MATHAI 2 - Mara Bible RV (BSI)

Nochhi chyhsa sopazy

¹ Herawda â bei nota Zudia râh Bethlehe khih liata Zisu a vaw pi nahta, nochhi chyhsa sopazy Zerusale lâ a vy ei ta,

² “Zuzy bei a pihpa cha khataih liata a y? Nochhi lâta ano awhsi hmô pi ta, ano a naoh awpa ta eimâ vy,” tah ei ta.

³ Cha bie cha Bei Herawda ta a thei nahta, ano nata Zerusale liata chyhsa zydua cha ama nôpo kaw ta.

⁴ Theihthai beichaipazy nata ryhpa pachutuhpa zydua awpakhy ta, Mesia pina awpa cha khataih liata a châ tahpa ta âmo hiahri ta.

⁵ Âmo ta, “Zudia râh Bethlehe liata a châ. Hrohsopa ta,

⁶ “‘Nâ, Bethlehe, Zudâh râh liatapa, Zudâh ryureituhpazy hry liata chyh chai cheita aw va chi; Ei phopi Izarei vaih awpa ta, Na chhôh tawhta ryureituhpa a vaw pua awpa vâta,’ tahpa ta a vaw roh,” tah ei ta.

⁷ Herawda ta chyhsa sopazy cha arulâta aw ta, khatita ma awhsi cha â lâ tahpa âmo hiahri pasia ta.

⁸ Bethlehe khih lâta âmo cha pasiesa ta, “Sie u la, hawsaih cha a phapa ta kei tlua teh u. Nama hmô nahta, a thâtih thlai na vaw chho muh vy. Chatanachata kei chhao sie aw na ta, ei kei naoh hra aw,” tah ta.

⁹ Abei bie cha ama nathlie khai nahta, sie ha ei ta. Nochhi lâta awhsi ama hmôpa kha ama hmia lâta sie lymâ ta, hawsaih yna chô liata â dua hlâlei cha, âmo chhihtha lymâ ta.

¹⁰ Awhsi cha ama hmô nahta, thaphapa ta a ly ngaita ei ta.

¹¹ O chhôh lâ a ngia ei ta, hawsaih cha a nô Mâri hnohta hmô ei ta, a bôhpa ta a naoh ei ta. Ama ryubyhzy pahy ei ta, hmosaipa ngôh, deiryh nata myrâ zy pie ei ta.

¹² Ama mâ lâta Herawda lâ kua lei awpa ta chhopa ama châpa vâta, lâpi hropa lâta ama râh lâ a lie ha ei ta.

Izi râh lâ Zisu amâ râkhei

¹³ Ama sie tawhta, Abeipa vâlyuhchâpa cha Zawsi hnohta a mâ lâta a vaw luah ta, a hnohta, “Thyu la, hawsaih nata a nô kha a chhi la, Izi râh lâ a râ teh. Herawda ta hawsaih kha pahleipadia awpa ta a tlua awpa vâta, ei cha chho heih hlâlei cha, cha liata y thlâh ha mah y,” tah ta.

¹⁴ Zawsi cha thyu ta, hawsaih nata a nô cha a chhi ta, azo ta Izi râh lâ cha sie ta.

¹⁵ Herawdâ a thi hlâlei cha, cha liata y ei ta. Cha hmo cha Abeipa ta hrohsopa pakah ta, “Ei sawchapawpa cha Izi râh tawhta ei aw papua aw,” a tahpa kha a vaw tlô thei nawpa ta a châ.

Herawda ta hawtizy a thie

¹⁶ Herawda cha chyhsa sopazy ta ama dôpa a pahno nahta, a hiehâh ngaita ta, chyhsa tuah ta, chyhsa sopazy tawhta a daihti a pahnopa hawhta, Bethlehe khih nata a chheipâh zydua liata chapaw hawti kô no tawhta a ry lâ zydua cha thie khai awpa ta biepie ta.

¹⁷ Hrohsopa Zeremiah ta,

¹⁸ “Râmâ liata ao theipa châ ta, Chana nata mâchhiesana ao a châ; Râkheli ta a sawzy chakhei ta, Ama y khao leipa vâta, Thlapalôh thei awpa châ vei,” tahpa ta a reipa kha a vaw tlô hapa a châ.

Izi râh tawhta ama vaw kua

¹⁹ Herawda a thi tawhta, Abeipa vâlyuhchâpa ta Izi râh liata Zawsi hnohta a mâ lâta a vaw luah ta,

²⁰ a hnohta, “Thyu la, hawti nata a nô kha a chhi la, Izarei râh lâ sie mah y, hawti hrona la a chhuahpazy kha ama thi haw,” tah ta.

²¹ Chatanachata Zawsi cha thyu ta, hawti nata a nô a chhi ta, Izarei râh lâ sie ta.

²² Châhrasala Akhelâ ta a paw Herawda vyuhpa ta Zudia râh chô liata â bei tahpa a thei nahta, cha lâ sie awpa cha chi ta, a mâ lâta chhopa a châpa hawhta, Kâlili lâ sie ha ta.

²³ Khihpi miakha, Nâzari ama tahpa lâ sie ta, cha liata kei pahrâ ta. Cha hmo cha, “Ano cha Nâzari chyhsa ama tah aw,” tahpa ta hrohsopazy pakah ta ama reipa kha a vaw tlô thei nawpa ta a châ.