MATHAI 4 - Mara Bible RV (BSI)

Zisu reipasaona â tyh

¹ Cha khai tawhta Zisu cha ahripa ta a reipasao awpa ta, Thlahpa ta râhchawhpa lâ a chhi ta.

² Noh sypalih nata zâ sypalih chaheihpa ta a y tawhta a no vaw di ha ta.

³ Reipasaotuhpa a vy ta, a hnohta, “Khazohpa Sawchapawpa na châ khiahta cha, alôzy he viahchhâ lâta a vaw lie awpa ta biepie teh,” tah ta.

⁴ Zisu ta a chhy ta, “‘Chyhsapa he viahchhâ dei ta hroh aw vei, Khazohpa pakah tawhta bie to a puapa ta tlao a hroh aw,’ Tahpa ta ropa a châ,” tah ta.

⁵ Cha khai tawhta, ahripa ta khihpi pathaihpa lâ a chhi ta, Achhyna o laki pazaopa liata soh ta,

⁶ a hnohta, “Khazohpa Sawchapawpa na châ khiahta cha, a zaw pathlah teh, “‘Khazohpa ta nâma kyh liata, A vâlyuhchâpazy biepie aw ta, Na phei alô liata nâ chhuh lei nawpa ta, Ama ku ta ama cha chalo aw,’ Tahpa ta ropa a châ,” tah ta.

⁷ Zisu ta a hnohta, “‘Abeipa na Khazohpa na pasia awpa châ vei,’ tahpa ropa a châ hra,” tah ta.

⁸ Ahripa ta tlâh sâh ngaitapa lâ a chhi heih ta, khizaw khinarâh zydua nata ama rônahna zydua pamosa ta.

⁹ A hnohta, “Â khu lâta pao la, einâ chhy khiah chi ta cha, he hmo zydua he ei cha pie aw,” tah ta.

¹⁰ Zisu ta a hnohta, “Sâtâ, a râ teh! ‘Abeipa na Khazohpa a chhy aw chi ta, Ano deita na chakao awpa a châ,’ Tahpa ta ropa châ tlôh ta,” tah ta.

¹¹ Chatawhcha ahripa ta Zisu cha siesai ha ta. Vâlyuhchâpazy a vy ei ta, ano cha ama chakao haw.

Zisu Kâlili liata chakaona â thao

¹² Zawhâna ama patu haw tahpa Zisu ta a thei nahta, Kâlili lâ a lie ta.

¹³ Nâzari khih puasai ta, sie ta, tilaipi kiah liata Kâpynia khih, Zebulawna nata Nâthalai râh liata pahrâ ta.

¹⁴ Cha hmo cha hrohsopa Isai ta,

¹⁵ “Zebulawna râh nata Nâthalai râh, Tilaipi pangaina, Zawdâh haosâ râh, Zenitaizy pahrâna Kâlili râh

¹⁶ Zohna liata a tyuhpazy ta Khaihna rônahpa ama hmô haw; Thina nohpahli râh liata atyuhpazy chô liata, Khaihpa a vaw khaih haw,” tahpa ta a reipa kha a vaw tlô thei nawpa ta a châ.

¹⁷ Cha daihti tawhta Zisu ta, “Ro teh u, vârâh khinarâh cha â hnia haw,” tahpa ta pachu pathao ta.

Nga patutuhpa papalih awna

¹⁸ Kâlili Tipo kiah liata a sie hai nota, unawh pano, Saimaw, Pity ama tahpa nata a unawhpa Adaru zy cha tilaipi liata sao ama vaw ngâpa hmô ta. Âmo cha nga patutuhpazy ama châ.

¹⁹ Ama hnohta, “Na zi teh u, chyhsa patutuhpa ta ei cha tao aw ei,” tah ta.

²⁰ Ama saozy thlai siesaipa ta Zisu cha zi ha ei ta.

²¹ Cha tawhtapa cha sie lymâ ta, unawh hropa pano, Zebâdi sawchapawpa Zâmie nata a unawhpa Zawhâna zy cha ama paw Zebâdi chhaota saozy balyh liata ama taopathi ngâpa hmô ta, âmo cha aw ta.

²² Ama balyh nata ama paw cha thlai siesaipa ta Zisu cha zi ha ei ta.

Zisu zawpi hluhpi a deichhy

²³ Kâlili râh zydua chahryh ta, amâ pakhyna ozy liata pachupa ta, khinarâh thâtihpha chho lymâ ta, zawpi hry liata hri to nata pasana to a hneipazy patlâh ta.

²⁴ Suria râh zydua liata a moh pathâh ta, chyhsa tlâhleipa zydua, pasana a hneipa nata hri ohpazy, ahripa patupazy, riapamiepazy nata asypazy a hnohta a vaw chhi ei ta, patlâh lymâ ta.

²⁵ Kâlili tawhta zy, Dekâpôli tawhta zy, Zerusale tawhta zy, Zudia tawhta nata Zawdâh haosâ râh tawh zy ta zawpi hluhpi ta ano cha zi ei ta.