MATHAI 21 - Mara Bible RV (BSI)

Bei hawhta Zerusale angiana

¹ Zerusale amâ hnia nahta, Ôli tlâh liata Bethaphâ khih lâ vawh ei ta. Zisu ta pachupa pano tuah ta,

² ama hnohta, “Nama hmia lâta khih lâ hao vawh u la, alâ buhpa, a taw chhaopa hmô aw ei chi ta, pathlâ u la, kei lâ a vaw chhi muh vy.

³ Kheih hawhpa bie rai nama hnohta a reihpa ama y khiahta cha, ‘Abeipa ta a khoh,’ tah aw ei chi ta, alâzy cha thlai a cha pie aw ei,” tah ta.

⁴ Cha hmo cha hrohsopa ta,

⁵ “Zaio sawchanô hnohta chho teh u, ‘Moh teh, na beipa cha nâ lâta â vy hai; Areisipa châ ta, Alâ kiah ta, Alâ taw kiahpa ta â vy huh,’” tahpa ta a reipa kha a vaw tlô thei nawpa ta a châ.

⁶ Pachupazy cha vawh ei ta, Zisu ta a chhopa hawhta tao ei ta.

⁷ Alâ nata a taw cha a vaw chhi ei ta, ama pohzy ta a ky padia ei ta, Zisu ta alâ cha kiah ta.

⁸ Zawpi hluhpi ta lâpi liata ama pohzy phaw ei ta, ahropazy ta thobuhzy chhawhpa ta lâpi liata phaw hra ei ta.

⁹ A hmia lâta a siepa nata a hnôh lâta a pazipa zawpizy ta, “Dâvi Sawchapawpa hnohta Haozanâ! Abeipa moh ta a vypa cha reithaipa ta y mawh sy! Chônôchaipa liata Haozanâ y mawh sy!” tahpa ta awh ei ta.

¹⁰ Zerusale â ngia nahta, a thâtih ta khihpi zydua chalyu ta, “He chyhsa he ahy ma a châ tly?” tah ei ta.

¹¹ Zawpizy ta, “He he hrohsopa Zisu, Kâlili râh Nâzari khihpa a châ,” tah ei ta.

Achhyna o a pathai

¹² Zisu cha Achhyna o liata a ngia ta, cha liata hmo a zuahpa nata a chaleipa zydua papua ta, tâkâ rituhpazy tlâhkhai nata pivaw zuahtuhpazy dyuchhai chati pathlah ta.

¹³ Ama hnohta, “‘Ei o cha thlahchhâna o tahpa a châ aw’ tahpa ta ropa châ ta, nâmo deikua ta parutuhpazy lôpu ta nama tao haw,” tah ta.

¹⁴ Achhyna o liana chata mochaopazy nata pheisypazy ano lâ a vy ei ta, âmo cha patlâh ta.

¹⁵ Hmonoâhpa a taopazy nata hawtipazy ta Achhyna o liata, “Dâvi Sawchapawpa hnohta Haozanâ!” tahpa ta ama awhpa cha, theihthai beizy nata Ryhpa pachutuhpazy taama hmô nahta, ama palôh châ lei kaw ta,

¹⁶ a hnohta, “He sahlaozy biereipa he na thei ma?” tah ei ta. Zisu ta ama hnohta, “Ei thei mâh tâh; “‘Hawsaihzy nata sâhpi pazy haipazy pakah tawhta, Reithaina nâ chhuahdy haw,’ tahpa bie reih beih veih ei chi ma?” tah ta.

¹⁷ Âmo cha siesai ta, khihpi tawhta Bethâni lâ sie ta, cha liata a rie ta.

Theiku kô chhie a sapa

¹⁸ A mylâ mydi ta khihpi lâ â liena lâpi liata, Zisu cha a nodi kaw ta.

¹⁹ Lâpi kiah liata theiku kô hmô ta, kei pangai ta, a hna dei leipa ta cha khâpa hmah hmô leipa ta. Theiku kô hnohta, “Chhâzaw ta pathei khao khah y,” tah ta. Theiku kô cha thlai uah pâ ha ta.

²⁰ Cha hmo cha pachupazy ta ama hmô nahta, ama noâh ngaita ta, “Kheihtazie ta ma theiku kô he thlai a uah thlâh ha tly?” tah ei ta.

²¹ Zisu ta a chhy ta, “Hmeiseihta ta ei cha chho ei, a lôh leina hnei leipa ta namâ ngiapâ khiahta la, theiku kô chô liata taopa he nama tao thei hrapa dei châ leipa ta, he tlâh hnohna chhao heta, ‘A pasie la, tilaipi liata a thy teh,’ nama tah khiahta cha, nama reipa hawhta a y aw.

²² Namâ ngiapâ khiahta cha, thlahchhâna ta nama hiapa maih nama hmô aw,” tah ta.

Zisu biehneina ama pasia

²³ Zisu cha Achhyna o liata a ngia ta, a pachu hai no ta, theihthai beizy nata khitlâh machâzy ano lâ a vy ei ta, a hnohta, “Khâpa biehneina ta ma he hmozy he na tao? Ahy ma he biehneina he châ pie?” tah ei ta.

²⁴ Zisu ta âmo cha a chhy ta, “Kei chhao ta hmo miakha ei cha hiahri hra aw ei. Cha cha eina chho khiah ei chi ta cha, kei chhao ahy biehneina ta ma he hmozy he ei tao tahpa ei cha chho aw ei.

²⁵ Zawhâna bâtina kha khataih tawhta â vypa ma a châ? Avâ tawhta ma, chyhsapa tawhta maw?” tah ta. A chhohia ei ta, “‘Avâ tawhta,’ tah mawh sih la, ‘Cha khiah, khazia a bie nama zo vei?’ miah tah aw,

²⁶ ‘Chyhsapa tawhta,’ tah mawh sih la, zawpi chi tlôh pi, chyhsa zydua ta Zawhâna kha hrohsopa ta ama pachâ khaipa châ tlôh,” tah ei ta.

²⁷ Zisu cha a chhy ei ta, “Pahno ma pi,” tah ei ta. Zisu ta ama hnohta, “Kei chhao ahy biehneina ta ma, he hmozy he ei tao tahpa cha chho hra aw veih ei na,” tah ta.

Sawchapawpa pano pakhona

²⁸ “Cha khiahta la kheihta ma nama pachâ? Chyhsa pakha ta sawchapawpa pano hnei ta. Pakha lâ vawh ta, a hnohta, ‘Ei sawchapawpa, sie la tanoh kre sadô liata rai kei hria mah y,’ tah ta.

²⁹ Chyhsa chata a chhy ta, ‘Sie aw va na,’ tah ta. Châhrasala taviapa ta a palôh a vaw nano ta, sie ha ta.

³⁰ Sawchapaw hropa lâ vawh ta, a hmiatuapa hnohta a chhopa hawhna khata kei chho ta. Ano ta a paw hnohta, ‘Y, ei zibeipa, ei sie aw,’ tah ta, châhrasala sie tlôh leipa ta.

³¹ Cha pano liata ahy ma a paw khopa a tao?” tah ta. Âmo ta, “A hmiatuapa,” tah ei ta. Zisu ta ama hnohta, “Hmeiseihta ta ei cha chho ei, chhiekheituhpazy nata âzuahnôzy ta Khazohpa khinarâh ama châ ngia khâh aw.

³² Zawhâna kha siana lâpi a chhihpa ta nâmo lâ a vy ta, châhrasala zo veih ei chi. Chhiekheituhpazy nata âzuahnôzy deikua ta la ama zo. Nâmo la siana lâpi nama hmôpa chhao ta, ro khoh leipa ei chi ta, zo khoh veih ei chi.

Lyu vaituhpazy pakhona

³³ “Pakhona bie hropa nathlie teh u. Lyu a hneipa chyhsa pakha y ta, kre sadô tao ta, diahpai ta dôh ta, kre saohna khaoh chao ta, o sâhpa sa ta, a kre sadô cha lyutaopazy hnohta thlyu hlao awpa ta pie ta, râh hro lâ sie ha ta.

³⁴ A thei lyu daihti â daih nahta, ano tovyuh la awpa ta thlyuhlaotuhpazy lâ a chakaotuhpazy tuah ta.

³⁵ Thlyuhlaotuhpazy ta a chakaotuhpazy cha vaw patu ei ta, pakha tu ei ta, pakha thie ei ta, pakha alô ta vawh ei ta.

³⁶ A hmiatuapa hlâta hluh viapa ta chakaotuhpa hropazy tuah heih ta. Âmo chhao cha hmiatuapazy ama taopa hawhna khata vaw tao heih ei ta.

³⁷ A chhâna ta, ‘Ei sawchapawpa he cha ama za aw,’ tahpa ta a sawchapawpa cha âmo lâ tuah ta.

³⁸ Châhrasala thlyuhlaotuhpazy ta a sawchapawpa ama hmô nahta, a chhohia ei ta, ‘He chyhsa he ryutotuhpa a châ hih, a vy teh u, thie sih la, a ryu a la ei suh u,’ tah ei ta.

³⁹ A sawchapawpa cha patu ei ta, kre sadô tawhta papua ei ta, ama thie haw.

⁴⁰ Kre sadô hneituhpa â vy tita, thlyuhlaotuhpazy cha kheihta a tao aw ei?” tah ta.

⁴¹ Âmo ta a hnohta, “Cha moleipazy cha ama rie patheisapa ta thie aw ta, kre sadô cha, a thei â daihna maihta, ano tovyuh a pie lymâ awpa thlyuhlaotuh hropazy hnohta a pie aw ei,” tah ei ta.

⁴² Zisu ta ama hnohta, “Biehrai liata, “‘O satuhpazy alô kho leipa cha, A ki lô a vaw châ haw; Cha cha Abeipa taopa châ ta, Eima mo liata â ngia ngaita,’ tahpa bie reih beih veih ei chi ma?

⁴³ “Chavâta ei cha chho ei, Khazohpa khinarâh cha nâmo tawhta lapa châ aw ta, a pathei awpa phopi hnohta piepa a châ aw.

⁴⁴ Ahy rai cha alô chô liata a paopa cha keichheih aw ta, alô ta a vipa cha a pazao khai aw,” tah ta.

⁴⁵ Theihthai beizy nata Ryhpa pachutuhpazy ta pakhona bie a reipazy cha ama thei nahta, âmo thâtih a reih tahpa pahno ei ta.

⁴⁶ Zisu cha patu a chhuah ei ta, châhrasala zawpi pachâ ta hrohsopa hawhta ama hmôpa vâta, zawpi chipa ta patu ngâh leipa ei ta.