawhta nama chô liata vaw tlô mawh sy,” tah ta.

³⁰ Ama mo vaw pavâ ha ta. Zisu ta âmo cha zikyu a râ ta, ama hnohta, “Ahy hmahta pahno lei awpa ta a sohsi muh vy,” tah ta.

³¹ Châhrasala sie ei ta, a thâtih cha, cha râh chhôh zydua liata tlao pathâhsa lymâ ha ei ta.

Reih pathlie thei leipa reih pathliesana

³² Chyhsazy ama pua nahta, ahripa patupa reih pathlie thei leipa a hnohta a vaw chhi ei ta.

³³ Ahripa a puapa nahta, reih pathlie thei leipa cha a reih pathlie thei ha ta. Zawpizy cha ama noâh ngaita ta, “He hawhpa he Izarei liata hmô beih ma pi,” tah ei ta.

³⁴ Phârisaihzy deikua ta, “Ahripa bei a châpa vâta ahripazy a papua theipa a châ hih,” tah ei ta.

Zisu zawpizy tha a pasa

³⁵ Zisu cha khihpi nata khitaw zydua chahryh ta, amâ pakhyna ozy liata pachupa ta khinarâh thâtihpha phuah lymâ ta. Hriiah to nata pasana to patlâh ta.

³⁶ Zawpizy a hmô nahta, vaituhpa hnei leipa mietakuzy hawhta, nôpopa nata baotuhpa hnei leipa ta ama ypa vâta, âmo cha a thapasa ngaita ta.

³⁷ A pachupazy hnohta, “Sâh hria awpa hluhpi y ta, hriatuhpazy deikua ama chyh.

³⁸ Chavâta sâh hria awpa ta hriatuhpazy a vaw tuah thei nawpa ta, sâh hria Beipa lâ hiah teh u,” tah ta.