MATHAI 24 - Mara Bible RV (BSI)

Zisu ta Achhyna o rao nawpa kyh a reih chhielie

¹ Zisu cha Achhyna o tawhta pua ta, a sie chy ta, Achhyna o sanazie ano chho awpa ta a pachupazy a vy ei ta.

² Âmo cha a chhy ta, “He zydua he nama hmô ma? Hmeiseihta ta ei cha chho ei, he liata alô pachopazy he lô kha hmah pahlôh leipa ta pacho pathlah khaipa a châ aw,” tah ta.

Daihti chhâna ngianazy

³ Zisu Ôli tlâh liata â tyu thlâh ha nota, pachupazy âmo dei ta ano lâ a vy ei ta, “Miah chho teh, he hmozy he khati ta ma vaw tlô aw ta, nâ vy heihna nata daihti chhâna cha khati ta a châ aw?” tah ei ta.

⁴ Zisu ta âmo cha a chhy ta, “Ahy hmahta ama cha dôvei lei nawpa ta a vaih teh u.

⁵ Chyhsa hluhpi ei moh ta a vy aw ei ta, ‘Mesia ei châ,’ tahpa ta, chyhsa hluhpi ama dôvei aw.

⁶ Adyuhnazy nata adyuhna bie pathâhpazy nama thei aw. Châhrasala thlazohpa ta y khah u. Cha zydua cha a vaw y awpa châ ta, chhâna deikua châ mâh aw vei.

⁷ Phopi nata phopi a dyuh aw ei ta, khinarâh nata khinarâh amâ dyuh aw. Su hluhpi liata chakâhnazy tlô aw ta, alozy â sih aw.

⁸ Cha zydua cha sawzeih pasa athaona deita a châ.

⁹ “Riethei tao awpa ta cha patusa aw ei ta, cha thie aw ei ta, ei moh vâta phopi zydua ta ama châ hao aw.

¹⁰ Chavâta chyhsa hluhpi amâ ngiapâna pahlei aw ei ta, âmo nata âmo a patusa aw ei ta, amâ hao raihrie aw.

¹¹ Hrohso pakheipa hluhpi vaw pua aw ei ta, chyhsa hluhpi ama dôvei aw.

¹² Moleina papôhsapa a châ awpa vâta, chyhsa hluhpi kyhpachâna a dia aw.

¹³ Achhâna taihta a tao hualuapa cha pachhapa ta a y aw.

¹⁴ He khinarâh thâtihpha he phopi to pahno awpa ta khizaw zydua liata chhopa châ aw ta, cha khai tawhta chhâna cha a vaw tlô aw.

Roryhrana patlôsatuh pasichhihpa

¹⁵ “Chatawhcha hrohsopa Dâniah reipa, roryhrana patlôsatuh pasichhihpa kha, su pathaihpa liata â duapa nama hmô aw. He bie a reihtuhpa ta a yzie pahno mawh sy.

¹⁶ Cha tina cha, Zudia râh liata a ypazy cha tlâhzy lâta a râ mawh ei sy.

¹⁷ O chô liata a ypa ta o chhôh liata hmo la awpa ta chô leipa sala,

¹⁸ lyu liata a ypa ta a poh la awpa ta kua heih khah sy.

¹⁹ Cha nohzy liata chanô sawphaohpa nata hawsaih a pyh haipazy hupo awpa rimâ cha!

²⁰ Namâ râ nawpa daihti cha chasipaw nota tlyma, pahânoh ta tlyma, a vaw tlô lei nawpa ta thlahchhâ teh u.

²¹ Cha daihti liata, riethei pasataona rarôh y ngaitapa y aw ta, cha hawhpa cha leilô pi daihti tawhta tahmâ taihta y beih leipa ta, khati ta hmahta y heih khao aw vei.

²² Cha nohzy cha pachyusapa châ leipa sala, chyhsa ahy hmah a hrohpa y aw veih ei. Châhrasala atlyhpazy vâta, cha noh cha pachyusapa a châ aw.

²³ “Chyhsa ta nama hnohta, ‘Moh teh u, Mesia cha he liata a y!’ a tah khiahta tlyma, ‘Hao liata a y!’ a tah khiahta tlyma, zo khuh vy.

²⁴ Mesia pakheipazy nata hrohso pakheipazy vaw pua aw ei ta, ngiana nata hmonoâh rônahpazy ama tao aw. Tao theipa châ sala, atlyhpazy taih ama dôvei aw.

²⁵ Nathlie teh u, ei cha chho chhielie ei hih.

²⁶ Chyhsazy ta nama hnohta, ‘Moh teh u, ano cha râhchawhpa liata a y,’ ama cha tah khiahta cha, pua leipa u la; ‘Chhôhpadâhpa chhôh chaipazy liata a y,’ ama cha tahpa chhao ta, zo hra khuh vy.

²⁷ Nochhi lâ tawhta dôhla vaw pathlie ta, notla lâ taihta a khaihpa hawhta, Chyhsa Sawchapawpa a vy heihna cha a châ aw.

²⁸ Sawhsawpa yna liata vâkhiehzy amâ hmaoh tyh.

Chyhsa Sawchapawpa avyna

²⁹ “Cha nohzy liata rietheipasana a y khaipata nahta, noh pazohsapa châ aw ta, thlâpâ khaih khao leipa aw ta, avâ tawhta awhsizy tla aw ta, avâ hmotaotheinazy cha chalyupa ta a y aw.

³⁰ Chatawhcha Chyhsa Sawchapawpa ngiana avâ liata a vaw lâ aw ta, alei liata chi to mâchhiesapa ta y aw ei ta, Chyhsa Sawchapawpa cha hmotaotheina nata rônah ngaitapa ta vâ meihdo chô liata â zupa ama hmô aw.

³¹ Chiahmie paro ngaitapa chhaota a vâlyuhchâpazy tuah aw ta, âmo chata â tlyhpazy cha kaokih miapalih tawhta pakhy aw ei ta, avâ chy chhâna tawhta hiakha lâ chhâna taihta ama pakhy aw.

Theiku kô tawhta achupa

³² “Theiku kô tawhta a chu teh u. A chhyh panyupa kaw paka ta, a hna a vaw thao khiahta cha, nopi â hnia haw tahpa nama pahno tyh.

³³ Cha hawhna hra chata, cha hmo zydua cha nama hmô tita, Chyhsa Sawchapawpa cha a vaw hnia ha ta, chhikao thaby liata a y tahpa pahno teh u.

³⁴ Hmeiseihta ta ei cha chho ei, cha zydua a tlô paki khai hlâlei cha, he chhâ he lei aw vei.

³⁵ Lei nata vâ a lei aw, ei biezy deikua lei aw vei.

 vy nawpa daihti pahnopa châ vei

³⁶ “Châhrasala cha noh nata dawh cha, Paw dei leipa ta cha ahy hmahta pahno veih ei. Vârâh liata vâlyuhchâpazy chhao ta pahno leipa ei ta, Sawchapawpa chhao ta pahno vei.

³⁷ Chyhsa Sawchapawpa a vy heihna cha, Nôah hro nota yzie hawhna khata a châ aw.

³⁸ Cha nohzy liata, tipaua vaw tlô hlâ, Nôah balyh liata â ngiana noh taihta niedopa ta y ei ta, nôpi nôvahzy amâ pakia.

³⁹ Tipaua vaw tlô ta, ama zydua ta a pahlei khai hlâlei cha, khâpa hmah ama pahno leipa hawhna khata, Chyhsa Sawchapawpa avyheihna cha a châ aw.

⁴⁰ Lyu liata chyhsa pano y aw ei ta, pakha lapa châ aw ta, pakha siesaipa a châ aw.

⁴¹ Chanô pano ta sâh daih aw ei ta, pakha lapa châ aw ta, pakha siesaipa a châ aw.

⁴² Khâpa nota ma nama Beipa cha â vy aw tahpa nama pahno leipa vâta, a hrohruapa ta y teh u.

⁴³ Châhrasala he he pahno teh u: Kheihawhpa zâ daihti liata ma parutuhpa â vy aw tahpa o hneituhpa ta pahno ha sala cha, a hrapa ta vaih aw ta, a o pangiasa aw vei.

⁴⁴ Chavâta nâmo chhao a mâ chiehpa ta y teh u, nama pangiasa leina daihti liata Chyhsa Sawchapawpa cha a vy tlôh aw ta.

Sei ngâchhihpa nata ngâchhih leipa

⁴⁵ “Cha khiahta la chakaotuhpa ngâchhihpa nata sopa, a zibeipa ta a o liata hyutuhpa ta a raopa, ama nie awpa a daihtita liata a pie lymâ tyh awpa cha ahy ma a châ tly?

⁴⁶ A zibeipa â vy tita, rai hria haipa ta a hmôpa chakaotuhpa cha a nohlao kaw aw dia.

⁴⁷ Hmeiseihta ta ei cha chho ei, cha chakaotuhpa cha a hneipa zydua chô liata hyutuhpa ta a tao aw.

⁴⁸ Chakaotuhpa moleipa deikua cha, a palôh liata, ‘Ei zibeipa cha charâ ta a vy bao aw vei,’ tahpa ta,

⁴⁹ a chakaolâhpazy tu sala, sahma paripazy hnohta niedopa ta a y khiahta cha,

⁵⁰ cha chakaotuhpa zibeipa cha, a mokhâh leina noh nata a pahno leipa dawh liata a vy aw ta,

⁵¹ chakaotuhpa cha hriechheih aw ta, phapakheipazy to awpa a patosa aw. Cha liata chana nata hâh chariehna a y aw.