MATHAI 22 - Mara Bible RV (BSI)

Ahneina kyhchhi pakhona

¹ Zisu ta pakhona bie hmâpa ta ama hnohta bie reih heih ta.

² “Vârâh khinarâh cha abei ta a sawchapawpa châta ahneina kyhchhi a taopa nata pakho theipa a châ.

³ Kyhchhi pati nie awpa ta a hruapazy aw awpa ta a chakaotuhpazy tuah ta, châhrasala a vy khoh tlâ leipa ei ta.

⁴ Chakaotuhpa hropazy tuah heih ta, ama hnohta, ‘Hruapazy hnohta kei chho u la, “Kyhchhi cha â mâ haw, ei viahchao tôhpazy nata ei sahroh thawhpazy thie na ta, ato â mâ haw, kialao nie awpa ta a vy teh u,” tahpa ta kei chho teh u,’ tah ta.

⁵ Châhrasala vaw uasa leipa ei ta, tlao sie ha ei ta, pakha a lyu lâ sie ta, ahropa a sôdaohna lâ sie ta.

⁶ Chyhsa hropazy ta a chakaotuhpazy cha vaw patu ei ta, noza chhih ngaitapa ta taopa ta, thie ei ta.

⁷ Abei cha a hiehâh ngaita ta, a pheisaihzy tuah ta, cha liany cheituhpazy cha pahleipadia ei ta, ama khih chhao rao ei ta.

⁸ Chatawhcha a chakaotuhpazy hnohta, ‘Kialao â mâ haw, hruapazy deikua cha a nie tlâh châ veih ei.

⁹ Chavâta lâlaizy lâta pua u la, nama hmôpa maih kialao nie awpa ta kei hrua teh u,’ tah ta.

¹⁰ Chakaotuhpazy cha lâlaizy lâta pua ei ta, ama hmôpa maih, chyhsa chhiepa chhao, chyhsa phapa chhao pakhy ei ta, ahneina o cha kyhchhi a hlaopazy ta bie ha ei ta.

¹¹ “Abei cha kyhchhi a hlaopazy moh awpa ta a vaw ngia ta, cha liata chyhsa pakha ahneina chysia a tobi leipa hmô ta,

¹² a hnohta, ‘Viasa, kheihtazieta ahneina chysia a tobi leipa ta he liata nâ vaw ngia thlâh haw?’ tah ta. Cha chyhsa cha a thlih thlâh ha ta.

¹³ Abei ta a chakaotuhpazy hnohta, ‘A ku nata phei chahry u la, khôtho lâ zohna liata thy teh u. Cha liata chana nata hâh chariehna a y aw,’ tah ta.

¹⁴ Hruapazy hluh kaw ei ta, atlyhpazy deikua ama chyhta,” tah ta.

Kaisarâ hnohta chhie piena

¹⁵ Phârisaihzy cha pua ei ta, a bie reipa liata ama paao thei nawpa ta a byh ei ta.

¹⁶ Ama pachupazy nata Herawda py liata chyhsazy ano lâ tuah ei ta, âmo ta a hnohta, “Pachutuhpa, chyhsa dopa na châpa pahno pi ta, Khazohpa lâpi â dopa ta pachu chi ta, chyhsa pachâna la hlei leipa chi ta, chyhsa pôraoh nata hmisâ zy moh va chi tahpa eima pahno.

¹⁷ Kheihta na pachâ, miah chho teh, Kaisarâ lâ chhie piepa he ryhpa ta a pasaih ma, pasaih vei?” tah ei ta.

¹⁸ Zisu ta amâ chhuahpa pha leipa pahnopa ta, ama hnohta, “Nâmo, phapakheipazy saih u, khazia eina pasia ei chi?

¹⁹ Chhie châta chei awpa tâkâ cha na vaw pahmô teh u,” tah ta. Dinâri miakha ano lâ vaw cheih ei ta.

²⁰ Zisu ta ama hnohta, “He he ahy nothlahpa nata moh ma a châ?” tah ta.

²¹ Âmo ta, “Kaisarâ nothlahpa,” tah ei ta. Zisu ta ama hnohta, “Kaisarâ hmozy cha Kaisarâ pie u la, Khazohpa hmozy cha Khazohpa pie teh u,” tah ta.

²² Cha bie cha ama thei nahta, ama noâh ngaita ta, ano cha puasaipa ta sie ha ei ta.

Thyuheihna kyh ama hiahri

²³ Cha noh liata, thyuheihna y vei a tahpa Saduasizy ano lâ a vy ei ta,

²⁴ a hnohta, “Pachutuhpa, Mawsi ta, ‘Chyhsa ta saw hnei leipa ta thi sala, a unawhpa ta a lapinô cha hnei aw ta, a unawhpa châta chi a pathla awpa a châ,’ tah ta.

²⁵ Eima hry liata unawh pasari y ei ta, a uhthei chaipa ta lapinô hnei ta, thi ha ta, chipathla a hnei leipa vâta, a lapinô cha a unawhpa to awpa ta y ta.

²⁶ A panona nata a pathôhna chhao ta saw hnei leipa ta thi ha hra ei ta, a pasarina taihta cha hawhta châ ta.

²⁷ Ama zydua ta ama thi khai nahta, chanô chhao cha thi ha hra ta.

²⁸ Thyuheihna liata unawh pasarizy hry liana chata ahy lapinô ma a châ aw? Ama zydua ta ama lapinô ta hnei ha tlôh ei ta,” tah ei ta.

²⁹ Zisu ta âmo cha a chhy ta, “Biehrai nata Khazohpa hmotaotheina nama pahno leipa vâta nama pachâpasipa a châ.

³⁰ Thyuheihna liata cha, nôvah ahneina y aw vei, vârâh liata vâlyuhchâpazy hawhta ama y khai aw.

³¹ Athihpa thyuheihna kyh liata Khazohpa ta nama hnohta,

³² ‘Kei he Abarahâ Khazohpa, Aisika Khazohpa nata Zakaw Khazohpa ei châ,’ tahpa ta a reipa kha reih beih veih ei chi ma? Khazohpa cha athipa Khazohpa châ vei, ahrohpa Khazohpa a châ,” tah ta.

³³ Zawpizy ta cha bie cha ama thei nahta, a bie pachupa cha noâh tah ngaita ei ta.

Biepiepa rônah chaipa

³⁴ Zisu ta Saduasizy a padei hapa kyh Phârisaihzy ta ama thei nahta, a hmaohpakhy ei ta.

³⁵ Ama hry liata dâhthaipa pakha ta ano pasia nawpa ta bie miakha hiahri ta.

³⁶ “Pachutuhpa, Ryhpa liana heta kheihawhpa biepiepa he ma a rônah chai?” tah ta.

³⁷ Zisu ta a hnohta, “Abeipa na Khazohpa cha na pathipalôh tlokhuh ta, na thlahpa tlokhuh ta nata na pachâna tlokhuh ta kyh na pachâ awpa a châ.

³⁸ He he biepie rônahpa nata hmiatua chaipa a châ.

³⁹ A mianona cha he he a châ: Nâma kyh nâ pachâpa hawhta na vaih kyh na pachâ awpa a châ.

⁴⁰ He biepiepa miano liana heta Ryhpa bie nata hrohsopa bie zydua â pahnieh khai,” tah ta.

Krista paw kyh hiahrina

⁴¹ Phârisaihzy amâ hmaohpakhy nona chata, Zisu ta âmo cha bie hiahri ta,

⁴² “Mesia cha kheihta nama pachâ? Ahy sawchapawpa ma a châ?” tah ta. Âmo ta a hnohta, “Dâvi Sawchapawpa,” tah ei ta.

⁴³ Zisu ta ama hnohta, “Cha khiah, kheihtazie ta Dâvi kha Thlahpa ta pareisapa ta, ano cha Abeipa a tah tly? Dâvi ta,

⁴⁴ “‘Abeipa ta ei Beipa hnohta, “Na chariahzy na phei ry liata ei soh khai hlâlei cha, Ei chachâh lâta a tyuh mah y,”’ a tahpa kha.

⁴⁵ Dâvi ta ano cha Abeipa a tah tlôh khiahta cha, kheihta ma a sawchapawpa a châ thei aw?” tah ta.

⁴⁶ Ahy hmahta kawh kha chhao a chhy thei leipa ei ta, cha noh tawhta cha, bie hropazy chhao a hiahri ngâhpa y khao veih ei.