MATHAI 18 - Mara Bible RV (BSI)

Ahy a rônah chai aw?

¹ Cha nota pachupazy Zisu lâ a vy ei ta, a hnohta, “Vârâh khinarâh liata ahy ma a rônah chai aw?” tah ei ta.

² Zisu ta hawti pakha aw ta, ama hry liata paduasa ta,

³ ama hnohta, “Hmeiseihta ta ei cha chho ei, nama yzie pananopa ta, hawtizy hawhta nama châ vei khiahta la, vârâh khinarâh a ngia cheita aw veih ei chi.

⁴ He hawti hawhta areisipa cha vârâh khinarâh liata a rônah chai aw.

Molei reipasaona

⁵ “Ahy rai ei moh ta he hawhpa hawti pakha chhao a lypa cha, keima nâ lypa a châ.

⁶ Châhrasala nâ ngiapâtuhpa hawtizy hry liata pakha chhao a pahluasapa cha, a rao liata charona lô lai ngaitapa paaopa ta, tilaipi athupa liata pathla syulyupa a châta a pha via aw.

⁷ “Molei reipasaonazy vâta khizaw he a hu a po kaw dia! Reipasaona cha a y awpa tlai châ ta, châhrasala reipasaona a paysatuhpa cha a hu a po na!

⁸ Na ku tlyma, na phei tlyma ta a cha pamoleisa khiahta cha, tai la, thy ha mah y. Ku no tlyma, phei no tlyma hneipa ta, chhâzaw mei liata thypa na châ awpa hlâta cha, pihpasipa ta tlyma, pheisypa ta tlyma, hrona liata a ngiapa na châta a pha via.

⁹ Na mo ta a cha pamoleisa khiahta la, thaoh la, thy syulyu ha mah y. Mo no hnei ta hrienasu mei liata thypa ta na y awpa hlâta cha, mo kha hnei ta hrona liata a ngiapa na châta a pha via.

Mietaku leipa pakhona

¹⁰ “He hawtitazy hry liata pakha chhao mopakhô lei awpa ta a sohsi teh u. Vârâh liata ama vâlyuhchâpazy ta ei Paw vârâh liata a ypa hmia khâ ama sai tyh tahpa ei cha chho ei.

¹¹ Chyhsa Sawchapawpa cha leidiapazy pachha awpa ta a zupa a châ.

¹² Kheihta nama pachâ? Chyhsa pakha ta mietaku za kha hnei sala, pô kha lei ha sala, sychaki nata pô chakizy cha tlâhzy liata siesai chypa ta, a leipa cha tlua aw vei ma?

¹³ Hmeiseihta ta ei cha chho ei, a hmô heih khiahta cha, a lei leipa sychaki nata pô chaki hlâta, cha pô kha vâna chata tlao â ly via aw.

¹⁴ Cha hawhna hra chata, he hawtitazy hry liata pakha leidia awpa chhao he, nama Paw vârâh liata a ypa khozie châ vei.

Pasasatuhpa nata aryhna taopa

¹⁵ “Na unawhpa ta na chô liata hmo a parao khiahta cha, ano lâ charei la, ano nata nâma deita pahnopa ta â do leina cha chho mah y. A cha nathlie khiahta cha, na unawhpa cha na pahnie hapa a châ.

¹⁶ A cha nathlie vei khiahta cha, bie to pahnotuhpa pano tlyma, pathôh tlyma pakah liata pa-ipa ta a y thei nawpa ta, chyhsa hropa pakha tlyma, pano tlyma, na hnohta a chhi mah y.

¹⁷ Âmo chhao cha a nathlie khoh vei khiahta cha, Awnanopa chho mah y. Awnanopa chhao taihta a nathlie khoh vei khiahta cha, ano cha na châta Zenitai nata chhiekheituhpa hawhta pachâ mah y.

Chahryna nata pathlâna

¹⁸ “Hmeiseihta ta ei cha chho ei, alei chô liata nama chahrypa maih vârâh liata chahrypa châ aw ta, alei chô liata nama pathlâpa maih vârâh liata pathlâpa a châ hra aw.

¹⁹ Ei cha chho via ei, alei chô liata chyhsa pano ta rei a paraohpa ta hmo ama hia khiahta cha, ei Paw vârâh liata a ypa ta a taopa aw ei.

²⁰ Pano tlyma, pathôh tlyma, ei moh ta amâ hmaohna maihta ama hry liata ei y tyh,” tah ta.

Ngiahthaina hnei leipa sei pakhona

²¹ Pity cha Zisu lâ a vy ta, a hnohta, “Abeipa, ei unawhpa ta ei chô liata hmoparao ngâ thlâh ha sala, ei khazie taih ei ngiahthai aw? Ei sari taih ma?” tah ta.

²² Zisu ta a hnohta, “Ei sari taih cha tah va na, ei sari su sysari taih tlao ei cha tah.

²³ “Chavâta vârâh khinarâh cha abei ta a chakaotuhpazy liata a sôh kyh pasia â chhuahpa nata pakho theipa a châ.

²⁴ A sôh kyh cha a pasia nahta, chyhsa pakha talent thy kha a bâhpa a hnohta a vaw chhi ei ta.

²⁵ Pie awpa a hnei leipa vâta, ano nata a lapinô nata a sawzy zuah sala, a leibâh cha thô awpa ta a zibeipa ta biepie ta.

²⁶ Chakaotuhpa cha a pakhu paneih ta, a zibeipa cha a naoh ta, a hnohta, ‘Zawh rie nâ ngiah chy mah y, a zydua ta ei cha thô khai aw,’ tah ta.

²⁷ A zibeipa ta ngiachhie ngaita ta, chakaotuhpa cha pathlie ta, a leibâh cha a ngiahthai ha ta.

²⁸ Cha chakaotuhpa cha pua ta, a chakaolâhpa pakha, ano liata dinâri za kha a bâhpa hmô ta, patu ta, a rao rie ta, a hnohta, ‘Na leibâh kha na thô teh,’ tah ta.

²⁹ A chakaolâhpa cha a pakhu paneih ta, a hnohta, ‘Zawh rie nâ ngiah chy mah y, a zydua ta ei cha thô khai aw,’ tahpa ta a haw ta.

³⁰ Châhrasala khoh leipa ta, a leibâh a pie khai hlâlei patâhna o liata khô ta.

³¹ A chakaolâhpazy ta a hmotaopa cha ama hmô nahta, ama vâ a sâh ngaita ta, a hmotaopa zydua cha ama zibeipa kei chho ei ta.

³² A zibeipa ta ano cha aw ta, a hnohta, ‘Nâ, chakaotuhpa moleipa! Einâ hawpa vâ chi ta na leibâh zydua châ ngiahthai na ta,

³³ nâma zawh ei châ ngiahpa hawhna khata, nâ chhao ta na chakaolâhpa cha zawh nâ ngiah hra awpa châ vei ma?’ tah ta.

³⁴ A zibeipa cha a hiehâh ngaita ta, a leibâh zydua a pie khai hlâlei riethei pataosa awpa ta patâhna o hyutuhpazy hnohta a hlâ haw.

³⁵ Palôh hmeiseihpa ta nama unawhzy namâ ngiahthai vei khiahta cha, ei Paw vârâh liatapa ta, cha hawhna chata nama zydua chô liata a tao aw,” tah ta.