MATHAI 19 - Mara Bible RV (BSI)

Nôvah achhaihna kyh Zisu pachuna

¹ Cha biezy cha a rei khai nahta, Zisu cha Kâlili râh tawhta pua ta, Zawdâh haosâ Zudia râh a ngia ta.

² Zawpi hluhpi ta ano cha zi ei ta, cha liata âmo cha patlâh lymâ ta.

³ Phârisaihzy ano lâ a vy ei ta, ano pasia nawpa ta, “Chapaw ta khâpa kyh rai ta a lapinô ma awpa ryhpa ta a pasaih ma?” tahpa ta hiahri ei ta.

⁴ Zisu ta a chhy ta, “Âthaona liata âmo taotuhpa khata, chapaw nata chanô ta âmo cha tao ta,

⁵ ama hnohta, ‘Cha vâna chata chapaw ta a nô nata paw siesai aw ta, a lapinô a patu aw, chatanachata panozy cha pôhpa miakha ama châ ha aw,’ tahpa bie kha rei beih veih ei chi ma?

⁶ Chatanachata pano châ khao leipa ei ta, pôhpa miakha tlao ama châ haw. Chavâta Khazohpa ta a pazaopa cha, chyhsa ta pachhaih khah sy,” tah ta.

⁷ Âmo ta a hnohta, “Cha khiahta cha, khazia Mawsi ta lapinô cha mana châ piepa ta pasiesa theipa a châzie biepiepa a tao?” tah ei ta.

⁸ Zisu ta ama hnohta, “Mawsi khata nama palôh kuhchhapa vâta nama lapinôzy ma a cha pasaipa ei a châ. Âthaona liata la, cha hawhta châ vei.

⁹ Ei cha chho ei, ahy rai apheina vâta châ leipa ta, a lapinô ma ta, chanô hropa a hneipa maih cha â pheipa a châ. Ma chiehpa chanô a hneipa chhao â pheipa a châ hra,” tah ta.

¹⁰ Pachupazy ta a hnohta, “Lapinô kyh liata chapaw duahmo cha, cha hawhta a châ khiahta cha, dyhchâ leipa a pha via,” tah ei ta.

¹¹ Zisu ta ama hnohta, “He bie he chyhsa to ta a pyh thei veih ei. Ama hnohta piepazy deita ta amâ py theipa bie a châ.

¹² Thaidao ta a pihpazy y ei ta, chyhsa ku ta hrilyupazy y hra ei ta, vârâh khinarâh châta âmosasyh ta hrilyupa ta â taopazy ama y hra. A pyh theipa ta, cha bie cha a pyh mawh sy,” tah ta.

Hawtizy byhnâ a awpa

¹³ Hawtizy chô liata a ku pahnieh ta thlahchhâpa awpa ta, chyhsa thokha ta hawtizy cha Zisu lâ a vaw chhi ei ta. Châhrasala pachupazy ta âmo cha ra ei ta,

¹⁴ Zisu ta, “Hawtizy kei lâ pavysa teh u, dytha khah u, vârâh khinarâh cha he hawhpa hawtizy eih châ tlôh ta,” tah ta.

¹⁵ Chatanachata hawtizy chô liata a ku pahnieh ta, cha su tawhta sie ha ta.

Thyutlia hneirôhpa

¹⁶ Chyhsa pakha Zisu lâ a vy ta, a hnohta, “Pachutuhpa, chhâzaw hrona ei hnei thei nawpa ta khâpa hmo phapa ma ei tao aw?” tah ta.

¹⁷ Zisu ta, “Khazia hmo phapa kyh eina hiahri chi? Phapa cha pakha deita a y. Hrona liata nâ ngia khoh khiahta cha, biepiepazy zyh mah y,” tah ta.

¹⁸ Ano ta a hnohta, “Kheihawhpa biepiepazy maw?” tah ta. Zisu ta, “Liany na cheih awpa châ vei, Nâ phei awpa châ vei, Na paru awpa châ vei, Haipa ta chyhsa na leih awpa châ vei,

¹⁹ Na nô nata na paw palyupalih teh, tahpa nata Nâma kyh nâ pachâpa hawhta na vaih kyh na pachâ awpa a châ,” tah ta.

²⁰ Thyutliapa ta Zisu hnohta, “Cha zydua cha ei tao khai haw, tao awpa khâpa ei hnei via chy?” tah ta.

²¹ Zisu ta a hnohta, “Phapaki na khoh khiahta la, sie la, na hneipa zydua zuah la, dyhchhiepazy hnohta pie teh, chatanachata vârâh liata ryu na hnei aw. Cha khai tawhta a vy la, na zi mah y,” tah ta.

²² Cha bie cha thyutliapa ta a thei nahta, sôh hluhpi a hneipa a châpa vâta, pachârôhpa ta sie ha ta.

²³ Zisu ta a pachupazy hnohta, “Hmeiseihta ta ei cha chho ei, chyhsa hneirôhpa châta la, vârâh khinarâh a ngia awpa a ru kaw tlai na.

²⁴ Ei cha chho chanei ei, chyhsa hneirôhpa Khazohpa khinarâh â ngia awpa hlâta la, râraoseihpa chiephoh khaoh liata a ngia awpa tlao a nao via,” tah ta.

²⁵ Cha bie cha pachupazy ta ama thei nahta, ama noâh ngaita ta, a hnohta, “Cha hawhta châ sala, ahy ma pachha a châ thei aw tly?” tah ei ta.

²⁶ Zisu ta âmo cha moh ta, ama hnohta, “Cha hmo cha chyhsapa châta la, tao thei rimâ awpa châ vei. Khazohpa châta deikua cha, ato tao theipa a châ,” tah ta.

²⁷ Pity ta a chhy ta, a hnohta, “Moh teh, keimo he ato siesaipa ta cha zi pi ta, khâpa eima hmô aw?” tah ta.

²⁸ Zisu ta ama hnohta, “Hmeiseihta ta ei cha chho ei, Chyhsa Sawchapawpa he khizaw thiehpa liata a rônahna beidyuchhai liata â tyu tita, nâmo, nâ zituhpa sahlaozy chi he, beidyuchhai miahrawh hleino liata a tyuh aw ei chi ta, Izarei chi hrawh hleinozy chô liata ryu nama reih aw.

²⁹ Ahy rai ei moh vâta ozy, unawhzy, sietanôzy, paw, nô, sawzy nata râhzy a siesaipa cha, a lie za kha ta hmô aw ei ta, chhâzaw hrona ama to aw.

³⁰ Châhrasala hmiatuapa hluhpizy cha hnôhchaipa châ aw ei ta, hnôhchaipazy cha hmiatuapa ama châ aw.