MATHAI 17 - Mara Bible RV (BSI)Zisu hmia nanona ( Mka 9.2-13 ; Lka 9.28-36 ) 1 Noh charu khai tawhta Zisu ta Pity nata Zâmie nata a unawhpa Zawhâna zy a chhi ta, âmo cha anano ta tlâh sâhpa lâ kiakhei ta. 2 Ama hmiakô liata a hmia a vaw nano ha ta, a hmia cha noh hawhta khaih ta, a chysiazy chhao khaihpa hawhta vaw dieh ta. 3 Mawsi nata Elaizâh ama hnohta a vaw luah ei ta, Zisu cha bie a chho ei ta. 4 Pity ta Zisu hnohta, “Abeipa, he liata eima ypa he a pha na. Na khoh khiahta cha, he liata byureih miathôh, nâma châta miakha, Mawsi châta miakha, Elaizâh châta miakha ei tu aw,” tah ta. 5 A rei hai no tlai chata, meihdo râhpa ta âmo cha vaw khu ta, meihdo tawhta ao vaw pua ta, “He he ei Sawchapawpa kho ngaitapa, a chô liata ei ly ngaitapa a châ, a bie nathlie teh u,” tah ta. 6 Cha bie cha pachupazy ta ama thei nahta, â khu lâta pao ei ta, chi ngaita ei ta. 7 Zisu a vy ta âmo cha hria ta, ama hnohta, “Thyu teh u, chi khuh vy,” tah ta. 8 Kaw moh ei ta, Zisu dei leipa cha ahy hmah hmô leipa ei ta. 9 Tlâh tawhta ama za chô hai nota, Zisu ta ama hnohta, “Chyhsa Sawchapawpa he athihpazy hry tawhta a thyu heih hlâlei cha, aluahna nama hmôpa kha ahy hmah chho khuh vy,” tahpa ta biepie ta. 10 Pachupazy ta a hnohta, “Khazia ryhpa pachutuhpazy ta Elaizâh â vy tua awpa na a châ ama tah tly?” tahpa ta hiahri ei ta. 11 Zisu ta a chhy ta, ama hnohta, “Elaizâh cha a vy tua tlai aw ta, ato zydua a paduapathi aw. 12 Châhrasala ei cha chho ei, Elaizâh cha a vy ha ta, ano cha pahno leipa ei ta, a chô liata ama khozie hawhta ama taopa kha a châ. Cha hawhna hra chata Chyhsa Sawchapawpa chhao he ama ku liata pasa a tao aw,” tah ta. 13 Chatanachata Bâtituhpa Zawhâna kyh ama hnohta a reipa a châzie pachupazy ta pahno ha ei ta. Ahripa patupa hawti a patlâh ( Mka 9.14-29 ; Lka 9.37-43 ) 14 Zawpi yna ama za tlô nahta, chyhsa pakha ano lâ a vy ta, a hmiakô liata pakhu paneih ta, 15 a hnohta, “Abeipa, ei sawchapawpa ngiachhie mah y. Riapamiepa châ ta, thata pasa taopa ta, ei hluhpi mei liata pao ta, ei hluhpi ti liata a pao. 16 Na pachupazy lâ a vaw chhi na ta, âmo ta patlâh thei leipa ei ta,” tah ta. 17 Zisu ta a chhy ta, ama hnohta, “Hy ngiapâleipa nata chhorupa chhâ saih u, khachâ ma nama hnohta ei y aw? Khachâ ma ei cha pachâ thai aw ei? Kei lâ a vaw chhi teh u,” tah ta. 18 Zisu ta ahripa cha ra ta, hawtipa chhôh tawhta pua ta, hawtipa cha thlai vaw tlâh ha ta. 19 Pachupazy cha âmo dei ta Zisu lâ a vy ei ta, a hnohta, “Khazia keimo ta thlahpa puapa eima papua thei vei?” tah ei ta. 20 Zisu ta ama hnohta, “Namâ ngiapâna a chyhpa vâta a châ. Hmeiseihta ta ei cha chho ei, âhrâ chi hmô kha tie chhâ ta ngiapâna nama hnei khiahta la, he tlâh hnohna heta, ‘He tawhta hao lâ a pasie teh,’ tah u la, â pasie thlâh ha aw. Nama châta tao thei leipa khâpa hmah y aw vei. 21 Châhrasala he hawhpa he cha, thlahchhâna nata kâhvileipa deita ta papua theipa a châ,” tah ta. Zisu a thi nawpa kyh a reih chanei 22 Kâlili râh liata ama ypakhy nota, Zisu ta ama hnohta, “Chyhsa Sawchapawpa he chyhsazy ku liata hlâpa ta a y daihmâ. 23 Thie aw ei ta, noh thôh noh ta pathyupa ta a y aw,” tah ta. Chavâta pachupazy cha ama pachârôh ngaita ta. Achhyna o chhie piena 24 Kâpynia ama tlô nahta, Achhyna o chhie kheituhpazy Pity hnohta a vy ei ta, “Nâmo pachutuhpa he chhie pie tyh hra vei ma?” tah ei ta. 25 Ano ta, “A pie tyh,” tah ta. Pity cha o chhôh lâ â ngia nahta, Zisu ta ano cha bie a chho tua ta, a hnohta, “Saimaw, kheihta na pachâ? Lei beizy ta ahy tawhta ma leimâ nata chhiezy ama khei tyh? Ama sawzy tawhta ma, ahropazy tawhta?” tah ta. 26 Pity ta, “Ahropazy tawhta,” tah ta. Zisu ta a hnohta, “Cha khiahta la, sawzy cha amâ ei ha chuh. 27 Châhrasala ama palôh pachhie lei nawpa ta, tilaipi lâ vawh la, keipa kei ny la, nga na paao tua chaipa la la, a pakah cha-ia la tâkâ tlaw no hmô aw chi ta, cha cha la la, keima nata nâma chhie châta ama hnohta pie mah y,” tah ta. |