MATHAI 13 - Mara Bible RV (BSI)

Chi hietuhpa pakhona

¹ Cha noh lilaw ta Zisu cha o tawhta pua ta, tipo kiah liata a tyuh ta.

² Chyhsa hluhpi a hnohta a vypakhy ei ta, balyh liata kiah ta, a tyuh ta, zawpi zydua cha raphyu liata a duah ei ta.

³ Pakhona biezy hmâpa ta âmo cha bie hluhpi chho ta, ama hnohta, “Chi hietuhpa cha chi hie awpa ta pua ta.

⁴ Chi cha hie ta, chi thokha cha lâthlôh kiah liata tla ei ta, pavawzy a vy ei ta, dyh khai ha ei ta.

⁵ Chi thokha cha lôphiariapa alei apapa liata tla ei ta, alei a chha leipa vâta thlai kaw pyuh ei ta,

⁶ noh a vaw chhi nahta, nohsa ta aih ei ta, thari a hnei leipa vâta ama uah haw.

⁷ Chi thokhazy cha ahloh thih liata tla ei ta, ahloh buhzy kaw rôh ta, chi riepazy cha ama disao haw.

⁸ Chi hropazy cha, alei phapa liata tla ei ta, thokha a lie za kha ta, thokha a lie sycharu ta, thokha a lie sythôh ta thei ama pathei.

⁹ Nakhaoh a hneipa ta thei mawh sy,” tah ta.

Pakhona biezy ta â chhuahpa

¹⁰ A pachupazy a vy ei ta a hnohta, “Khazia pakhona biezy hmâpa ta ama hnohta bie na reih?” tah ei ta.

¹¹ Zisu ta âmo cha a chhy ta, ama hnohta, “Nâmo cha vârâh khinarâh bieparuzy pahno awpa ta piepa châ ei chi ta, âmo deikua cha piepa châ veih ei.

¹² A hneipa hnohta pie baichhapa châ aw ta, a hluhpi a hnei aw. A hnei leipa deikua cha, a hnei chhôhpa chhao, ano tawhta lapa a châ aw.

¹³ He vâna heta ama hnohta pakhona biezy hmâpa ta ei reipa a châ. Hmô ei ta, hmô tlôh leipa ei ta, thei ei ta thei tlôh leipa ei ta, pahno thai hra veih ei.

¹⁴ Hrohsopa Isai ta, “‘Thei cha thei aw ei chi ta, Châhrasala nama novâh aw vei; Hmô cha hmô aw ei chi ta, Châhrasala pahno thai aw veih ei chi.

¹⁵ Cha phopi palôh cha a kuhchha ha ta, Ama nah ta bie thei thai khao leipa ta, Ama mo ama paso haw. Chata châ vei sala cha, Ama mo ta hmôpa ta, Ama nah ta thei aw ei ta, Ama palôh ta pahnopa ta, Kei lâ a vaw heih aw ei ta, Ei patlâh ha awpa ei tlai,’ tahpa ta hrohsona bie a reipa kha ama chô liata a vaw tlô hapa a châ.

¹⁶ “Nâmo deikua cha nama nohlao kaw dia! Nama mozy ta hmô ta, nama nahzy ta a thei.

¹⁷ Hmeiseihta ta ei cha chho ei, hrohsopa hluhpi nata mosiapa hluhpi ta nama hmôpa he hmô byuh kaw ei ta, châhrasala hmô veih ei. Nama theipazy he thei byuh kaw ei ta, châhrasala thei veih ei.

Chi hiepa yzie reipasiana

¹⁸ “Chi hietuhpa pakhona bie yzie he nathlie teh u:

¹⁹ Ahy rai khinarâh bie thei ha tlôh ta, a pahno thai vei khiahta cha, moleipa a vy ta, a palôh liata chi hiepa cha a lapa ha tyh. Cha cha lâpi liata chi hiepa cha a châ.

²⁰ He he lôphiariapa liata chi hiepa a châ. Bie a theipa nahta, a lypa ta thlai a pyh ta,

²¹ châhrasala ano liata thari a thla leipa vâta, bohpi leipa dei y thei ta, bie vâta rietheipasana tlyma, taolana tlyma a vaw y nahta, thlai a pao ha tyh.

²² He he ahloh thih liata chi hiepa cha a châ. Bie cha thei ta, châhrasala khizaw hmo pachâna nata hneirôna tlaichhaina ta bie cha disao ta, pathei leipa ta a y tyh.

²³ Lei phapa liata chi hiepa deikua cha, bie cha thei ta a pahno thaipa a châ. Thei pathei ta, thokha a lie za kha, thokha a lie sycharu nata thokha a lie sythôh ta a pathei tyh,” tah ta.

Sâh hry liata sâh pakheipa

²⁴ Ama hnohta pakhona bie hropa reih heih ta, “Vârâh khinarâh cha chyhsa ta a lyu liata chi phapa a hiepa nata pakhopa a châ.

²⁵ A chyhsazy amâ mô chhôh ta, a chariahpa a vy ta, sâh hry liata sâh pakheipa hie ta, sie syulyu ha ta.

²⁶ Chizy cha vaw laiseih ta, a suh a vaw tao nahta, sâh pakheipazy chhao cha a vaw lâ hra ei ta.

²⁷ Lyu hneituhpa chakaotuhpazy a vy ei ta, a hnohta, ‘Pâpuh, na lyu liata chi phapa ma na hie vei? Kheihtazie ta sâh pakheipazy he a vaw pua thlâh haw?’ tah ei ta.

²⁸ Ano ta ama hnohta, ‘Chariahpa ta a vaw taopa a châ chuh,’ tah ta. Chakaotuhpazy ta a hnohta, ‘Cha khiahta la, vawh sih la, kei phia ha awpa na khoh ma?’ tah ei ta.

²⁹ Ano ta, ‘Châ vei, sâh pakheipazy nama phiana liata sâhzy nama phia pâ pathlei aw na.

³⁰ Sâh hria daihti taih cha y khoh thlâh ha ei sala, sâh hria daihti liata hriatuhpazy hnohta, “Sâh pakheipazy kha pahmaoh tua u la, rao awpa ta a pia ta chahry u la, sâh deikua cha ei sawvâ liata pahmaoh teh u,” ei tah aw,’” tah ta.

Âhrâ chi pakhona

³¹ Zisu ta pakhona bie hropa ama hnohta reih heih ta. “Vârâh khinarâh cha chyhsa ta âhrâ chi hmô kha lyu liata a pariepa hawhta a châ.

³² Âhrâ chi cha chi zydua liata chi chyh chaipa châ ta, châhrasala a vaw laiseih tita cha, chicheipa zydua hlâta lai chai ta, thokô a vaw châ tyh. Chatanachata vâ pavawzy a vy ei ta, a chiahzy liata bu ama tu tyh,” tah ta.

Thinô pakhona

³³ Zisu ta pakhona bie hropa ama hnohta reih heih ta, “Vârâh khinarâh cha chanô ta thinô la ta, viahdie saikhua miathôh liata pabu ta a zydua ta a thyu khai hapa hawhta a châ,” tah ta.

Hrohsona nata pakhona biezy

³⁴ Cha hmo zydua cha Zisu ta zawpizy hnohta pakhona biezy hmâpa ta reih ta. Pakhona bie hmâ leipa ta ama hnohta bie a reipa y vei.

³⁵ Cha hmo cha hrohsopa ta, “Pakhona biezy hmâpa ta ei pakah â aw na ta, Hmo nyupazy ei phuah aw, Khizaw y tua no tawhta nyu hapazy cha,” tahpa ta a reipa kha a vaw tlô thei nawpa ta a châ.

Sâh pakheipa kyh reipasiana

³⁶ Zisu ta zawpizy cha siesai ta, o liata a ngia ta, a pachupazy ano lâ a vy ei ta, a hnohta, “Lyu liata sâh pakheipa pakhona bie kha miah chhopasia teh,” tah ei ta.

³⁷ Zisu ta a chhy ta, “Chi phapa a hietuhpa cha Chyhsa Sawchapawpa a châ.

³⁸ Lyu cha khizaw châ ta, chi phapa cha khinarâh sawzy ama châ. Sâh pakheipazy cha moleipa sawzy châ ei ta,

³⁹ âmo a hietuhpa chariahpa cha ahripa a châ. Sâh hria daihti cha daihti chhâna châ ta, hriatuhpazy cha vâlyuhchâpazy ama châ.

⁴⁰ Sâh pakheipazy cha pahmaohpa ta mei liata raopa ama châpa hawhta, daihti chhâna liata a châ hra aw.

⁴¹ Chyhsa Sawchapawpa ta a vâlyuhchâpazy tuah aw ta, moleina a patlôsatuhpa zydua nata hmo pha leipa a taotuhpa zydua cha, a khinarâh tawhta la papua aw ta,

⁴² moleipazy cha patina meihô liata ama thy aw. Cha liata chana nata hâh chariehna a y aw.

⁴³ Chyhsa siapazy deikua cha, ama Paw khinarâh liata noh hawhta ama khaih aw. Nakhaoh a hneipa ta thei mawh sy.

Ryubyh nyupa pakhona

⁴⁴ “Vârâh khinarâh cha lyu liata ryubyh nyupa chyhsa pakha ta hmô ta, nyu heih ta, a ly ngaitapa ta sie ta, a hneina zydua zuah ta, cha lyu cha a chaleipa hawhta a châ.

Taikuh lôsôhpa pakhona

⁴⁵ “Vârâh khinarâh cha sôdaohpa ta taikuh lôsôhpa a tluapa hawhta a châ heih.

⁴⁶ Taikuh lôsôh ngaitapa miakha a hmô nahta, sie ta a hneipa zydua zuah ta a chaleipa hawhta a châ.

Sao pakhona

⁴⁷ “Vârâh khinarâh cha tilaipi liata sao paraipa, nga chi to a aopa hawhta a châ.

⁴⁸ Sao cha a bie nahta, nga patutuhpazy ta ngiahkâ lâ a daophi ei ta, a tyuh ei ta, nga phapazy cha hrâbyh liata soh ei ta, a chhiepazy deikua cha ama thy tyh.

⁴⁹ Cha hawhna chata daihti chhâna liata a y hra aw. Vâlyuhchâpazy a zu aw ei ta, moleipazy cha mosiapazy tawhta pahrua aw ei ta,

⁵⁰ moleipazy cha patina meihô liata ama thy aw. Cha liata chana nata hâh chariehna a y aw.

Ryubyh thiehpa nata parohpa

⁵¹ “Cha hmo zydua cha nama pahno thai khai ma?” tah ta. Âmo ta a hnohta, “Eima pahno,” tah ei ta.

⁵² Zisu ta ama hnohta, “Chavâta vârâh khinarâh châta pachusapa ryhpa pachutuhpa maih cha, o hneituhpa ta a ryubyh tawhta hmo thiehpa nata hmo parohpa a thao papuapa hawhta a châ,” tah ta.

Nâzari liata Zisu ama dytha

⁵³ Cha pakhona biezy a rei khai nahta, Zisu cha cha su tawhta pua ta.

⁵⁴ A khih kei tlô ta, amâ pakhyna o liata âmo cha pachu ta, ama noâh ngaita ta, “He chyhsa heta khataih tawhta ma he sona nata hmotaotheinazy he a hnei tly?

⁵⁵ He chyhsa he zôthaipa sawchapawpa kha châ vei ma? A nô chhao Mâri ama tahpa kha châ vei ma? A unawhzy chhao Zâmie, Zawsi, Saimaw nata Zudâh zy châ veih ei ma?

⁵⁶ A sietanôzy chhao eima hnohta y khai thlâh ha veih ei ma? He chyhsa heta, khataih tawhta ma he hmo zydua he a hmô tly?” tah ei ta.

⁵⁷ Ano cha chhyh thai leipa ei ta. Zisu ta ama hnohta, “Hrohsopa cha a khih nata a chhôhkha liata tah leipa ta la, palyupalihna hlao leipa ta y beih vei,” tah ta.

⁵⁸ Amâ ngiapâ leipa vâta, cha liata hmonoâhpa hluhpi tao vei.