MATHAI 27 - Mara Bible RV (BSI)

Zisu Pilâ lâ amâ chhi

¹ My a vaw châ nahta, theihthai bei zydua nata khitlâh machâzy cha Zisu thie thei nawpa kyh ryhrao ei ta.

² Zisu cha chahrypa ta a chhi ei ta, râhvaotuhpa Pilâ lâ hlâ ei ta.

Zudâh Iskari thina

³ A patusatuhpa Zudâh ta Zisu cha thailei pachâsapa a châ tahpa a pahno nahta, a ngiapachhi ta, tâkâ tlaw sythôh kha theihthai beizy nata machâzy lâ kei pakua ta.

⁴ Ama hnohta, “Pei hria leipa thisaih ei paphasaipa vâta, ei vaw molei haw,” tah ta. Âmo ta, “Cha cha keimo châta khâpa a pei aw? Nâma tao ta tao teh” tah ei ta.

⁵ Zudâh ta tâkâ cha Achhyna o chhôh liata thy ta, pua ta, sie ta a paaosao ha ta.

⁶ Theihthai beizy ta tâkâ cha la ei ta, “He tâkâ he thisaih ty a châpa vâta, Achhyna o tâkâ byh liata so awpa ta Ryhpa ta pasaih vei,” tah ei ta.

⁷ Ryhraona tao ei ta, cha tâkâ chata khichhaizy thlâ su châta beihvituhpa lyu chalei ei ta.

⁸ Chavâta cha lyu cha tanoh taihta “Thisaih Lyu” tahpa a châ.

⁹ Chatanachata hrohsopa Zeremiah ta, “Tâkâ tlaw sythôh, Izarei saw thokhazy ta ano mâ ama thliepa cha la ei ta,

¹⁰ Abeipa ta bie eina piepa hawhta, beihvituhpa lyu mâ ta ama pie,” tahpa ta a reipa kha a vaw tlô hapa a châ.

Zisu Pilâ hmiakô liata

¹¹ Zisu cha râhvaotuhpa hmiakô liata a duah ta, râhvaotuhpa ta, “Zuzy Beipa na châ ma?” tahpa ta hiahri ta. Zisu ta a hnohta, “Na reipa hawhta ei châ,” tah ta.

¹² Theihthai beizy nata machâzy ta ama leih nota deikua cha, khâpa hmah a chhy vei.

¹³ Pilâ ta a hnohta, “Ama cha leihna zydua he thei va chi ma?” tah ta.

¹⁴ Châhrasala a chhy leipa ta, ama leihna miakha chhao a chhy vei. Cha vâna chata râhvaotuhpa cha a noâh ngaita ta.

Zisu thina nata Bârabâ puana

¹⁵ Kyhchhi daihti maih liata râhvaotuhpa ta atâhpazy hry liata zawpi khopa pakha papua tyh ta.

¹⁶ Cha daihti liata, chyhsa molei ngaitapa pakha, Bârabâ ama tahpa a tâh hra ta.

¹⁷ Amâ vaw pôhpakhy nahta, Pilâ ta ama hnohta, “Ahy ma cha papuapa aw ei sah la nama khoh, Bârabâ ma, Krista ama tahpa Zisu maw?” tah ta.

¹⁸ Ama hiatliapa vâta Zisu cha ama patupa a châ tahpa pahno thlâh ha ta.

¹⁹ Cha dei châ vei. Pilâ cha ryureina dyuchhai liata â tyuh thlâh ha nota, a lapinô ta, “Kha chyhsa siapa chô liana khata kheihta hmah tah khah y. Tanoh ano vâta ei mâ liata pasa thata ei tao,” tahpa ta bieta ta.

²⁰ Theihthai beizy nata machâzy ta Bârabâ papua awpa ta hiah ei ta, Zisu cha pahleipadia awpa ta zawpi pasyu ei ta.

²¹ Râhvaotuhpa ta ama hnohta, “He pano hry liana heta ahy ma cha papuapa aw ei sah la nama khoh?” tah ta. Âmo ta, “Bârabâ” tah ei ta.

²² Pilâ ta ama hnohta, “Cha khiahta la, Krista ama tahpa Zisu he zaw, kheihta ei tao aw?” tah ta. Ama zydua ta, “Khaipâ teh,” tah ei ta.

²³ Pilâ ta, “Khazia maw, khâpa moleina ma a tao haw?” tah ta. Châhrasala, “Khaipâ teh,” tahpa ta thata awh via rili ei ta.

²⁴ Pilâ ta khâpa hmahta tao thei leipa ta, tlao â tymâ via rilipa a hmô nahta, ti la ta, zawpi hmiakô liata a ku a si ta, “He chyhsa siapa thisaih liana heta ei pathaih na, nâmo tao ta tao teh u,” tah ta.

²⁵ Zawpi zydua ta, “A thisaih maoh cha keimo chô liata nata eima pathlazy chô liata y mawh sy!” tahpa ta a chhy ei ta.

²⁶ Chatanachata Bârabâ cha papua ta, Zisu deikua cha a pachheisa khai tawhta, khaipâ awpa ta hlâ ha ta.

Pheisaihzy ta Zisu ama taola

²⁷ Râhvaotuhpa pheisaihzy ta Zisu cha Pritôria lâ a chhi ei ta, pheisaih zydua a hmiakô liata awpakhy ei ta.

²⁸ A chysia pahluh ei ta, poh saihlawpa pabu ei ta.

²⁹ Hloh lakho phieh ei ta, a luh liata pakho ei ta, a ku chachâh lâta lohthi chabasa ei ta. A hmiakô liata pakhu paneihpa ta, “Zuzy beipa, hroh pareih mah y,” tahpa ta pasipasawh ei ta.

³⁰ Ama pachih ta pachhao ei ta, lohthi cha la ei ta, a luh liata tu ei ta.

³¹ Ama pasipasawh khai nahta, poh saihlawpa cha hlaipa ei ta, ano chysia pakysa heih ei ta, khaipâ awpa ta a chhi ha ei ta.

Zisu khaipâna

³² Ama pua nahta, Kurini chyhsa, a moh Saimaw ama tahpa hmô ei ta. Cha chyhsa cha Zisu kraws papiasa raruah ei ta.

³³ Luh ru su ama tahpa Kalvari tlâh ama tlô nahta,

³⁴ hmo khapa nata pahlaopa kresawhti padosa ei ta, pachâh ta, doh khoh leipa ta.

³⁵ Ama khaipâ khai nahta, nuby a daopa ta a chysiazy a rai ei ta.

³⁶ Cha liata a tyuh ei ta, ano cha vaih ei ta.

³⁷ A luh chô liata ano leihna, “He he Zisu, Zuzy Beipa a châ,” tahpa ta ropa bai ei ta.

³⁸ Zisu hnohta hraotuhpa pano, a chachâh lâta pakha, a chavei lâta pakha khaipâ hra ei ta.

³⁹ Cha su a chapiapazy ta ama luh hiepa ta, pahneisao ei ta,

⁴⁰ “Nâ, Achhyna o phie ta, noh thôh chhôh ta a paduapathi awpa chi, nâma sasyh ta a pachha châh chi! Khazohpa Sawchapawpa na châ khiahta cha, kraws tawhta za chô châh chi!” tah ei ta.

⁴¹ Theihthai beizy, Ryhpa pachutuhpazy nata machâzy chhao ta pasipasawh ei ta,

⁴² “Chyhsa hropazy pachha ta, anosasyh a pachha thei vei. Izarei Bei mah a châ tâh, tahmâ he kraws tawhta za chô sala, ano eimâ ngiapâ aw.

⁴³ Khazohpa ngâ ta, ‘Khazohpa Sawchapawpa ei châ’ a tah mâh tâh. Khazohpa ta a chô liata â ly tlai khiahta cha, tahmâ pachha bao sa,” tah ei ta.

⁴⁴ A hnohta khaipâpa hraotuhpazy chhao ta, cha hawhta pasipasawh hra ei ta.

Zisu thina

⁴⁵ Nohchhô dawh hrawh hleino tawhta zâlâ dawh thôh taih alei chô zydua vaw zoh kaluh ha ta.

⁴⁶ Dawh thôh rachhôhpa liata, Zisu cha ao paro ngaitapa ta awh ta, “Eli, Eli, lâmâ sabakthâni?” tah ta, cha cha, “Ei Khazohpa, Ei Khazohpa, khazia eina pathlua chi?” tahna a châ.

⁴⁷ Cha liata a duahpazy ta ama thei nahta, “Elaizâh a aw chu,” tah ei ta.

⁴⁸ Ama hry liata chyhsa pakha thlai a râ ta, ti pasysana la ta, kresawhti thaopa liata ny ta, lohthi pawhmao liata pataohpa ta, padosa ta.

⁴⁹ Châhrasala ahropazy ta, “Tah mâh kha, pachha awpa ta Elaizâh â zu ma tahpa moh tua suh u,” tah ei ta.

⁵⁰ Zisu cha ao paro ngaitapa ta awh heih ta, a thlahpa pathlie ha ta.

⁵¹ Achhyna o pohraipa cha, a chô lâ tawhta a ry lâ taihta â khophie ta a hrie ta, alo a sih ta, lôpanôzy a patlaw ta.

⁵² Thlâzy a pahy ta, mopathaihpa a mô hapa pôhpa hluhpi pathyupa ta y ei ta.

⁵³ Zisu a thyuheih tawhta thlâ tawhta vaw pua ei ta, khihpi pathaihpa lâ sie ei ta, chyhsa hluhpi hnohta a luah ei ta.

⁵⁴ Pheisaih za kha hyutuhpa nata a hnohta Zisu vaituhpazy ta, alo a sihpa nata hmo a ypazy cha ama hmô nahta, chi ngaita ei ta, “Hmeiseihta ta, he he Khazohpa Sawchapawpa a châ tlai na!” tah ei ta.

⁵⁵ Cha liata chanô hluhpi, Zisu deichhy lymâpa ta Kâlili tawhta a vaw zipazy y ei ta, lâhlapi tawhta sai ei ta.

⁵⁶ Ama hry liata Mâri Mâdali, Zâmie nata Zawsi nô Mâri zy a hlao ei ta, Zebâdi sawchapawzy nô chhao â hlao hra.

Zisu pabuna

⁵⁷ Zâlâ a vaw châ nahta, chyhsa hneirôhpa Zawsi ama tahpa cha Arimathai khih tawhta a vy ta. Ano cha Zisu pachupa pakha châ hra ta.

⁵⁸ Zawsi cha Pilâ lâ vawh ta, Zisu ri kei hiah ta. Pilâ ta pie awpa ta biepie ta.

⁵⁹ Zawsi ta Zisu ri cha la ta, poh rih dipa pathaihpa ta pahly ta,

⁶⁰ ano thlâ thiehpa, lôpanô khiepa ta a taopa liata pazia ta, thlâ chhikao cha alô lai ngaitapa ta pamai ta, siesai ha ta.

⁶¹ Mâri Mâdali nata Mâri hropazy chhao, cha liata y hra ei ta, a thlâ dady ta a tyuh ei ta.

Thlâ vaituhpazy

⁶² A mylâ ta, cha cha Pachynoh mylâ châ ta, theihthai beizy nata Phârisaihzy Pilâ hmiakô liata a hmaohpakhy ei ta,

⁶³ a hnohta, “Pâpuh, kha dôtuhpa khata a hro nota, ‘Noh thôh khai tawhta ei thyu heih aw,’ a tahpa eimâ thei thlâh haw.

⁶⁴ Chavâta thlâ cha noh thôh noh taihta a phapa ta vaih awpa ta biepie teh. Chataleipatala a pachupazy ta ano cha paru aw ei ta, zawpi hnohta, ‘Thina tawhta a thyu haw,’ tah aw ei ta, cha dôveina hnôhchaipa cha dôveina hmiatuapa hlâ khata a pha lei via syulyu aw,” tah ei ta.

⁶⁵ Pilâ ta ama hnohta, “Vaituhpa pheisaihzy nama hnei kha zaw. Vawh u la, â boh thei chaipa hawhta kei tao teh u” tah ta.

⁶⁶ Chatanachata vawh ei ta, â boh thei nawpa ta thlâ cha alô ta â i ngaitapa ta pamai ei ta, vaituhpazy soh ei ta.