MATHAI 7 - Mara Bible RV (BSI)

Seina kyh

¹ “Sei khuh vy, seipa ta nama y lei nawpa ta.

² Nama seipa hawhta cha sei aw ei ta, nama panuapa hawhta ama cha panuapa aw.

³ Khazia nâma mo liata pâkô a ypa hmô leipa chi ta, na unawhpa mo liata mobâ na hmô?

⁴ Nâma mo liata pâkô a y thlâh ha nota, kheihta ma na unawhpa hnohta, ‘Mobâ kha cha vaw thaopa haw sah,’ na tah thei aw?

⁵ Nâ, phapakheipa, nâma mo liata pâkô kha la ha tua la, chatanachata na unawhpa mo liata mobâ cha a siapa ta hmô aw chi ta, na thaopa thei aw.

⁶ “Izy cha hmo pathaihpa pie leipa u la, vaozy hmiakô liata nama taikuh lôsôhpazy thy hra khuh vy. Ama phei ta tly aw ei ta, ama châ liehnao pathlei aw.

Hiana kyh

⁷ “Hiah teh u, piepa nama châ aw. Tlua teh u, nama hmô aw. Chakhyh teh u, pahypa nama châ aw.

⁸ A hiahpa maihta piepa châ ei ta, a tluapa ta hmô ta, a chakhyhpa cha pahypa a châ.

⁹ Nama hry liata ahy ma a sawchapawpa ta viahchhâ hiah sala, alô a pie aw?

¹⁰ Nga hiah sala, parih a pie aw?

¹¹ Nâmo, moleipazy chi hmahta, nama sawzy hmo phapa piena châh nama pahno khiahta cha, nama Paw vârâh liata a ypa chhochhi ta cha, kha tlu ta hluh viapa ta ma a hiahtuhpazy hnohta hmo phapa a pie aw tly!

¹² Chavâta chyhsa ta nama chô liata ama tao awpa nama khopa hawhta, chyhsa chô liata tao hra muh vy. Cha cha ryhpa nata hrohsopazy bie a châ.

Chhikao buahpa

¹³ “Chhikao buahpa liata a ngia teh u. Leidiana lâta siena chhikao cha kawh ta, a sie nao ta, cha lâta â ngiapa cha ama hluh ngaita.

¹⁴ Hrona lâ siena chhikao deikua cha buah ta, a sie ru ta, cha lâta a siepa cha ama chyhta.

Tho nata a theizy

¹⁵ “Hrohso pakheipazy tawhta a vaih muh vy. Chazy cha mietaku vo a bupa ta nâmo lâ a vy ei ta, ama chhôh lâ deikua cha changie chahraochatôhpazy ama châ.

¹⁶ Ama thei tawhta nama pahno aw. Ahloh liata kre thei ama lyu beih ma? Diahsai liata theiku ama lyu beih ma?

¹⁷ Tho phapa ta thei phapa pathei ta, tho chhiepa ta thei chhiepa a pathei.

¹⁸ Tho phapa ta thei chhiepa pathei beih leipa ta, tho chhiepa ta thei phapa pathei beih vei.

¹⁹ Thei phapa a pathei leipa tho maih cha thlupa châ ta, mei liata thypa a châ tyh.

²⁰ Cha hawhna chata, hrohso pakheipazy chhao ama thei tawhta nama pahno aw.

Abeipa ta a pahno leipazy

²¹ “ ‘Abeipa, Abeipa,’ nâ tahpa maihta, vârâh khinarâh a ngia leipa aw ei ta, ei Paw vârâh liata a ypa khopa a taotuhpa deita ta â ngia aw.

²² Cha noh liata chyhsa hluhpi ta ei hnohta, ‘Abeipa, Abeipa, na moh ta hrohsona bie phuah ma pi ma, na moh ta ahripazy papua ma pi ma, na moh ta hmonoâhpa hluhpi tao ma pi ma?’ ama tah aw.

²³ Cha tina chata ama hnohta, ‘Nâmo, moleina hmo a taopazy saih u, cha pahno beih veih ei na, na siesai teh u,’ ei tah aw ei.

Lôpanô chô liata o sapa

²⁴ “Ei biezy he thei ta a taopa maih cha, chyhsa sopa, lôpanô chô liata o a sapa hawhta a châ.

²⁵ Avâ suah ta, ti vaw lai ta, thlih ta o vaw su ta, châhrasala o cha cho vei, lôpanô chô liata bôpa a châpa vâta.

²⁶ Ei biezy thei ta a tao leipazy deikua cha, chyhsa hrupa, sadi chô liata o a sapa hawhta ama châ.

²⁷ Avâ vaw suah ta, ti vaw lai ta, thlih ta o cha vaw su ta, o cha a cho haw. O chopa cha a rarôh y ngaita,” tah ta.

Zisu biehneina

²⁸ Cha biezy cha Zisu ta a reih khai nahta, zawpizy cha a pachuna bie vâta ama noâh kaw ta.

²⁹ Ryhpa pachutuhpazy hawhta châ leipa ta, biehneina a hneipa hawhta a pachupa vâta a châ.