MATHAI 8 - Mara Bible RV (BSI)

Zisu ta phawhpa a pathaisa

¹ Zisu cha tlâh tawhta a za chô nahta, zawpi hluhpi ta ano cha zi ei ta.

² Phawhpa pakha a hnohta a vy ta, a hmiakô liata a bôh ta, a hnohta, “Abeipa, na khoh khiahta la eina pathaisa thei chi na,” tah ta.

³ Zisu ta a ku ta kei paza ta, phawhpa cha hria ta, a hnohta, “Ei khoh na, pathaih mah y,” tah ta. Phawhpa cha thlai pathaih ha ta.

⁴ Zisu ta a hnohta, “Ahy hmahta chho lei awpa ta a sohsi mah y. Anodeikuacha ama zo thei nawpa ta, sie la, theihthaipa a kei pamosa la, Mawsi ta hmo hlâ awpa a raopa kha kei hlâ mah y,” tah ta.

Pheisaih za kha hyutuhpa ngiapâna

⁵ Zisu cha Kâpynia khih â ngia nahta, pheisaih za kha hyutuhpa a vy ta, a hnohta,

⁶ “Abeipa, nâ chakaotuhpa asypa cha o liata a zia thlâh ha ta, a pasa ngaita,” tah ta, patlâh awpa ta a haw ta.

⁷ Zisu ta a hnohta, “A vy aw na ta, ei patlâh aw,” tah ta.

⁸ Pheisaih za kha hyutuhpa ta, “Abeipa, ei o nâ ngia tlâh châ va na. Bie kawh kha reih la, nâ chakaotuhpa cha a tlâh aw.

⁹ Kei chhao he biehneina a chabatuhpa châ na ta, ei ry liata pheisaihzy ama y hra. Pheisaih pakha hnohta, ‘Sie teh,’ tah na ta, sie ta, ahropa hnohta, ‘A vy teh,’ tah na ta, a vy ta, nâ chakaotuhpa hnohta, ‘He he tao teh,’ tah na ta, a tao tyh,” tah ta.

¹⁰ Zisu ta cha bie cha a thei nahta, a noâh kaw ta, a pachupazy hnohta, “Hmeiseihta ta ei cha chho ei, he tlu ta ngiapâna thatlôpa he Izarei liata pakha hmah hmô va na.

¹¹ Ei cha chho ei, nochhi notla tawhta chyhsa hluhpi a vy aw ei ta, Abarahâ, Aisika nata Zakaw zy hnohta vârâh khinarâh liata amâ tyuh aw.

¹² Khinarâh sawzy hawhta â pachâpazy deikua cha, khôtho lâ zohna liata thypa châ aw ei ta, cha liata chana nata hâh chariehna a y aw,” tah ta.

¹³ Zisu ta pheisaih za kha hyutuhpa hnohta, “Sie mah y. Nâ ngiapâna hawhta na châta taopa a châ aw,” tah ta. Chatanachata chakaotuhpa cha, cha dawh liana tlai chata tlâh ha ta.

Zisu ta Pity pihnô a patlâh

¹⁴ Zisu Pity o liata â ngia nahta, a pihnô cha chasipa ta â zia thlâh hapa hmô ta.

¹⁵ A ku hria ta, a chasipa cha pai ha ta, thyu ta Zisu cha chakao pâ ha ta.

Zâlâ ta chyhsa hluhpi a patlâh

¹⁶ Zâlâ a vaw châ nahta, ahripa patupa hluhpi a vaw chhi ei ta, bie ta ahripazy cha papua ta, tlâh leipa zydua patlâh lymâ ta.

¹⁷ Cha hmo cha hrohsopa Isai ta, “Ano ta eima pasanazy a la ta, eima hriiahzy miah a phaopa,” tahpa ta a reipa kha a vaw tlô thei nawpa ta a châ.

Zisu zituhpazy

¹⁸ Zisu ta a kiapâh liata zawpi hluhpi a hmô nahta, haosâ lâ chaka awpa ta biepie ta.

¹⁹ Ryhpa pachutuhpa pakha a vy ta a hnohta, “Pachutuhpa, na siena lâ maih ei cha zi aw,” tah ta.

²⁰ Zisu ta a hnohta, “Changiezy ta khaoh hnei ei ta, vâ pavawzy ta bu ama hnei. Chyhsa Sawchapawpa deikua cha luh nyu nawpa su chhao hnei vei,” tah ta.

²¹ Pachupa hropa pakha ta a hnohta, “Abeipa, ei paw kei pabu ha tua awpa na pasaih mah y,” tah ta.

²² Zisu ta a hnohta, “Na zi teh, athihpazy ta ama chyhsa athipazy cha pabu mawh ei sy,” tah ta.

Thlihpi a chalihsa

²³ Zisu cha balyh liata a kiah nahta, a pachupazy ta ano cha pazi ei ta.

²⁴ Tipo liata thlihpi ru ngaitapa vaw pathli ta, ama balyh cha tichatlaopa ta vao ha ta. Zisu deikua cha a mô thlâh ha ta.

²⁵ A pachupazy a vy ei ta, Zisu cha pahra ei ta, “Abeipa, miah pachha teh, eima leidia hai hih,” tah ei ta.

²⁶ Zisu ta ama hnohta, “Ngiapâna chyhpa saih u, khazia nama chi?” tah ta. Thyu ta thlihzy nata tichatlaopa cha ra ta, sidia ha ta.

²⁷ Chyhsazy cha ama noâh kaw ta, “He chyhsa he kheihawhpa chyhsa ma a châ tly, thlihzy nata tichatlaopazy taihta a rei amâ ngiahpa he,” tah ei ta.

Ahripa patupa pano a patlâh

²⁸ Haosâ Kâdarene râh a tlô nahta, ahripa patupa pano thlâ tawhta vaw pua ei ta, Zisu cha a vaw tyh ei ta. A hrâh ngâsâ ei ta, chavâta cha lâpi liana cha ahy hmahta ama sie ngâh tyh leipa a châ.

²⁹ Thata awh ei ta, “Khazohpa Sawchapawpa, kheihta miah tao awpa ma na khoh? Noh taihpa tlô hlâta riethei miah pataosa awpa ta ma nâ vy?” tah ei ta.

³⁰ Ama yna tawhta a hla kawpa liata vao zaw hluhpi ama lao chuah ei ta.

³¹ Ahripazy ta a haw ei ta, a hnohta, “Miah na papua awpa khiahta cha, vao zawzy py chhôh liata miah pangiasa mah y,” tah ei ta.

³² Zisu ta ama hnohta, “Sie teh u,” tah ta. Chatawhcha vaw pua ei ta, vaozy chhôh liana cha a ngia ei ta, vao zaw zydua cha tilaipi ngiahkâ pâdawhpa lâ a râ ei ta, ti liata tlasao khai ha ei ta.

³³ Vao pasatuhpazy cha a râ ei ta, khihpi a ngia ei ta, ato chho ei ta. Ahripa patupazy chô liata hmo a tlôpazy chhao chho ei ta.

³⁴ A khihpi ta Zisu a tyh awpa ta vaw pua ei ta, ama hmô nahta, ama bia puasai awpa ta a haw ei ta.