MATHAI 16 - Mara Bible RV (BSI)

Ngiana amâ hnaw

¹ Phârisaihzy nata Saduasizy a vy ei ta, ano pasia nawpa ta vârâh tawhta ngiana pahmôsa awpa ta hiah ei ta.

² Zisu ta âmo cha a chhy ta, “Zâlâ a vaw châ nahta, avâ a saih khiahta cha, ‘Noh a pha aw,’ tah ei chi ta,

³ mydi ta avâ saih ta a panoh khiahta cha, ‘Tanoh la avâ a suah aw,’ nama tah tyh. Avâ yzie chhopasiana pahno ei chi ta, daihti ngianazy deikua cha pahno thei veih ei chi.

⁴ Chhâ moleipa nata apheipazy ta ngiana tlua tyh ei ta, châhrasala Zawna ngiana dei leipa ta cha, ama hnohta ngiana rai piepa châ aw vei,” tah ta. Âmo cha puasai ta, sie syulyu ha ta.

Phârisaihzy nata Saduasizy thinô

⁵ Pachupazy cha haosâ lâ tlô ei ta, viahchhâ a phao awpa my ha ei ta.

⁶ Zisu ta ama hnohta, “A hrohrua u la, Phârisaihzy nata Saduasizy thinô liata a vaih teh u,” tah ta.

⁷ Pachupazy ta, “Viahchhâ a vaw phao leipa pi ta,” tah ei ta.

⁸ Zisu ta cha kyh cha a pahno nahta, “Ngiapâ chyhpa saih u, khazia ma viahchhâ nama hnei leipa kyh nama reih?

⁹ Pahno to veih ei chi ma? Chyhsa sâh pangawh châta viahchhâ tlâ pangawh a daih ta, a laibâhpa hrâbyh khazie ma namâ huah tahpa kha a thei thlâh ha veih ei chi ma?

¹⁰ Chyhsa sâh palih châta viahchhâ tlâ sari a daih ta, a laibâhpa hrâbyh khazie ma namâ huah tahpa chhao kha a thei thlâh ha veih ei chi ma?

¹¹ Viahchhâ kyh nama hnohta reih va na tahpa khazia nama pahno to vei tly? Phârisaihzy nata Saduasizy thinô liata a vaih teh u,” tah ta.

¹² Chatanachata viahchhâ thinô liata a vaih awpa ta a chhopa ei châ leipa ta, Phârisaihzy nata Saduasizy pachuna liata a vaih awpa kyh tlao a châzie pahno ha ei ta.

Pity ta Zisu Mesia a châna a palâhâh

¹³ Zisu cha Philipi Kaisaria bia a vaw tlô nahta, a pachupazy hnohta, “Chyhsazy ta Chyhsa Sawchapawpa he ahy na a châ ama tah?” tahpa ta hiahri ta.

¹⁴ Âmo ta, “Thokha ta Bâtituhpa Zawhâna a châ, cha tah ei ta; thokha ta Elaizâh a châ, cha tah ei ta; thokha ta Zeremiah tlyma hrohsopa ahy tlyma a châ, ama cha tah,” tah ei ta.

¹⁵ Zisu ta ama hnohta, “Cha khiahta la, nâmo zaw ahy a châ eina tah ei chi?” tah ta.

¹⁶ Saimaw Pity ta, “Mesia, Khazohpa hrohpa Sawchapawpa na châ,” tahpa ta a chhy ta.

¹⁷ Zisu ta a hnohta, “Saimaw, Zawna sawchapawpa, na nohlao na! Sapa nata thisaih ta a cha pahnosapa châ leipa ta, ei Paw vârâh liata a ypa ta a cha pahnosapa a châ.

¹⁸ Chavâta ei cha chho, nâ cha Pity na châ. He lôpanô chô liana heta ei Awnanopa padua aw na ta, Athihkhih chhikaozy ta pahnie aw vei.

¹⁹ Vârâh khinarâh châhbizy cha pie aw na ta, alei liata na chahrypa maih, vârâh liata chahrypa châ aw ta, alei liata na pathlâpa maih, vârâh liata pathlâpa a châ aw,” tah ta.

²⁰ Zisu ta Mesia a châ tahpa cha ahy hmah chho lei awpa ta pachupazy cha â ipa ta zikyu a râ ta.

A thina nata thyuheihna kyh Zisu ta a reih chhielie

²¹ Cha rakha tawhta cha Zisu ta a pachupazy hnohta Zerusale lâ a khy awpa nata machâzy, theihthai beizy nata ryhpa pachutuhpazy ta pasa thata ama pataosa awpa kyh nata, ama thie awpa nata noh thôh noh ta pathyupa ta a y awpa kyh zy reih pathao ta.

²² Pity ta Zisu cha anano ta a chhi ta, ra ta, a hnohta, “Abeipa, Khazohpa ta pasaih khah sy! Cha cha na chô liata tlô cheita khah sy,” tah ta.

²³ Zisu cha Pity lâ a heih ta, a hnohta, “Sâtâ, ei hnôh lâ y teh! Ei châta ahluana na châ he. Khazohpa hmozy pachâ leipa chi ta, chyhsapa hmozy tlao na pachâ via he,” tah ta.

Na kraws a pia la na zi teh

²⁴ Zisu ta a pachupazy hnohta, “Ahy rai eina zi khoh khiahta cha, anosasyh a paky sala, a kraws a piapa ta na zi mawh sy.

²⁵ Ahy rai a hrona pabohsa a chhuahpa cha, a hrona pahlei aw ta; keima vâta a hrona a pahleipa deikua cha, a hrona a hmô heih aw.

²⁶ Chyhsa ta khizaw he a pôhpalôhpa ta hnei sala, a thlahpa a pahlei tlôh khiahta cha, a châta khâpa a phahnai aw? Cha leipa chhao ta, chyhsa ta a thlahpa vyuhpa ta khâpa a pie aw?

²⁷ Chyhsa Sawchapawpa cha a Paw rônahna ta a vâlyuhchâpazy chhaota a zu tlôh aw ta, chyhsa to ama hmotaopa hawhta a thô aw ei.

²⁸ Hmeiseihta ta ei cha chho ei, he liata a duahpazy hry liana heta, Chyhsa Sawchapawpa he a khinarâh liata â zupa ama hmô hlâlei cha, thina a padi lei awpa ama y,” tah ta.