MATHAI 14 - Mara Bible RV (BSI)

Bâtituhpa Zawhâna thina

¹ Cha daihti liata, Kâlili râh ryureituhpa Herawda ta Zisu thâtih cha thei ta.

² A chakaotuhpazy hnohta, “Cha chyhsa cha Bâtituhpa Zawhâna kha a châ. Athihpa hry tawhta pathyu heihpa a châ chuh. Chavâta hmonoâhpa taotheina ano liata a ypa a châ,” tah ta.

³ Herawdâ ta a unawhpa Phili lapinô Herawdi vâta Zawhâna cha patu ta, chahry ta patâhna o liata a vaw khô hapa a châ.

⁴ Zawhâna ta a hnohta, “He chanô na hnei awpa he ryhpa ta pasaih vei” tahpa ta a chho tyhpa vâta, patu ta a patâhpa a châ.

⁵ Herawda ta Zawhâna cha thie awpa khoh ta, châhrasala zawpi ta hrohsopa ta ama pachâ vâta, zawpi riah chipa ta thie ngâh leipa ta.

⁶ Herawda pina noh vaw tlô ta, alykheituhpazy hmiakô liata Herawdi sawchanônô ta lâh ta, cha chata Herawda cha palysa kaw ta.

⁷ A hiapa maih pie awpa ta bie a taih ta.

⁸ A nô ta a pasyupa hawhta, Herawda hnohta, “Bâtituhpa Zawhâna luh beikoh ta na vaw pie teh,” tah ta.

⁹ Abei cha a pachârôh kaw ta, châhrasala a bietai vâta nata a hruapazy vâta, Herawdi sawchanônô hiapa cha pie awpa ta biepie ta.

¹⁰ Chyhsa tuah ta, Zawhâna luh cha patâhna o liata kei pataisa ta.

¹¹ A luh cha beikoh ta vaw cheih ei ta, laihsanô cha pie ei ta, ano ta a nô lâ vawkhei ta.

¹² Cha khai tawhta Zawhâna pachupazy a vy ei ta, a ri cha la ei ta, ama pabu haw. Sie ei ta, cha thâtih cha Zisu kei chho ei ta.

Sâh pangawh rih a pabie

¹³ Zisu ta Zawhâna thâtih cha a thei nahta, cha su tawhta pua ta, ano dei ta balyh ta sie ta, su dâhthlohpa lâ pangai ta. Cha thâtih cha zawpi ta ama pahno nahta, khihzy tawhta phei ta siepa ta ano cha pazi ei ta.

¹⁴ Ngiahkâ lâ a pua nahta, zawpi hluhpi hmô ta, âmo cha a thapasa ngaita ta, ama hry liata tlâhleipazy patlâh ta.

¹⁵ Zâlâ a vaw châ nahta, a pachupazy ano lâ a vy ei ta, a hnohta, “Su dâhthlohpa liata y tlôh pi ta, zâlâ ha ta, nie awpa a chalei awpa ta zawpizy he khihzy lâta tahmâ pasiesa teh,” tah ei ta.

¹⁶ Zisu ta, “Ama sie awpa byuh vei. Nâmo ta nie awpa pie teh u,” tah ta.

¹⁷ Âmo ta a hnohta, “Viahchhâ tlâ pangawh nata ngasa miano dei leipa ta cha, he liata khâpa hmah hnei ma pi,” tah ei ta.

¹⁸ Zisu ta, “Cha cha kei lâ vaw cheih teh u,” tah ta.

¹⁹ Zawpizy cha sibiepa chô liata a tyuh awpa ta biepie ta, viahchhâ tlâ pangawh nata ngasa miano cha la ta, avâ lâ moh ta, byhnâ aw ta. Chatawhcha viahchhâ cha eichheih ta a pachupazy hnohta pie ta, pachupazy ta zawpizy cha rai ei ta.

²⁰ Ama zydua ta nie ei ta, ama rih bie khai ta. Nie laibâhpa chhao hrâbyh hmo hrawh hleino tlai a huah ei ta.

²¹ A niepa zydua cha chanô nata hawtizy rei leipa ta, chapaw pitlohpa sai ta sâh pangawh rachhôh ama châ.

Zisu ti chô liata a sie

²² Zawpizy a pasiesa chhôh ta, a pachupazy cha balyh ta haosâ lâ pasiesa chhielie ta.

²³ Zawpizy liahsa a pasiesa khai tawhta, ano dei ta thlahchhâ awpa ta tlâh lâ kiah ta. Zâlâ taihta Zisu cha ano dei ta cha liata y thlâh ha ta.

²⁴ Cha daihti liata cha, balyh chhao ngiahkâ tawhta â hlapi sie ha ta. Thlih ta a supa vâta, tichatlaopa ta balyh cha thata phaoh pahai ta.

²⁵ Zâ vaina ei palihna liata, tilaipi chô liata phei ta siepa ta a pachupazy lâ a vy ta.

²⁶ Pachupazy ta tipo chô liata phei ta a siepa ama hmô nahta, chi ngaita ei ta, “Thlahmihpa a châ huh,” tah ei ta.

²⁷ Zisu ta âmo cha thlai bie a vaw chho ta, ama hnohta, “Thlalôhpa ta y teh u, keima na ei châ, chi khah u,” tah ta.

²⁸ Pity ta a hnohta, “Abeipa, nâma na châ khiahta cha, ti chô liata nâma lâ a vy awpa ta bie na pie teh,” tah ta.

²⁹ Zisu ta, “A vy châh chi,” tah ta. Pity cha balyh tawhta thlai pua ta, Zisu lâ pangaipa ta ti chô liata sie ta.

³⁰ Châhrasala thlihpipa a hmô nahta, chi ngaita ta, a pamôh pathao ha ta, “Abeipa, na pachha teh,” tahpa ta awh ta.

³¹ Zisu ta a ku thlai kei pazawh ta, Pity cha patu ta, a hnohta, “Hy nâ, ngiapâ chyhpa, khazia nâ lôh vei?” tah ta.

³² Balyh liata amâ ngia nahta, thlih cha a chalih ha ta.

³³ Balyh liata a ypazy a vy ei ta, ano cha a chhy ei ta, a hnohta, “Khazohpa Sawchapawpa na vaw châ hmeiseih tlai na,” tah ei ta.

Kenesare liata pasapa a patlâh

³⁴ Chatawhcha haosâ lâ kiah ei ta, Kenesare râh kei tlô ei ta.

³⁵ Cha su liata chyhsazy ta ano a châ tahpa ama pahnopa nahta, a chheipâh râh chyhsa zydua bieta ei ta, tlâhleipa zydua ano lâ a vaw chhi ei ta.

³⁶ A poh pai chhâ hria awpa ta Zisu cha a haw ei ta, a hriapa maihta tlâh lymâ ei ta.