MATHAI 28 - Mara Bible RV (BSI)

Thyuheihna

¹ Pahânoh khai tawhta, hâta noh hmiatua chaipa khih a vaw pavâ pathao nahta, Mâdali nata Mâri hropa cha thlâ vaih awpa ta vawh ei ta.

² Alo thata a vaw sih ta, vârâh tawhta Abeipa vâlyuhchâpa za chô ta, thlâ pamaina lô cha pasie ta, a chô liata a tyuh ta.

³ A hmiaphao cha dôhla pathliepa hawhta châ ta, a chysia cha dâhaw hawhta dieh ta.

⁴ Ano ama chipa vâta, vaituhpazy cha a chalyu ei ta, athipa hawhta y ei ta.

⁵ Vâlyuhchâpa chata chanôzy hnohta, “Chi khah u, Zisu ama khaipâpa kha nama tlua tahpa ei pahno.

⁶ Ano cha he liata y khao vei, a reipa hawhta a thyu haw. A vy u la, â ziana su he vaw moh tua u.

⁷ Tahmâ thlai sie u la, a pachupazy hnohta, ‘Athihpa hry tawhta a thyu haw. Nama hmia lâta Kâlili lâ sie ta, cha liata nama hmô aw,’ tahpa ta kei chho teh u. Nathlie teh u, ei cha chho ha ei chuh,” tah ta.

⁸ Chanôzy cha china nata thaphana chôta thlâ tawhta thlai a lie ei ta, a pachupazy chho awpa ta a râ ei ta.

⁹ Zisu ta âmo cha a vaw tyh ta, “Thlalôhna nama hnohta y mawh sy?” tah ta. A pachupazy cha a vy ei ta, a phei patu ei ta, Zisu cha a naoh ei ta.

¹⁰ Zisu ta ama hnohta, “Chi khah u. Sie u la, ei unawhzy hnohta Kâlili lâ sie awpa ta kei chho teh u. Cha liata eina hmô aw ei,” tah ta.

Thlâ vaituhpazy biereipa

¹¹ Chanôzy ama sie hai nota, thlâ vaituhpa thokha khihpi lâ vawh ei ta, hmo a tlôpa zydua cha theihthai beizy chho ei ta.

¹² Theihthai beizy cha machâzy chhaota a hmaohpakhy ei ta, bie pachia ei ta, pheisaihzy hnohta tâkâ hluhpi pie ei ta,

¹³ “Zawpi hnohta, ‘Zâ eimâ mô chhôh ta a pachupazy a vy ei ta, ama paru haw,’ tahpa ta nama chho aw.

¹⁴ Cha kyh cha râhvaotuhpa nakhaoh liata â ngia hapa chhao ta, a palôh patlâh aw pi ta, nâmo cha eima cha pabohsa aw,” tah ei ta.

¹⁵ Vaituhpazy ta tâkâ cha la ei ta, ama chhopa hawhta tao ei ta. Cha bie hawhna chata tanoh taihta Zuzy hry liata a pathâh lymâ.

Tuana Rônahpa

¹⁶ Pachupa pahrawh hleikhazy cha Kâlili liata Zisu ta tlâh a raopa lâ sie ei ta.

¹⁷ Ano ama hmô nahta, a naoh ei ta, thokha deikua cha a lôh leipa ei ta.

¹⁸ Zisu cha âmo lâ a vy ta, ama hnohta, “Avâ nata alei liata biehneina zydua ei hnohta piepa a châ haw.

¹⁹ Chavâta sie u la, phopi zydua pachupazy ta tao u la, Paw nata Sawchapawpa nata Thlahpa Pathaihpa moh ta bâti pachâsa u la,

²⁰ bie ei cha piepa zydua ei kha zyh awpa ta pachu teh u. Nathlie teh u, nama hnohta ei y thlâh ha aw, khizaw chhâna taih ta,” tah ta.