MATHAI 12 - Mara Bible RV (BSI)

Zisu Pahânoh Beipa

¹ Cha daihti liata, Zisu cha Pahânoh ta sâh thihzy chapiapa ta sie ta. A pachupazy cha ama nodi kaw ta, sâh suhzy thliepa ta nie ei ta.

² Phârisaihzy ta ama hmô nahta, a hnohta, “Moh tua, na pachupazy ta Pahânoh ta tao lei awpa hmo ama tao,” tah ei ta.

³ Zisu ta ama hnohta, “Dâvi nata a hnohta a ypazy ta ama nodi nota ama hmotaopa kha reih beih veih ei chi ma?

⁴ Khazohpa o liata a ngia ta, ano nata a hnohta a ypazy châta nie pasai leipa, theihthaipazy deita nie theipa Ypâna Viahchhâ ama niepa kyh kha thei beih veih ei chi ma?

⁵ Theihthaipazy ta Pahânoh ta Achhyna o liata Pahânoh parao ei ta thai ama châ thlâh hapa kyh Ryhpa bie liata ropa chhao kha, reih beih veih ei chi ma?

⁶ Ei cha chho ei, Achhyna o hlâta hmo rônah viapa he liata a y.

⁷ ‘Atheihna khoh leipa na ta, zawngiahna ei khoh,’ tahpa he a yzie a pahnopasiapa châ u la cha, thaileina a hnei leipa thailei nama pachâsa lei awpa tlai.

⁸ Chyhsa Sawchapawpa he Pahânoh Beipa châ tlôh ta,” tah ta.

Chyhsa ku sypa

⁹ Zisu cha, cha su tawhta sie ta, amâ pakhyna o liata a ngia ta.

¹⁰ Chyhsa pakha ku sypa y ta, Zisu ama leih thei nawpa ta a hnohta, “Pahânoh ta chyhsa patlâhpa he Ryhpa ta a pasaih ma?” tahpa ta hiahri ei ta.

¹¹ Zisu ta ama hnohta, “Chyhsa ta mietaku pô kha hnei sala, cha cha Pahânoh ta khaohtlô liata tla ha sala, nama hry liata ahy ma pazapa ta a thaoh leipa a y aw ei chi?

¹² Mietaku hlâta chyhsapa cha sôh via syulyu vei ma? Chavâta Pahânoh ta hmo pha taopa cha Ryhpa ta a pasaih,” tah ta.

¹³ Chatawhcha chyhsa hnohna chata, “Na ku pazawh teh,” tah ta. A ku pazawh ta, a ku hiakha lâtapa hawhta vaw tlâh ha ta.

¹⁴ Phârisaihzy deikua cha pua ei ta, ano ama pahleipadia thei nawpa ta bie a pachia ei ta.

Khazohpa ta â tlyhpa chakaotuhpa

¹⁵ Amâ chhuahpa cha a pahno nahta, Zisu cha, cha su tawhta sie ha ta. Chyhsa hluhpi ta ano cha zi ei ta, ama zydua ta patlâh ta.

¹⁶ A châna phuah lei awpa ta âmo cha biepie ta.

¹⁷ Cha hmo cha hrohsopa Isai ta,

¹⁸ “Moh teh u, he he ei tlyhpa nâ chakaotuhpa châ ta, Ei kho ngaitapa nata a chô liata ei thlahpa â ly kawpa a châ. A chô liata ei Thlahpa soh aw na ta, Zenitaizy hnohta ryureina dopa a phuah aw.

¹⁹ Chyhsa a hryuh leipa aw ta, Awhsâh hra leipa aw ta, Tlyliah liata a ao a theipa y aw veih ei.

²⁰ Lohthi tliepa-ipa thlie lao leipa aw ta, Meiôh thi daihmâpa pachhai lao aw vei; Ryureina dopa pahniena a patosa hlâlei cha,

²¹ Ano moh liata Zenitaizy ama hnabei a seih aw,” tahpa ta a reipa a vaw tlô thei nawpa ta a châ.

Thlahpa Pathaihpa reipachhiepa

²² Chatawhcha ahripa ta a patupa, mochaopa nata reih pathlie thei leipa pakha a hnohta a vaw chhi ei ta. Zisu ta ano cha patlâh ta, reih pathlie thei leipa cha reih pathlie theipa ta, a mo pavâ ha ta.

²³ Zawpi zydua cha ama noâh ngaita ta, “He he Dâvi Sawchapawpa a châ thei aw ma?” tah ei ta.

²⁴ Phârisaihzy deikua ta cha thâtih cha ama thei nahta, “He chyhsa heta ahripazy hyutuhpa Belzebu vâta ahripazy a papua theipa a châ hih,” tah ei ta.

²⁵ Ama pachâpazy a pahno nahta, Zisu ta ama hnohta, “Khinarâh a chhaihzaoh ta âmo nata âmo a dyuhpa maih cha rao tyh ei ta, khihpi tlyma, chhôhkha tlyma, a chhaihzaoh ta âmo nata âmo a dyuhpa maih a duah aw veih ei.

²⁶ Sâtâ ta Sâtâ a papua khiahta cha, ano nata ano â dyuhpa châ ta, kheihta a khinarâh â duah thei aw?

²⁷ Kei ta Belzebu moh ta ahripazy ei papua khiahta cha, nama sawchapawzy kha ahy moh ta ma ahripazy ama papua tyh? Chavâta âmo cha châ pachiatuhpazy ama châ aw.

²⁸ Khazohpa Thlahpa vâta ahripazy a papuapa ei châ khiahta deikua cha, Khazohpa khinarâh cha nama chô liata a vaw tlô hapa a châ.

²⁹ Chyhsa ta chyhsa thatlôpa o liata a ngia sala, cha chyhsa thatlôpa cha a chahry ha tua leipa khiahta cha, kheihta a hmozy a hrao thei aw? A chahry khai tawhta a o cha a hrao thei aw.

³⁰ Ei chhâh a châ leipa cha nâ dyuhtuhpa châ ta, nâ pahmaohkhei leipa cha a papaituhpa a châ.

³¹ Chavâta ei cha chho ei, chyhsa moleina to nata Khazohpa ama reipachhiena cha a ngiahthaipa châ aw ta, Thlahpa reipachhiepa deikua cha, a ngiahthaipa châ aw vei.

³² Chyhsa Sawchapawpa a reipachhiepa cha a ngiahthaipa châ aw ta, Thlahpa Pathaihpa a reipachhiepa deikua cha, he chhâ nata chhâ vaw y awpa liata chhao, a ngiahthaipa châ aw vei.

Tho nata a thei

³³ “Tho phapa cha a thei pha ta, tho chhiepa cha a thei a chhie. Tho cha a thei tawhta pahnopa a châ.

³⁴ Vâzi pathlazy saih u, nâmo moleipazy ta kheihta hmo phapa nama reih thei aw? Palôh liata a bie pakhôpa cha pakah ta a reih papua tyh.

³⁵ Chyhsa phapa ta a ryubyh phapa tawhta hmo phapa papua tyh ta, chyhsa chhiepa ta a ryubyh chhiepa tawhta hmo chhiepa a papua tyh.

³⁶ Ei cha chho ei, chyhsazy ta bie pha leipa ama reipa maih cha, ryureina noh liata amâ reipasia awpa a châ.

³⁷ Na biezy vâta thai châ aw chi ta, na biezy lilaw ta thailei pachâsapa na châ aw,” tah ta.

Chhâ moleipazy ta ngiana ama tlua

³⁸ Chatawhcha ryhpa pachutuhpa nata Phârisaih thokhazy ta a hnohta, “Pachutuhpa, nâma tawhta ngiana hmô awpa eima khoh,” tah ei ta.

³⁹ Zisu ta âmo cha a chhy ta, “Chhâ moleipa nata apheipazy ta ngiana ama tlua tyh. Châhrasala hrohsopa Zawna ngiana dei leipa ta cha, ngiana hropa piepa châ aw vei.

⁴⁰ Zawna ta nga laipa py chhôh liata noh thôh nata zâ thôh a ypa hawhta, Chyhsa Sawchapawpa chhao alei chhôh liata noh thôh nata zâ thôh a y aw.

⁴¹ “Pachiana noh liata, Ninivâ mo kha he chhâ nata vaw thyu khoh aw ei ta, he chhâ he thailei ama pachâsa aw. Âmo cha Zawna biechhopa vâta ro ei ta, moh teh u, Zawna hlâta rônah viapa he liata a y.

⁴² Chho beinô chhao, pachiana noh liata, he chhâ nata vaw thyu khoh aw ta, he chhâ he thailei a pachâsa aw. Sawlawmaw sona nathlie awpa ta hmah, khizaw chhâna tawhta a vy ta, moh teh u, Sawlawmaw hlâta rônah viapa he liata a y.

Thlahpa puapa vaw kua heihna

⁴³ “Thlahpa puapa cha chyhsa tawhta a pua nahta, apahâna su tluapa ta ti y leina suzy chahryh ta, châhrasala hmô leipa ta.

⁴⁴ ‘Ei vaw puana o lâ kha ei kua heih aw,’ tah ta. A tlô nahta, o cha a ruapa ta, phi chiehpa nata paryh khaipa ta hmô ta.

⁴⁵ Sie ta, thlahpa hropa pasari, ano hlâta molei viapazy a vaw chhi ta, cha liata a ngia ei ta, ama pahrâ haw. Hnôhlâ ta cha chyhsa duahmo cha, hmiatuapa hlâ khata a chhie via syulyu haw. Cha hawhna chata, he chhâ moleipa chhao he a vaw y hra aw,” tah ta.

Zisu nô nata unawhzy

⁴⁶ Zawpizy hnohta bie a rei hai nota, a nô nata a unawhzy ta ano cha bie a chho khoh ei ta, khôtho liata a duah ei ta.

⁴⁷ Chyhsa pakha ta a hnohta, “Na nô nata na unawhzy ta bie châ chho khoh ei ta, khôtho liata amâ duah thlâh haw,” tah ta.

⁴⁸ Zisu ta bie a chhotuhpa cha a chhy ta, a hnohta, “Ei nô cha ahy maw, ei unawhzy cha ahyzy maw?” tah ta.

⁴⁹ Chatawhcha a pachupazy lâta a ku pazawh ta, “Hezy he ei nô nata ei unawhzy cha ama châ.

⁵⁰ Ahy rai ei Paw vârâh liata a ypa khopa a taopa maih cha, ei unawh nata ei sietanô nata ei nô zy ama châ,” tah ta.