MATHAI 6 - Mara Bible RV (BSI)

Piena kyh pachuna

¹ “Chyhsa hmô awpa ta hmo pha a taopa nama châ lei nawpa ta a chado teh u. Chataleipatala nama Paw vârâh liata a ypa tawhta lymâ hmô aw veih ei chi.

² “Chavâta phahlapazy hmo na pie tita, phapakheipazy ta chyhsa reithaina ama hlao thei nawpa ta, pakhyna ozy liata nata lâlaizy liata ama taopa hawhta, na hmia lâta chiahmie tô laih khah y. Hmeiseihta ta ei cha chho ei, ama lymâ ama hmô haw.

³ Nâ deikua cha phahlapazy hmo na pie tita, na ku chachâh lâta a taopa cha na ku chavei lâta pahno khah sy.

⁴ Chatanachata na hmopiepazy cha arulâta y aw ta, na Paw arulâta châ hmôtuhpa ta lymâ a cha pie aw.

Abeipa Thlahchhâna

⁵ “Thlah nama chhâ tita, phapakheipazy hawhta tao khuh vy. Âmo cha chyhsa ta ama hmô thei nawpa ta, pakhyna ozy liata nata khiliah suzy liata a duahpa ta thlah ama chhâ tyh. Hmeiseihta ta ei cha chho ei, ama lymâ ama hmô haw.

⁶ Nâ deikua cha thlah na chhâ tita, na chhôhpadâhpa lâ a ngia la, ochhi khaw la, na Paw arulâta a ypa lâta thlahchhâ mah y. Na Paw arulâta a hmôtuhpa ta a cha pie aw.

⁷ “Thlah nama chhâ tita, Zenitaizy taozie hawhta, hraoleipa biezy reih chanei ngâ thlâh ha khuh vy. Zenitaizy ta bie hluhpi ama reipa vâta ama thlahchhâpa nathliepa awpa hawhta ama pachâ.

⁸ Âmo hawhta tao khuh vy. Namâ ngiahpazy cha nama hia hlâ chhao ta nama Paw ta a pahno.

⁹ Chavâta nâmo la hetana heta thlahchhâ tyh muh vy: “‘Eima Paw vârâh liatapa, Na moh zachhih mawh sy.

¹⁰ Na khinarâh vaw tlô mawh sy. Na khopa vârâh liata ama taopa hawhta, Alei liata taopa châ mawh sy.

¹¹ Noh chareih nie awpa miah pie mah y.

¹² Eima chô liata hmo a paraopazy eimâ ngiahthaipa hawhta, Eima paraonazy miah ngiahthai mah y.

¹³ Reipasaona lâta miah a chhi khah y, Moleipa tawhta miah pachha mah y. Khinarâh zy, hmotaotheina zy, rônahna zy, Chhâzaw nata tlyzaw ta na eih châ tlôh ta. Amen.’

¹⁴ “Nama chô liata hmo a paraopazy namâ ngiahthai khiahta cha, nama Paw vârâh liata a ypa ta a châ ngiahthai hra aw ei.

¹⁵ Nama chô liata hmo a paraopazy namâ ngiahthai vei khiahta cha, nama Paw ta nama hmoparaopazy châ ngiahthai hra aw veih ei.

Kâhvileina kyh

¹⁶ “Kâhvileipa ta nama y tita, phapakheipazy hawhta thachhâna hmia phaoh khuh vy. Âmo cha kâhvileipa ta ama ypa chyhsazy ta ama pahno thei nawpa ta, thachhâna hmia ama palâsa tyh. Hmeiseihta ta ei cha chho ei, ama lymâ ama hmô haw.

¹⁷ Nâ deikua cha kâhvileipa ta na y tita, na luh sathaw a thu la, na hmia a pahlie mah y.

¹⁸ Chatanachata kâhvileipa ta na ypa cha chyhsazy ta pahno leipa aw ei ta, na Paw arulâta a ypa deita ta pahno aw ta, na Paw arulâta châ hmôtuhpa ta lymâ a cha pie aw.

Vârâh liata ryu pachôpa

¹⁹ “Chhoma-u nata saiiepa ta niepa ta, parutuhpazy ta a ngia ei ta ama paru theina alei liana heta ryuzy a pachô khuh vy.

²⁰ Chhoma-u nata saiiepa ta a nie thei leina, parutuhpazy ta amâ ngia thei leina nata paru thei leina vârâh liata ryuzy tlao a pachô muh vy.

²¹ Na ryu yna liata na palôh chhao a y aw.

Pôhpa khaihna

²² “Mokhaoh cha pôhpa meiôh a châ. Na mo a sia khiahta cha, na pôhpa duata a khaih aw.

²³ Na mo a rao ha khiahta deikua cha, na pôhpa dua ta a zoh aw. Nâma liata khaihna cha zohna châ ha sala, zohna cha a zoh ngaita aw dia!

Khazohpa nata khizaw sôh

²⁴ “Ahy hmahta abei pano chakao pabaoh thei aw veih ei. Pakha a hao aw ta, ahropa cha kyh a pachâ aw. Cha leipa chhao ta, pakha rei a ngiah aw ta, ahropa cha a mopakhô aw. Khazohpa nata khizaw sôh chakao pabaoh thei veih ei chi.

Nôpopa ta y khah u

²⁵ “Chavâta ei cha chho ei, nama hrona kyh liata nôpopa ta y leipa u la, nama nie awpa nata nama doh awpa kyh liata nôpopa ta y hra khah u. Nama pôhpa kyh liata nôpopa ta y leipa u la, namâ bu sai awpa kyh liata nôpopa ta y hra khah u. Niepa hlâta hrona sôh via ta, chysia hlâta pôhpa sôh via vei ma?

²⁶ “Vâ pavawzy khi moh tua u: Chi cheih leipa ei ta, hria hra leipa ei ta, sawvâ liata ryh hra veih ei. Châhrasala nama Paw vârâh liata a ypa ta a pasa lymâ ei. Nâmo cha âmo hlâta sôh via syulyu veih ei chi ma?

²⁷ Nama hry liata ahy ma pachârôhpa vâta a doh dy kha a paseihsa via thei?

²⁸ Khazia abu asai kyh liata nama nô a po? Râh liata lilipawzy pachâ tua u, kheihta ma ama laiseih? Hriapasa leipa ei ta, pala so hra veih ei.

²⁹ Châhrasala ei cha chho ei, Sawlawmaw tlai chhao kha a rônahna zydua liana khata, he pawpi miakha tlu ta a ngiapa ta a tobi vei.

³⁰ Hy nâmo, ngiapâ chyhpa saih u, râh liata sibiepa tanoh hroh ta, mylâ mei liata thy thlâh ha awpa hmahta Khazohpa ta cha tlatlu ta a tobi khiahta cha, nâmo chhochhi cha, cha tobi via syulyu aw veih ei ma?

³¹ “Chavâta ‘Khâpa eima nie aw?’ ‘Khâpa eima doh aw?’ ‘Khâpa eimâ tobi aw?’ tahpa ta nôpopa ta y khuh vy.

³² Zenitaizy ta cha hmo zydua cha ama tlua tyh. Cha zydua cha namâ ngiahpa a châ tahpa nama Paw vârâh liata a ypa ta a pahno.

³³ Khazohpa khinarâh nata a siana tlua tua u la, cha hmo zydua cha baichhapa nama châ aw.

³⁴ “Chavâta mylâ châta nôpopa ta y khuh vy. Mylâ cha anosasyh ta â pachâ chhyh aw. Noh kha châta noh kha nôpo â daih.