MATHAI 15 - Mara Bible RV (BSI)

Taozietyhpa nata biepiepazy

¹ Phârisaihzy nata ryhpa pachutuhpazy cha, Zerusale tawhta Zisu lâ a vy ei ta, a hnohta,

² “Khazia na pachupazy ta machâzy taozietyhpa ama parao tly? Pati ama nie chy ta ama ku a si veih ei,” tah ei ta.

³ Zisu ta a chhy ta, ama hnohta, “Khazia nâmo chhao ta nama taozietyhpa a tlychakapa ta Khazohpa biepiepa nama parao?

⁴ Khazohpa ta, ‘Na nô nata na paw palyupalih teh,’ tah ta, ‘A nô tlyma, a paw tlyma a reipachhietuhpa cha a thi thlyu awpa a châ,’ a tah.

⁵ Nâmo deikua ta, ‘Ahy rai a nô tlyma, a paw tlyma hnohta, “Keima tawhta baona na hmô awpa vyuhpa cha Khazohpa hnohta ei pie haw,”

⁶ a tahpa maih cha, hmopiepa ta a paw tlyma, a nô tlyma, a palyupalih awpa byuh khao vei,’ nama tah tyh. Nama taozietyhpa a tlychakapa ta, Khazohpa bie cha hraoleipa ta nama tao haw.

⁷ Nâmo, phapakheipazy saih u, nama yzie kyh liata Isai ta,

⁸ “‘He phopi heta, Ama hmao ta na palyupalih ei ta, Ama pathipalôh ta deikua einâ hla kaw ei.

⁹ Chyhsapa biepiepazy cha, Biezyhpa hawhta pachu ei ta, Hraoleipa ta einâ chhy ei,’ tahpa ta â do ngaitapa ta a vaw chhochhielie haw,” tah ta

Chyhsa a papuapaleipa

¹⁰ Chatawhcha zawpizy ano lâ awpakhy ta, ama hnohta, “Nathlie u la, pahno teh u.

¹¹ Pakah liata a ngiapa ta chyhsa papuapalei leipa ta, pakah tawhta a puapa ta chyhsa a papuapalei tyh,” tah ta.

¹² Cha khai tawhta a pachupazy a vy ei ta, a hnohta, “Cha bie cha Phârisaihzy ta thei ei ta, ama palôh a tlâh lei kaw tahpa na pahno ma?” tah ei ta.

¹³ Zisu ta a chhy ta, ama hnohta, “Tho to ei Paw vârâh liata a ypa ta a loh leipa maih cha phiapa a châ.

¹⁴ Âmo y ta y thlâh ha ei sa. Chhituhpa mochaopazy ama châ. Mochaopa ta mochaopa a chhihtha khiahta cha, khaohtlô liata hmaohkhata ama tla aw,” tah ta.

¹⁵ Pity ta a hnohta, “Cha pakhona bie yzie cha miah chhopasia teh,” tah ta.

¹⁶ Zisu ta, “Nâmo chhao taihta a yzie pahno to veih ei chi ma?

¹⁷ Pakah liata a ngiapa cha pavyh lâ palâh ta, lyupâh puana lâta a pua tyh tahpa pahno veih ei chi ma?

¹⁸ Châhrasala pakah tawhta a puapa cha, pathipalôh tawhta a kaw puapa a châpa vâta, cha tlai chata chyhsa a papuapalei tyh.

¹⁹ Moleina pachâna, lianycheina, apheina, apatlana, paruna, haipa bie reipa nata reipachhiena zy he palôh tawhta a kaw puapa a châ.

²⁰ Chazy chata chyhsa a papuapalei tyh. Ku a si leipa ta pati niepa ta chyhsa papuapalei vei,” tah ta.

Kâna chanô ngiapâna

²¹ Cha su tawhta Zisu cha pua ta, Tyre nata Sidaw bia liata a ngia ta.

²² Cha râh liata a ypa Kâna chanô pakha a vy ta, “Hy Abeipa, Dâvi Sawchapawpa, na ngiachhie teh. Ahripa ta ei sawchanô patu ta thata a pasa,” tahpa ta awh ta.

²³ Châhrasala Zisu ta kawh kha hmahta a chhy leipa ta. A pachupazy a vy ei ta a hnohta, “Pasiesa ha mah y, miah a awsao laih ngâ thlâh haw,” tahpa ta a haw ei ta.

²⁴ Zisu ta, “Izarei phopi mietaku aleipazy hnoh dei ta tuapa ei châ,” tah ta.

²⁵ Châhrasala chanô cha a vy ta, Zisu hmiakô liata a bôh ta, a hnohta, “Abeipa, na bao mah y,” tah ta.

²⁶ Zisu ta a chhy ta, “Sawzy viahchhâ chhu ta, izy piepa cha hmo yzie châ vei,” tah ta.

²⁷ Chanô ta, “Abeipa, â do na. Châhrasala izy chhao ta ama zibeipa tlâhkhai tawhta azôhpa a tlapazy cha ama nie tyh hra mâh tâh,” tah ta.

²⁸ Zisu ta chanô cha a chhy ta, a hnohta “Hy chanô, nâ ngiapâna thatlô rimâ cha! Na khopa hawhta na chô liata vaw tlô mawh sy,” tah ta, cha dawh lia tlai ta a sawchanô cha tlâh ha ta.

Chyhsa hluhpi a patlâh

²⁹ Zisu cha, cha su tawhta pua ta, Kâlili Tipo kiah tlô ta, tlâh lâ kiah ta, cha liata a tyuh ta.

³⁰ Zawpi hluhpi a hnohta a vy ei ta, pheisypazy, mochaopazy, pihpasipazy, reih pathlie theileipazy nata pasana hropa a hneipa hluhpi a phei thaby liata vaw soh ei ta, âmo cha patlâh lymâ ta.

³¹ Reih pathlie theileipazy ta reih pathlie ei ta, pihpasipazy tlâh ei ta, pheisypazy phei ta sie ei ta, mochaopazy ta ama hmô thei hapa zawpizy ta ama hmô nahta, ama noâh ngaita ta, Izarei Khazohpa cha reithai ei ta.

Sâh palih rih a pabie

³² Zisu ta a pachupazy aw ta, ama hnohta, “Zawpizy he tahmâ noh thôh tlai ei hnohta y ha ei ta, nie awpa khâpa hmah ama hnei leipa vâta, ei ngia eina chhie ngaita ei. Nodipa ta âmo pasiesa awpa hra cha, lâpi liata ama panao pathlei awpa vâta khoh leipa na ta,” tah ta.

³³ Pachupazy ta a hnohta, “He zie zydua zawpi rih pabie nawpa ta, he su dâhthlohpa liana heta kheihta ma viahchhâ eima hmô thei aw?” tah ei ta.

³⁴ Zisu ta ama hnohta, “Viahchhâ tlâ khazie nama hnei?” tah ta. Âmo ta, “Tlâ sari nata nga dipa chyhta eima hnei,” tah ei ta.

³⁵ Zisu ta zawpizy cha alei liata a tyuh awpa ta biepie ta,

³⁶ viahchhâ tlâ sari nata ngasazy cha la ta, alyna bie a rei khai nahta, eichheih ta, a pachupazy hnohta pie ta, pachupazy ta zawpizy cha rai ei ta.

³⁷ Ama zydua ta nie ei ta, ama rih bie khai ta. Nie laibâhpa azôhpa chhao hrâbyh hmo sari tlai a huah ei ta.

³⁸ A niepa zydua cha chanô nata hawtizy rei leipa ta, chapaw pitlohpa sai ta sâh palih ama châ.

³⁹ Zawpizy a pasiesa khai tawhta, balyh liata kiah ta, Mâkadâ râh lâ sie ha ta.