MATHAI 5 - Mara Bible RV (BSI)

Tlâh liata pachuna biezy

¹ Zisu cha zawpizy a hmô nahta, tlâh lâ kiah ta, a tyuh ta, a pachupazy a hnohta a vy ei ta.

² Hetana heta âmo cha pachu ta.

Nohlaona kyh

³ “Thlahpa sipasapazy ama nohlao na, vârâh khinarâh ama eih a châpa vâta.

⁴ “Pachârôhpazy ama nohlao na, thlapalôhpa ta ama y awpa vâta.

⁵ “Nônaipazy ama nohlao na, lei ryu ama to awpa vâta.

⁶ “Siana khopa vâta nodi dâhphipazy ama nohlao na, ama aoh a vei awpa vâta.

⁷ “Zawngiah theipazy ama nohlao na, zawngiahna ama hmô awpa vâta.

⁸ “Palôh pathaihpazy ama nohlao na, Khazohpa ama hmô awpa vâta.

⁹ “Aryhna taotuhpazy ama nohlao na, Khazohpa sawzy bipa ama châ awpa vâta.

¹⁰ “Siana vâta taola a taopazy ama nohlao na, vârâh khinarâh ama eih a châpa vâta.

¹¹ “Chyhsa ta keima vâta cha reipachhiepa ta nata cha taolapa ta, bie pha leipa to ta â doleipa ta ama cha tei tita, nama nohlao na.

¹² A ly u la, thaphapa ta y teh u, vârâh liata nama lymâ hluhpi a y. Cha hawhna chata, nâmo hlâta a vaw y tuapa hrohsopazy chhao ama vaw taola tyh.

Alôh nata khaihna

¹³ “Chhaohlei alôh nama châ. Alôh cha a padâh ha khiahta cha, kheihta a iah thei khao aw? Khâpa châta hmah phahnai khao leipa aw ta, thy ta phei ta tlypâ awpa dei a châ aw.

¹⁴ “Khizaw khaihpa nama châ. Tlâh laki liata khih a ypa cha nyu theipa châ vei.

¹⁵ Chyhsa ta meiôh pakhaih sala, bai ry liata soh beih veih ei. Meiôh tôh liata soh ei ta, o chhôh liata a ypa zydua khaihna a pie tyh.

¹⁶ Cha hawhna chata, nama khaihna cha chyhsa mohmô ta khaih mawh sy. Chatanachata nama hmo pha taopa hmô aw ei ta, nama Paw avâ liata a ypa ama palyupalih thei aw.

Ryhpa paki awpa ta Krista â zu

¹⁷ “Ryhpa nata hrohsopa biezy pahleipadia awpa ta â zupa hawhta na pangiasa khuh vy. Pahleipadia awpa ta â zupa châ leipa na ta, pakisa awpa ta â zupa tlao ei châ.

¹⁸ Hmeiseihta ta ei cha chho ei, avâ nata alei a lei hlâlei cha, Ryhpa bie liata ropa châsâ chyh chaipa tlyma, achôpa di chaipa tlyma, ato zydua a tlôpaki khai hlâlei cha lei aw vei.

¹⁹ Chavâta ahy rai, he biepiepazy hry liata a chyh chaipa miakha chhao pahua ta, cha hawhta tao hra awpa ta mohropazy a pachupa cha, vârâh khinarâh liata a chyh chaipa ta reipa châ aw ta, ahy rai Ryhpa chyh chaipa chhao zyh ta, a pachupazy deikua cha, vârâh khinarâh liata rônahpa ta bipa ama châ aw.

²⁰ Ei cha chho ei, nama siana cha ryhpa pachutuhpazy nata Phârisaihzy siana hlâta a sia via vei khiahta cha, vârâh khinarâh a ngia thei aw veih ei chi.

Hiehâhna kyh Zisu pachuna

²¹ “Hlâno chyhsazy hnohta, ‘Liany na chei awpa châ vei, liany a cheihpa cha a thâtih pachiapa a châ aw,’ tahpa ta chhopa ama châpa kha nama pahno.

²² Kei deikua ta cha ei cha chho ei. Ahy rai a unawhpa chô liata a hie a hâhpa cha, a thâtih pachia tlâh a châ. A unawhpa ‘Dyutlaileipa’ a tahpa cha ryureina liata tlôkhei tlâh châ ta, ‘Ahrupa’ a tahpa chhao, hriena su mei lâ sie tlâh a châ.

²³ Chavâta na hmopiepa maisâh liata na hlâ hai nota, na unawhpa ta na chô liata palôh pha leina a hneipa nâ thei khiahta cha,

²⁴ na hmopiepa cha maisâh hmiakô liata soh chy la, vawh la, na unawhpa cha a kei ryh ha tua la, cha khai tawhta a vy la, na hmopiepa cha hlâ mah y.

²⁵ Lyuh châ tuatuhpa nata ryureina su lâ nama sie hai nota, lâpi liata aryhna tao para ha mah y. Chataleipatala lyuh châ tuatuhpa ta ryureituhpa lâ cha hlâ aw ta, ryureituhpa ta vaituhpa lâ cha hlâ aw ta, patâhna o liata khôpa na châ pathlei aw.

²⁶ Hmeiseihta ta ei cha chho, na chei awpa phusâ dipa taihta na pie khai hlâlei cha, cha su tawhta pua aw va chi.

Apheina kyh

²⁷ “‘Nâ phei awpa châ vei,’ ama tahpa nama thei haw.

²⁸ Châhrasala ei cha chho ei, ahy rai aohraohpa ta chanô a mohpa cha, a palôh ta chanô liata â phei haw.

²⁹ Na mo chachâh lâta a cha pahluasa khiahta la, khie la thy syulyu ha mah y. Na pôhpa duata hrienasu liata thypa hlâta cha, na sa pachiahpa miakha pahleipa cha a pha via.

³⁰ Na ku chachâh lâta a cha pahluasa khiahta la, tai la thy ha mah y. Na pôhpa duata hrienasu liata thypa hlâta cha, na sa pachiahpa miakha pahleipa cha a pha via.

Nôvah achhaihna kyh

³¹ “‘Ahy rai a lapinô a mapa cha, mana châ a hnohta pie mawh sy,’ tahpa a châ.

³² Châhrasala ei cha chho ei, ahy rai, apheina kyh châ tlôh leipa ta, a lapinô a mapa cha, a lapinô a papheisatuhpa châ ta, ahy rai mapa chanô a hneipa cha apheipa a châ hra.

Bietai kyh

³³ “Hlâno chyhsazy hnohta, ‘Haipa ta bie nâ taih awpa châ vei, bie nâ taihpa cha Abeipa lâta na patlô awpa a châ,’ tahpa ta chhopa ama châpa nama pahno.

³⁴ Kei deikua ta cha ei cha chho ei, bie rai a taih khah u. Avâ reipa ta bie a taih khuh vy, avâ cha Khazohpa beidyuchhai châ tlôh ta.

³⁵ Alei reipa ta bie a taih hra khuh vy, alei he a pheitlyna châ tlôh ta. Zerusale reipa ta bie a taih hra khuh vy, Zerusale cha Bei rônahpa khihpi châ tlôh ta.

³⁶ Na luh reipa ta bie a taih hra khah y, sâbu miakha chhao papawhsa thei leipa chi ta, pavyhsa thei va chi.

³⁷ Na biereipa cha, a châpa khiah ‘A châ’ tah la, a châ leipa khiah, ‘Châ vei’ tah mah y. Cha khô lâ cha moleipa tawhta a vypa a châ.

Viarithô lei awpa

³⁸ “‘Mo vyuh ta mo, hâh vyuh ta hâh,’ ama tahpa nama pahno.

³⁹ Kei deikua ta cha ei cha chho ei, moleipa a dyuh khah u. Chyhsa ta na baih chachâh lâ a cha chabaih khiahta cha, hiakha lâ chhao dao mah y.

⁴⁰ Chyhsa ta lyuh cha tua sala, na viahkao rytho a cha lapa khiahta cha, na viahkao pasipa chhao pie pâ mah y.

⁴¹ Chyhsa ta me kha a cha pasiesa raruah khiahta cha, a hnohta me no sie mah y.

⁴² Châ hiahpa maih pie la, dyu châ cheipa thlyu khah y.

Chariahpa kyhpachâna

⁴³ “‘Na vaih kyhpachâ la, na chariahpa a hao mah y,’ ama tahpa nama pahno.

⁴⁴ Kei deikua ta cha ei cha chho ei, nama chariahpazy kyh pachâ u la, châ taolatuhpazy thlahchhâpa muh vy.

⁴⁵ Chatanachata nama Paw avâ liata a ypa sawzy nama châ aw. Ano cha chyhsa chhiepa nata phapa chô liata noh pachhisa ta, chyhsa siapa nata sialeipa chô liata chhao avâ a pasuasa tyh.

⁴⁶ Kyh châ pachâtuhpazy deita kyh nama pachâ khiahta cha, khâpa lymâ nama hmô aw? Chhiekheituhpazy chhao ta cha hawhpa cha tao thlâh ha veih ei ma?

⁴⁷ Nama unawhzy deita bie namâ chho khiahta cha, chyhsa hropazy hlâta nama tao viana khâpa a y? Zenitaizy chhao ta cha hawhpa cha tao thlâh ha veih ei ma?

⁴⁸ Nama Paw avâ liata a ypa a sia pakipa hawhta, nâmo chhao nama sia paki awpa a châ.