MATHAI 20 - Mara Bible RV (BSI)

Kre sadô liata hriatuhpazy

¹ “Vârâh khinarâh cha, lyu hneituhpa ta mydi ta pua ta, a kre sadô liata a hria awpa hriatuhpazy a tluapa hawhta a châ.

² Noh kha ta dinâri miakha hlao awpa ta, hriatuhpazy nata amâ paryh khai tawhta, âmo cha kre sadô lâ pasiesa ta.

³ Dawh chakipa liata pua heih ta, sôdaohna su liata a y chakhyh thlâh hapazy hmô ta,

⁴ ama hnohta, ‘Nâmo chhao kre sadô lâ sie hra teh u, â phuhpa ta hria hlao ei cha pie aw ei,’ tah ta.

⁵ Chatanachata sie ei ta. Dawh hrawh hleinopa nata dawh thôhpa liata pua heih ta, a tao tuapa hawhna khata tao heih ta.

⁶ Zâlâ dawh pangawhpa liata pua heih ta, chyhsa a y chakhyhpazy hmô heih ta, ama hnohta, ‘Khazia he liata noh y ta nama y chakhyh thlâh haw?’ tah ta.

⁷ Âmo ta a hnohta, ‘Ahy hmahta rai hria awpa miah ama pie leipa vâta a châ,’ tah ei ta. Ano ta ama hnohta, ‘Nâmo chhao kre sadô lâ sie hra teh u,’ tah ta.

⁸ A vaw zâlâ nahta, kre sadô hneituhpa ta raihria mohôhtuhpa hnohta, ‘Hriatuhpazy aw la, ama hria hlao pie teh, a hnôh chaipa tawhta a thaopa ta a hmiatua chaipa taihta na pie aw ei,’ tah ta.

⁹ Dawh pangawhpa tawhta a pahriasapazy amâ vy nahta, dinâri miakha sai hmô ei ta.

¹⁰ A pahriasa tuachaipazy amâ vy nahta, a hluh via hmô awpa ta a pangiasa ei ta, châhrasala âmo chhao dinâri miakha chyu hmô hra ei ta.

¹¹ Ama hria hlao ama dao nahta, lyu hneituhpa cha paphôh thlu ei ta,

¹² a hnohta, ‘A hnôh chai ta a hriapazy he dawh kha chhôh deita hria ei ta, keimo noh y ta hriapasa ta, nohsa a daohpazy nata kheihtazie ta miah na pakho thlâh haw?’ tah ei ta.

¹³ Ama hry liata pakha hnohta, ‘Viasa, na chô liata khâpa hmah tao chhei va na, dinâri miakha hlao awpa ta eimâ paryhpa kha châ vei ma?

¹⁴ Nâma eih kha la la, sie thlâh ha mah y. Nâma ei cha piepa hawhta, a hnôhchaipa chhao he ei pie khoh.

¹⁵ Kei eih châ ta, kei eih cha ei khozie hawhta tao thei va na ma? Ei riaphapa ma na hiatlia kaw?’ tah ta.

¹⁶ Cha hawhna chata hnôh chaipazy cha hmiatua chaipazy châ aw ei ta, hmiatua chaipazy cha hnôh chaipazy ama châ aw,” tah ta.

A thi nawpa kyh reih chhieliena ei thôhna

¹⁷ Zisu cha Zerusale lâ a khy nota, lâpi liata pachupa pahrawh hleinozy cha anano ta a chhi ta, ama hnohta,

¹⁸ “Pachâ teh u, Zerusale lâ eima khy hai hih. Chyhsa Sawchapawpa he theihthaipa hyutuhpazy nata Ryhpa pachutuhpazy ku liata hlâpa châ aw ta, âmo ta thailei pachâsa aw ei ta, ama thie aw.

¹⁹ Pasipasawh awpa nata chhei awpa nata khaipâ awpa ta Zenitaizy ku liata hlâpa châ aw ta, a noh thôhna noh ta pathyupa ta a y aw,” tah ta.

Châna tlaichhaina

²⁰ Chatawhcha Zebâdi sawchapawzy nô cha, a sawchapawzy chhaota Zisu lâ a vy ta, Zisu cha a naoh ta, khokheina hiah ta.

²¹ Zisu ta a hnohta, “Khâpa na khoh?” tah ta. Ano ta Zisu hnohta, “Ei sawchapaw pano he, na khinarâh liata na chachâh lâ pakha, na chavei lâ pakha amâ tyuh thei nawpa ta biepie mah y,” tah ta.

²² Zisu ta âmo cha a chhy ta, “Nama hiapa pahno veih ei chi. Ei nyu do awpa nama doh thei aw ma?” tah ta. Âmo ta, “Eima doh thei aw,” tah ei ta.

²³ Zisu ta ama hnohta, “Ei nyu cha nama doh thei ngyu aw, châhrasala ei chachâh lâ nata ei chavei lâta a tyuh awpa cha, kei ta ei pie awpa châ leipa ta, ei Paw ta â chhuahdypazy châta a châ,” tah ta.

²⁴ Pahrawhzy ta cha thâtih cha ama thei nahta, unawh panozy chô liata ama palôh châ lei kaw ta.

²⁵ Zisu ta a pachupazy cha aw ta, ama hnohta, “Zenitaizy chô liata ryureituhpazy ta cha, ama chô liata a bei kaw ei ta, ama beimachâzy ta ama chô liata bie ama hnei ngaita tahpa nama pahno.

²⁶ Nâmo hry liata deikua cha, cha hawhta a châ awpa châ vei. Nama hry liata ahy rai chyhsa rônahpa châ a khohpa cha, nâmo châ chakaotuhpa ta a y awpa a châ.

²⁷ Nama hry liata ahy rai hmiatua chaipa châ a khoh khiahta cha, nama sei ta a y awpa a châ.

²⁸ Chyhsa Sawchapawpa tlai chhao he, chyhsa ta ama chakaopa châ awpa ta a zupa châ leipa ta, chakaotuhpa châ awpa nata chyhsa hluhpi chatlai nawpa ta a hrona pie awpa ta a zupa a châ,” tah ta.

Mochaopa pano mopavâna

²⁹ Zerikô tawhta pua ei ta, zawpi hluhpi ta ano cha zi ei ta.

³⁰ Mochaopa pano lâpi kiah liata a tyuh thlâh hapazy ta, Zisu ta a vaw chapia ei tahpa ama pahno nahta, “Abeipa, miah ngiachhie mah y, Hy Dâvi Sawchapawpa!” tahpa ta thata awh ei ta.

³¹ Zawpi ta âmo cha ra ei ta, a chalih awpa ta chho ei ta. Châhrasala, “Abeipa, miah ngiachhie mah y, Hy Dâvi Sawchapawpa!” tahpa ta thata awh via rili ei ta.

³² Zisu cha a duah ta, âmo cha aw ta, ama hnohta, “Khâpa cha taopa awpa ma nama khoh?” tah ta.

³³ Âmo ta a hnohta, “Abeipa, eima mo pavâ awpa eima khoh,” tah ei ta.

³⁴ Zisu ta âmo cha ngiachhie kaw ta. Chatanachata ama mozy cha hria ta, thlai hmô thei ha ei ta, Zisu cha ama zi pâ haw.