MATHAI 25 - Mara Bible RV (BSI)

Laihsakôpa pahrawh pakhona

¹ “Cha noh liata, vârâh khinarâh cha laihsakôpa pahrawh, ama meiôh a cheipa ta myuhneituhpa dy awpa ta a puapazy hawhta a châ aw.

² Ama hry liata papangawh ahrupa châ ei ta, papangawh asopa ama châ.

³ Ahrupazy ta ama meiôh dei a chei ei ta, meiti a chei pâ leipa ei ta,

⁴ asopazy deikua cha ama meiôhzy dei châ leipa ta, meiti ôhzy chhao a chei pâ ei ta.

⁵ Myuhneituhpa charâ ta â vy leipa vâta, ama zydua ta tlauahpa ta, a mô ha ei ta.

⁶ Zâcho ta, ‘Moh teh u, myuhneituhpa cha â vy haw! Dy awpa ta pua teh u,’ tahpa ta awhpa pyu vaw y ta.

⁷ Laihsakôpazy cha thlai thyu ei ta, ama meiôh zy rao ei ta.

⁸ Ahrupazy ta a sopazy hnohta, ‘Nama meiti miah pie hra teh u, eima meiôhzy a thi haw,’ tah ei ta.

⁹ Asopazy ta a chhy ei ta, ama hnohta, ‘Keimo nata nâmo châta a daih aw vei, meiti zuahtuhpazy lâ vawh u la, tlao kei chalei teh u,’ tah ei ta.

¹⁰ Chalei awpa ta ama vawh chhôh ta myuhneituhpa cha vaw tlô ha ta, a mâ chiehpazy cha ano nata kialao nie awpa ta a ngia ei ta, ochhi khaw ha ei ta.

¹¹ Cha khai tawhta laihsakôpa hropazy kha a vy ei ta, a hnohta, ‘Abeipa, Abeipa, miah pahypa teh,’ tah ei ta.

¹² Myuhneituhpa ta âmo cha a chhy ta, ‘Hmeiseihta ta ei cha chho ei, cha pahno veih ei na,’ tah ta.

¹³ A noh nata dawh pahno tlôh leipa ei chi ta, chavâta a hrohrua teh u.

Talent pakhona

¹⁴ “Vârâh khinarâh cha chyhsa ta râh hro lâ a sie chy ta, a chakaotuhpazy aw ta, a sôhzy a pavaosapa hawhta a châ.

¹⁵ Chakaotuhpa pakha hnohta talent miapangawh pie ta, ahropa hnohta miano pie ta, ahropa hnohta miakha a pie. Ama tao theipa rakha chyu ta pie ta, sie ha ta.

¹⁶ Talent miapangawh a vaotuhpa cha thlai sie ta, talent â vaopazy hmâpa ta sôh palie ta, talent miapangawh hropa papôhsa ta.

¹⁷ Cha hawhna hra chata talent miano a vaotuhpa chhao, talent miano papôhsa ta.

¹⁸ Talent miakha a vaotuhpa deikua cha sie ta, alei chao ta, a zibeipa tâkâ cha tlao nyu ha ta.

¹⁹ Bohpi a châ tawhta, chakaotuhpazy zibeipa cha vaw tlô ta, a sôh a pavaosapazy pasia ta.

²⁰ Talent miapangawh a pavaosapa a vy ta, talent hropa miapangawh vaw cheih ta, a hnohta, ‘Ei zibeipa, talent miapangawh eina pavaosapa chi kha, moh tua, talent hropa miapangawh ei papôhsa,’ tah ta.

²¹ A zibeipa ta a hnohta, ‘Chakaotuhpa phapa nata ngâchhihpa, na tao pha na. Hmo chyhta chô liata ngâchhih chi ta, a hluhpi chô liata ei cha paysa aw. Na zibeipa alyna liata a ngia teh,’ tah ta.

²² Talent miano a pavaosapa chhao kha a vy ta, a hnohta, ‘Ei zibeipa, talent miano eina pavaosapa chi kha, moh teh, talent hropa miano ei papôhsa,’ tah ta.

²³ A zibeipa ta a hnohta, ‘Chakaotuhpa phapa nata ngâchhihpa, na tao pha na. Hmo chyhta chô liata ngâchhih chi ta, a hluhpi chô liata ei cha paysa aw. Na zibeipa alyna liata a ngia teh,’ tah ta.

²⁴ Talent miakha a pavaosapa chhao kha a vy ta, a hnohta, ‘Ei zibeipa, nâ cha chyhsa chakhiehchariehpa châ chi ta, na tu leina liata tai chi ta, na hie leina liata chhao a hria tyhpa na châ tahpa ei pahno.

²⁵ Chavâta chi na ta, sie na ta, na talent kha alei liata ei nyu haw. Moh teh, na eih ualua ta na hmô heih hih,’ tah ta.

²⁶ A zibeipa ta a hnohta, ‘Nâ, chakaotuhpa moleipa nata thathipa! Ei tu leina liata hria tyh na ta, ei hie leina liata chhao ei tai tyh tahpa cha na pahno ma?

²⁷ Cha hawhta a châ hnohkua cha, ei tâkâ kha sôhpalietuhpazy liata na vaw soh ha awpa châ ta, ei vaw tlô tita a pôhna chhaota ei hmô heih awpa mah a châ tâh.

²⁸ A talent miakhapa kha lapa u la, talent miahrawh a hneituhpa pie teh u.

²⁹ Ahy rai a hneipa cha, pie baichhapa châ aw ta, a hluhpi a hnei aw. A hnei leipa deikua cha, a hnei chhôhpa chhao lapa a châ aw.

³⁰ Chakaotuhpa phahnai leipa kha, khôtho lâ zohna liata thy teh u. Cha liata chana nata hâh chariehna a y aw,’ tah ta.

Ryureina hnôhchaipa

³¹ “Chyhsa Sawchapawpa he a vâlyuhchâpa zydua chhaota rônah ngaitapa ta â zu tita, a rônahna beidyuchhai liata a tyuh aw ta,

³² a hmiakô liata phopi zydua a vypakhy aw ei ta, mietaku vaituhpa ta miezy hry tawhta mietakuzy a pahruapa hawhta, chyhsazy a pahrua aw ei.

³³ Mietakuzy cha a chachâh lâta soh aw ta, miezy deikua cha a chavei lâta a soh aw.

³⁴ Abeipa ta a chachâh lâta a ypazy hnohta, ‘Ei Paw ta byhnâ a piepazy saih u, a vy u la, khizaw tao tua no tawhta khinarâh a chhuahdypa cha to teh u.

³⁵ Ei nodi ta, nie awpa na pie ei chi ta; ei dâhphi ta, do awpa na pie ei chi ta; khichhaipa châ na ta, na patlôsa ei chi ta;

³⁶ thluahruapa ta y na ta, chysia na pie ei chi ta, tlâh leipa na ta, na vaih ei chi ta; patâhna o liata y na ta, eina tly ei chi,’ a tah aw ei.

³⁷ Mosiapazy chata a chhy aw ei ta, a hnohta, ‘Abeipa, khati ta ma nodipa ta cha hmô pi ta, nie awpa eima cha pie? Khati ta ma dâhphipa ta cha hmô pi ta, do awpa eima cha pie?

³⁸ Khati ta ma khichhaipa ta châ hmô pi ta, eima o liata eima cha patlôsa? Khati ta ma thluahruapa ta cha hmô pi ta, chysia eima cha pie?

³⁹ Khatita ma tlâh leipa ta tlyma, patâhna o liata tlyma cha hmô pi ta, eima cha tly?’ ama tah aw.

⁴⁰ Abeipa ta âmo cha a chhy aw ta, ama hnohta, ‘Hmeiseihta ta ei cha chho ei, he ei unawhpa chyh chaipazy hry liata pakha chô liata nama taopa cha, ei chô liata a taopa nama châ,’ a tah aw ei.

⁴¹ “Cha khai tawhta a chavei lâta a ypazy hnohta, ‘Chhiesapa ta a ypa saih u, ahripa nata a lyuhchâpazy châta a chhuahdypa chhâzaw mei lâ na siesai teh u.

⁴² Ei nodi ta, nie awpa na pie leipa ei chi ta; ei dâhphi ta, do awpa na pie leipa ei chi ta;

⁴³ khichhaipa châ na ta, na patlôsa leipa ei chi ta; thluahruapa ta y na ta, chysia na pie leipa ei chi ta; tlâh leipa nata patâhna o liata ei y nota, na tly veih ei chi,’ a tah aw ei.

⁴⁴ Âmo ta a chhy aw ei ta, a hnohta, ‘Abeipa, khati ta ma nodipa ta tlyma, dâhphipa ta tlyma, khichhaipa ta tlyma, tlâh leipa ta tlyma, patâhna o liata tlyma cha hmô pi ta, eima cha chakao vei?’ ama tah aw.

⁴⁵ Ano ta a chhy aw ei ta, ama hnohta, ‘Hmeiseihta ta ei cha chho ei, he chyhsa chyh chaipazy hryta pakha chô liata nama tao leipa cha, ei chô liata a tao leipa nama châ,’ a tah aw ei.

⁴⁶ Chazy cha chhâzaw hriena lâ sie aw ei ta, mosiapazy deikua cha, chhâzaw hrona lâ ama sie aw,” tah ta.