MATHAI 23 - Mara Bible RV (BSI)

Phârisaihzy nata ryhpa pachutuhpazy châta hupona miasari

¹ Zisu ta zawpizy nata a pachupazy hnohta bie reih ta,

² “Ryhpa pachutuhpazy nata Phârisaihzy cha Mawsi dyuchhai liata a tyuhpa ama châ.

³ Chavâta ama cha chhopa maih cha tao u la, zyh lymâ teh u. Ama hmotaopa hawhta deikua tao hra khuh vy. Pachu ei ta, châhrasala hrokhei hlei veih ei.

⁴ Phaohri ngaitapa tao ei ta, chyhsa ngiatlâh liata ama pahnieh tyh. Âmo deikua ta cha, ama ku paro ta chhao pasie khoh veih ei.

⁵ Ama hmotaopa zydua chyhsa hmô awpa ta ama tao tyh. Ama ku liata amâ kypa nata ama khiriena zy paphia ei ta, ama poh pai pasisa ei ta,

⁶ kyhchhina liata su pha chaipazy, pakhyna o liata atyuna pha chaipazy,

⁷ sôdaohna su liata anaohna nata chyhsa ta pachutuhpa ama tahpa zy ama pasô ngaita.

⁸ Nâmo deikua la, pachutuhpa tahpa ta bi awpa châ veih ei chi. Pachutuhpa cha pakha deita nama hnei. Nama zydua ta unawh sai nama châ.

⁹ Alei chô liana heta ahy hmah nama paw ta aw hra khah u. Paw cha vârâh liata a ypa pakha deita nama hnei.

¹⁰ Chhituhpa tahpa ta awpa châ hra aw veih ei chi. Chhituhpa cha pakha deita nama hnei. Krista cha nâmo chhituhpa a châ.

¹¹ Nama hry liata rônah chaipa cha, nâmo châ chakaotuhpa ta a y awpa a châ.

¹² Ahy rai a pasâhsapa maih panawhpa châ aw ei ta, a panawhpa maih palyupalihpa ama châ aw.

¹³ “Nâmo, ryhpa pachutuhpa nata Phârisaih phapakheipazy saih u, nama hu a po na! Chyhsazy châta vârâh khinarâh khaw ei chi ta, nâmo hra a ngia tlôh leipa ei chi ta, chyhsazy a ngia awpa pasai pyly veih ei chi.

¹⁴ “Nâmo, ryhpa pachutuhpa nata Phârisaih phapakheipazy saih u, nama hu a po na! Nôhmeizy o nie khai ei chi ta, a pakheipa ta a pasi pi thlah nama chhâ tyh. Chavâta thailei pachâsa via pachaipa nama châ aw.

¹⁵ “Nâmo, Ryhpa pachutuhpa nata Phârisaih phapakheipazy saih u, nama hu a po na! Ngiapâtuhpa pakha tao awpa ta, tilaipi nata tlâh padôpa ta sie ei chi ta, ngiapâtuhpa a vaw châpa nahta, ano cha nâmo topa lie no ta hriena su a to awpa saw ta nama tao tyh.

¹⁶ “‘Chyhsa ta Achhyna o reipa ta bie â taih khiahta cha, a bietai ta chahry leipa ta, chyhsa ta Achhyna o liata ngôh reipa ta bie â taih khiahta deikua cha, a bietai ta a chahry,’ a tahtuhpa nâmo, chhituhpa mochaopazy saih u, nama hu a po na!

¹⁷ Nâmo, ahrupa mochaopazy saih u, kheihawhpa ma a rônah via? Ngôh ma, ngôh a pathaisatuhpa Achhyna o maw?

¹⁸ ‘Chyhsa ta maisâh reipa ta bie â taih khiahta cha, a bietai ta chahry vei, chyhsa ta maisâh chô liata hmopiepa reipa ta bie â taih khiahta deikua cha, a bietai ta a chahry,’ nama tah heih.

¹⁹ Nâmo, mochaopazy saih u, kheihawhpa ma a rônah via? Hmopiepa ma, hmopiepa a pathaisatuhpa maisâh maw?

²⁰ Ahy rai maisâh reipa ta bie â taihpa cha, maisâh nata a chô liata a ypa zydua reipa ta bie â taihpa a châ.

²¹ Ahy rai Achhyna o reipa ta bie â taihpa cha, Achhyna o nata cha liata a pahrâpa reipa ta bie â taihpa a châ.

²² Ahy rai vârâh reipa ta bie â taihpa cha, Khazohpa beidyuchhai nata a chô liata a tyuhpa reipa ta bie â taihpa a châ.

²³ “Nâmo, ryhpa pachutuhpa nata Phârisaih phapakheipazy saih u, nama hu a po na! Pudinâzy, sysadizy, sykathuzy su hrawh su kha pie ei chi ta, Ryhpa peimawh viapa ryureina siapa, ngiachhiena nata ngâchhihna zy uasa veih ei chi. Ahropazy tao pâna chôta, chazy cha nama tao awpa a châ.

²⁴ Nâmo, chhituhpa mochaopazy saih u, thlohmiazy a thli ei chi ta, râraoseihpa a palâ tyhpa tlao nama châ he!

²⁵ “Nâmo, ryhpa pachutuhpa nata Phârisaih phapakheipazy saih u, nama hu a po na! Nyu nata beikoh zy a chô lâ pasi ei chi ta, a chhôh lâ deikua cha, karâhneina nata asohsi thei leina ta a bie.

²⁶ Nâ, Phârisaih mochaopa, nyu nata beikoh zy kha a chhôh lâ pasi ha tua mah y. Chatanachata a chô lâ chhao a pathaih thei aw.

²⁷ “Nâmo, ryhpa pachutuhpa nata Phârisaih phapakheipazy saih u, nama hu a po na! Hlyu râhpa hniapa thlâ, a chô lâ a ngia ngaitapa ta a lâ ta, a chhôh lâ deikua cha athipa rureih nata pathaih leipa to ta a biepa nata namâ lyu.

²⁸ Khôtho lâ chyhsa mohmô liata a sia ngaitapa ta a lâ ei chi ta, nama chhôh lâ deikua cha, phapakheina nata Ryhpa papeisa leina ta a bie.

²⁹ “Nâmo, Ryhpa pachutuhpa nata Phârisaih phapakheipazy saih u, nama hu a po na! Hrohsopazy thlâ o sapa ta, chyhsa siapa thlâzy tobi ei chi ta,

³⁰ ‘Miah pathlatuhpazy chhâ liana kha a vaw y hrapa châ sih la, hrohsopazy thisaih palona liana kha a hlao hra aw ma pi,’ nama tah.

³¹ Cha bie chata hrohsopazy a thietuhpa sawzy nama châ tahpa nâmosasyh ta thailei namâ pachâsa.

³² Châ pathlatuhpazy taopa kha tlao patlô lâlao teh u.

³³ Nâmo, parihzy saih u, nâmo, vâzi pathlazy saih u, hrienasu lâ sie awpa ta pachiana cha kheihta ma nama khôkhâh thei aw?

³⁴ Chavâta hrohsopazy, chyhsa sopazy nata ryhpa pachutuhpazy ei cha vaw tuapa ei. Thokha thie aw ei chi ta, thokha nama khaipâ aw. Thokha cha namâ pakhyna ozy liata chhei aw ei chi ta, khi kha tawhta khi hro lâta nama taola laih lymâ aw.

³⁵ Chatanachata chyhsa siapa Abela thisaih tawhta supathaihpa nata maisâh likawh ta nama thiepa Berakia sawchapawpa Zekaria thisaih taih ta, alei chô liata chyhsa siapa thisaih palopa zydua thisaih maoh cha nama chô liata a vaw tlô aw.

³⁶ Hmeiseihta ta ei cha chho ei, he zydua he, he chhâ chô liata a vaw tlô aw.

Zerusale chakheina

³⁷ “Hy Zerusale, Zerusale, hrohsopazy thie chi ta, nâ lâta tuapazy alô ta a vawhsaotuhpa khihpi! Awhpanô ta a tachhihzy a mathlaw ry liata a pahmaohpa hawhta, na sawzy pahmaoh a chhuah tyh na ta, châhrasala khoh va chi!

³⁸ Moh tua u, nama o cha roryhrapa ta siesaipa a châ ha hih.

³⁹ Ei cha chho ei, ‘Abeipa moh ta a vypa cha reithaipa ta y mawh sy,’ nama tah hlâlei cha, tahmâ tawhta na hmô khao aw veih ei chi,” tah ta.