MATHAI 26 - Mara Bible RV (BSI)

Zisu thie awpa ta teina

¹ Zisu ta cha hmo zydua cha a rei khai nahta, a pachupazy hnohta,

² “Noh no khai tawhta zawpakhô kyhchhi a vaw y awpa nama pahno. Chyhsa Sawchapawpa he khaipâ awpa ta patusapa a châ aw,” tah ta.

³ Cha nota Theihthai Beichaipa Kaiphâ ama tahpa o liata theihthai beizy nata khitlâh machâzy a hmaoh ei ta,

⁴ Zisu cha dôveipa ta patu ta, ama thie thei nawpa ta a pachia ei ta.

⁵ Châhrasala, “Kyhchhi chhôh ta la châ khah sy. Chataleipatala zawpi hry liata tymâna a y pathlei aw na,” tah ei ta.

Zisu Bethâni liata sathawthupa a châ

⁶ Zisu cha Bethâni liata phawhpa Saimaw o liata a y nota,

⁷ chanô pakha sathaw ropahâh ngaitapa alabastâ ôh a vaw cheipa ta a vy ta, pati a dôh hai nota a luh liata bao ta.

⁸ Pachupazy ta ama hmô nahta, ama hiehâh ngaita ta, “Khazia ma he hawhta a pahryuh thlâhthli tly?

⁹ He sathaw he a mâ hluhpi ta zuapa ta, dyhchhiepazy piepa châ sala a phahnai via awpa tlai,” tah ei ta.

¹⁰ Zisu ta ama reipa cha a pahno nahta, ama hnohta, “Chanô he khazia nama patypamâ tly? Ei chô liata hmo phapa a taopa a châ.

¹¹ Dyhchhiepazy cha nama hnohta khâ ama y thlâh ha aw. Kei deikua cha nama hnohta khâ a y awpa châ va na.

¹² He sathaw ropahâhpa ei pôhpa liata a baopa he, pabu awpa ta eina pachhuahpanohpa a châ.

¹³ Hmeiseihta ta ei cha chho ei, khizaw zydua liata he thâtihpha ama chhona su lia maihta, he chanô hmotaopa he ano a thei thlâh ha nawpa ta ama reih lymâ hra aw,” tah ta.

Zudâh Iskari ta Zisu â paphasai

¹⁴ Cha khai tawhta pahrawh hleino hry liata pakha, Zudâh Iskari ama tahpa cha, theihthai beizy lâ vawh ta,

¹⁵ ama hnohta, “Ano cha, cha patusa aw ei sah la, khâpa eina pie aw ei chi?” tah ta. Tâkâ tlaw sythôh pie ei ta.

¹⁶ Cha noh tawhta, Zudâh Iskari cha Zisu patusa nawpa rypaohna tlua ta.

Pachupazy hnohta zawpakhô pati a dôh

¹⁷ Viahchhâ thinô pahlao leipa noh, noh hmiatua chaipa liata, pachupazy cha Zisu lâ a vy ei ta, a hnohta, “Zawpakhô pati nie nawpa ta khataih liata châ chhuanohpa sih la na khoh?” tah ei ta.

¹⁸ Zisu ta, “Khihpi liata chyhsa pakha lâ vawh u la, a hnohta, ‘Pachutuhpa ta ei daihti a hnia ha ta, ei pachupazy chhaota zawpakhô kyhchhi na o liata eima hmâh aw a tah,’ kei tah muh vy,” tah ta.

¹⁹ Zisu ta bie a piepa hawhta pachupazy ta tao ei ta, zawpakhô kyhchhi cha a chhuanoh ei ta.

²⁰ Zâlâ a vaw châ nahta, Zisu cha pachupa pahrawh hleinozy chhaota tlâhkhai liata pati dôh ta.

²¹ Ama nie hai nota ama hnohta, “Hmeiseihta ta ei cha chho ei, nama hry liata pakha ta eina patusa aw,” tah ta.

²² Ama pachârôh ngaita ta, pakha pakha ta, “Abeipa, kei ei châ ma?” tah ei ta.

²³ Zisu ta, “Beikoh liata a ku nâ chapaolâhpa ta eina patusa aw.

²⁴ Chyhsa Sawchapawpa he, a thâtih ropa hawh tlai ta a sie aw. Châhrasala Chyhsa Sawchapawpa a patusatuhpa chyhsa cha a hu a po na! Cha chyhsa cha pih leipa sala, a châta a pha via awpa tlai,” tah ta.

²⁵ A patusa awpa Zudâh ta a chhy ta, a hnohta, “Pachutuhpa, kei ei châ ma?” tah ta. Zisu ta, “Nâ ta na châpa na reih cha zaw,” tah ta.

Abeipa Zâpati

²⁶ Ama nie hai nota, Zisu ta viahchhâ la ta, byhnâ a aw khai nahta, pachhaih ta, pachupazy pie ta, ama hnohta, “La u la, nie teh u, he he ei sapa a châ,” tah ta.

²⁷ Cha khai tawhta, nyu la ta, alyna bie a rei khai nahta, ama hnohta pie ta, “Nama zydua ta doh teh u.

²⁸ He he ei thisaih, moleinazy a ngiahthai nawpa ta, chyhsa hluhpi châta a lohpa biehrai thiehpa a châ.

²⁹ Ei cha chho ei, ei Paw khinarâh liata nâmo chhaota a thiehpa ta ei dona noh a tlô hlâlei cha, kre zôh thei he doh heih khao aw va na,” tah ta.

³⁰ Hla ama sa khai nahta, Ôli tlâh lâ sie ha ei ta.

Pity ta â paphasai awpa Zisu ta a reih chhielie

³¹ Zisu ta ama hnohta, “‘Mietaku vaituhpa thie aw na ta, mietaku zaw ama pai aw,’ tahpa ta ropa hawhta, tazâ tlai heta nama zydua ta eina paosai khai aw ei chi.

³² Châhrasala pathyupa ta ei y tawhta, nama hmia lâta Kâlili râh lâ ei sie aw,” tah ta.

³³ Pity ta a chhy ta, “Ama zydua ta cha paosai khai ha hra ei sala, kei la cha paosai beih aw va na,” tah ta.

³⁴ Zisu ta Pity hnohta, “Hmeiseihta ta ei cha chho, tazâ tlai heta, awh kho hlâta ei thôh einâ paphasai aw chi,” tah ta.

³⁵ Pity ta a chhy ta, “Na hnohta thi awpa a châpa chhao ta, châ paphasai cheita aw va na,” tah ta. Cha hawhna chata pachupa zydua ta reih chyu ei ta.

Kesemani liata Zisu thlah a chhâ

³⁶ Cha khai tawhta Zisu cha a pachupazy chhaota Kesemani ama tahpa su lâ sie ta, ama hnohta, “Hao liata thlah ei kei chhâ chhôh ta, he liata a vaw tyuh chy muh vy,” tah ta.

³⁷ A hnohta Pity nata Zebâdi sawchapaw pano a chhi ta, pachârôhpa ta a nôpo ngaita ta.

³⁸ Ama hnohta, “Ei thlahpa a pachârôh ngaita ta, thina taihta a châ. He liata y u la, na vaihkhei teh u,” tah ta.

³⁹ A chyhta vawh via ta, â khu lâta pao ta, thlahchhâ ta, “Hy ei Paw, tao theipa a châ khiahta la, he nyu he rie na khôsai mawh sy. Châhrasala keima rei châ leipa sala, nâma rei tlao châ mawh sy,” tah ta.

⁴⁰ Pachupazy yna lâ vawh ta, amâ mô thlâh hapa hmô ta. Pity hnohta, “Aw! Dawh kha chhôh chhao na vaihkhei thei veih ei chi ma?

⁴¹ Reipasaona liata namâ ngia lei nawpa ta, a vaih u la, thlahchhâ teh u. Thlahpa ta la hoh ta, sapa deikua a dadieh,” tah ta.

⁴² Chatawhcha a ei nona ta vawh ta, thlahchhâ heih ta, “Hy ei Paw, he nyu he doh leipa ta na khôsai thei awpa a châ vei khiahta cha, na rei sai châ mawh sy,” tah ta.

⁴³ A vy heih ta, mokuh ama saih thei leipa vâta, a vaw mô thlâh ha heih ei ta.

⁴⁴ Âmo cha siesai heih ta, a ei thôhna ta thlah kei chhâ heih ta, a rei hmopa pyly reih heih ta.

⁴⁵ Cha khai tawhta pachupazy yna lâ a vy ta, ama hnohta, “A pahâ ei chi ta ma namâ mô thlâh ha chy? Moh teh u, a daihti a tlô haw, Chyhsa Sawchapawpa cha moleipazy ku liata hlâpa a châ haw.

⁴⁶ Thyu teh u, sie ei suh u. Moh teh u, nâ patusatuhpa â vaw hnia ha huh,” tah ta.

Zisu patuna

⁴⁷ A rei hai nota, pahrawh hleino hry liata pakha, Zudâh cha a vy ta, zawpi hluhpi chhao zaozi nata thothuzy a chabapa ta a hnohta a vy ei ta. Theihthai beizy nata khitlâh machâzy taihta a hlao ei ta.

⁴⁸ A patusatuhpa ta, “Ei pahnâpa chyhsa cha, nama patu khohpa cha a châ aw. Ano cha patu muh vy,” tahpa ta ama hnohta ngiana vaw pie chhielie ha ta.

⁴⁹ Zisu cha thlai vaw pangai ta, a hnohta, “Ei châ naoh na, Pachutuhpa!” tah ta, Zisu cha a pahnâ ta.

⁵⁰ Zisu ta a hnohta, “Viasa, nâ vyna chhâpa cha tao mah y,” tah ta. Chyhsazy vaw pua ei ta, Zisu cha chahnaochakhipa ta patu ei ta.

⁵¹ Zisu hnohta a ypa hry liata pakha ta a zaozi phia ta, theihthai beichaipa chakaotuhpa kei chhawh ta, a nakao pathai ha ta.

⁵² Zisu ta a hnohta, “Na zaozi kha a paih liata khô teh. Zaozi a hmâhpa maih zaozi ta ama leidia aw.

⁵³ Tahmâ tlai he ei Paw lâ a haw aw sah la, vâlyuhchâpa hlao hrawh hleino hlâta hluh via eina vaw tuapa thei tahpa pahno veih ei chi ma?

⁵⁴ Châhrasala cha hawhta tao aw sah la, he hawhta vaw châ awpa ta Biehrai ta a reipa kheihta â ki thei aw?” tah ta.

⁵⁵ Cha dawh liata Zisu ta zawpi hnohta, “Hraotuhpa patupa hawhta patu awpa ta ma, zaozi nata byuhthô ta einâ vyhnao ei chi? Achhyna o liata noh chareih bie pachupa ta a tyuh tyh na ta, na patu tlôh ei chi va.

⁵⁶ Châhrasala hrohsopazy ropa Biehrai â ki thei nawpa ta, he hmo zydua he a vaw tlôpa a châ,” tah ta. Cha khai tawhta, pachupa zydua ta ano cha siesaipa ta a râ khai ha ei ta.

Zisu Kaiphâ hmiakô liata

⁵⁷ Zisu patutuhpazy ta ano cha theihthai beichaipa Kaiphâ lâ a chhi ei ta, cha liata Ryhpa pachutuhpazy nata machâzy a hmaohpakhy ei ta.

⁵⁸ Pity cha â hla kawpa ta Zisu cha pazi ta, theihthai beichaipa tlyhmia tlôna taih pazi ta. Achhâna pahno awpa ta a chhôh lâ a kei ngia ta, vaituhpazy hry liata a tyuh ta.

⁵⁹ Zisu ama thie thei nawpa ta, theihthai beizy nata ryureituhpa zydua ta haipa ta ano leih nawpa tlua ei ta.

⁶⁰ Pahnokheituh pakheipa hluhpi vaw pua hra ei sala, leih nawpa hmô leipa ei ta. Achhâna lâta chyhsa pano a vy ei ta,

⁶¹ “He chyhsa heta, ‘Khazohpa Achhyna o he phie thei na ta, noh thôh chhôh ta ei paduapathi thei,’ a tah,” tah ei ta.

⁶² Theihthai beichaipa cha a kaw duah ta, Zisu hnohta, “A chhy aw va chi ma? He chyhsazy ta ama cha leihna he khâpa ma a châ?” tah ta.

⁶³ Châhrasala Zisu cha a chalih thlâh ha ta. Theihthai beichaipa ta, “Khazohpa hrohpa moh reipa ta bie a taih awpa ta bie ei cha pie. Khazohpa Sawchapawpa Mesia cha na châ ma, miah chho teh,” tah ta.

⁶⁴ Zisu ta a chhy ta, “Na reipa hawhta ei châ. Châhrasala ei cha chho ei, he tawhta la, Chyhsa Sawchapawpa he Atotaotheipa ku chachâh lâta a tyuhpa ta, vâ meihdo chô liata â vypa nama hmô aw,” tah ta.

⁶⁵ Cha khaipa nahta, theihthai beichaipa cha a poh hrie ta, “Khazohpa a reipachhie he zaw. Pahnokheituhpa hropa khazia eimâ ngiah khao aw? Pachâ teh u, tahmâ tlai kha Khazohpa a reipachhiena nama thei khai ha khaw.

⁶⁶ Kheihta ma nama pachâ?” tah ta. “Thi tlâh a châ,” tah ei ta.

⁶⁷ A hmia liata ama pachih ta pachhao ei ta, tu ei ta, thokha ta chabaih ei ta,

⁶⁸ “Hrohsona bie cha miah chho bao, Hy nâ, Mesia! Ahy ma châ tu?” tah ei ta.

Pity ta Zisu â paphasai

⁶⁹ Pity cha dôhpachhôh tlyhmia khôtho liata a tyuh ta. Laihsa pakha ano lâ a vy ta, “Nâ chhao he Kâlili chyhsa Zisu hnohta a ypa na châ hra,” tah ta.

⁷⁰ Pity ta, “Na bie reipa cha pahno va na,” tahpa ta ama zydua mohmô ta a papha ta.

⁷¹ Pua awpa ta tlyhmia chhikao lâ a vaw hai nota, laihsa hropa ta vaw hmô ta, cha liata a ypazy hnohta, “He chyhsa he Nâzari chyhsa Zisu hnohta a ypa a châ,” tah ta.

⁷² Pity ta, “Cha chyhsa cha pahno va na,” tahpa ta chhie a sa khâhpa ta, a paphasai heih ta.

⁷³ Buakha a châ nahta, cha liata a duahpazy a vy ei ta Pity hnohta, “Nâ chhao he ama hry liatapa na châ cheingei hra, na reih pathliezie liata â hno thlâh haw,” tah ei ta.

⁷⁴ Pity ta, “Cha chyhsa cha pahno va na,” tahpa ta chhie a sa khâh ta. Cha khaipa nahta, awh khoh pâ ha ta.

⁷⁵ Zisu ta, “Awh kho hlâta ei thôh einâ paphasai aw chi,” a tahpa kha, Pity ta a thei ta. Pua ta, aoh tlili ta cha ta.