MATHAI 11 - Mara Bible RV (BSI)

Zisu nata Bâtituhpa Zawhâna

¹ Zisu cha a pachupa pahrawh hleinozy bie a pie khai tawhta, ama khihpizy liata pachu awpa nata bie chho awpa ta, cha su tawhta pua ta.

² Krista hmotaopazy cha, Zawhâna ta patâhna o tawhta a vaw pahno nahta, a pachupazy tuah ta,

³ Zisu hnohta, “A vy awpa cha na châ ma, ahropa eima hâ aw ma?” tahpa ta pahiahrisa ta.

⁴ Zisu ta âmo cha a chhy ta, “Sie u la, nama theipa nata hmôpazy he Zawhâna kei chho teh u:

⁵ Mochaopazy ama mo pavâ ta, pheisypazy phei ta sie ei ta, phawhpazy pathaisapa ta y ei ta, nahpâpazy ta thei ei ta, athipazy pathyupa ta y ei ta, dyhchhiepazy hnohta thâtihpha chhopa a châ haw.

⁶ Ei chô liata palôhchâ leina a hnei leipa chyhsa cha a nohlao na,” tah ta.

⁷ Zawhâna pachupazy ama sie nahta, Zisu ta zawpi hnohta Zawhâna thâtih reih ta: “Khâpa mo awpa ta ma râhchawhpa lâ nama sie? Ziza ta lohthi a chalyupa mo awpa ta ma?

⁸ Khâpa mo awpa ta ma nama pua tly? Chysia naipa ta a tobipa chyhsa mo awpa ta ma? Chysia phapa ta a tobipazy cha abei ozy liata mah ama y tâh.

⁹ Cha khiah, khâpa mo awpa ta ma nama pua? Hrohsopa mo awpa ta ma? Ano cha hrohsopa a châ tlai, ei cha chho ei, hrohsopa hlâta rônah viapa a châ.

¹⁰ “‘Moh teh u, ei lyuhchâpa na hmia lâta tuah na ta, Ano ta na hmia lâta na lâpi â chhuahdy aw!’ tahpa ta a thâtih ropa kha, ano he a châ.

¹¹ Hmeiseihta ta ei cha chho ei, chanô sapazy hry liata Bâtituhpa Zawhâna hlâta rônah viapa pua veih ei. Chatahrasala vârâh khinarâh liata chyhsa nawh chaipa cha ano hlâta a rônah via.

¹² Bâtituhpa Zawhâna daihti tawhta tahmâ taihta vârâh khinarâh cha thachahra ta adyuhna vâta pasa tao lymâ ta, thachahra a hmâhpazy ta tararuahna ta ama la lymâ.

¹³ Zawhâna a vaw pua hlâna khata, hrohsopa zydua nata Ryhpa bie ta ama vaw chhochhielie haw.

¹⁴ Cha cha nama zo khoh khiahta cha, ano he Elaizâh a vy awpa cha a châ.

¹⁵ Theina nakhaoh a hneipa ta thei mawh sy.

¹⁶ “He chhâ he khâpa nata ma ei pakho aw tly? Hawtizy sôdaohna su liata a tyuh ei ta, ama viasazy ama awpa a lyu.

¹⁷ “‘Ramo cha tôpa pi ta, Lâh leipa ei chi ta; Chaphôh cha tupa pi ta, Mâchhiesa hlei veih ei chi.’

¹⁸ “Zawhâna a vy ta, nie leipa ta, doh hra leipa ta, ‘Ahripa a hnei,’ tah ei ta.

¹⁹ Chyhsa Sawchapawpa a vy ta, nie ta, doh ta, ‘Moh tua u, azohpa nata kresawhti parâpa, chhiekheituhpazy nata moleipazy viasa huh!’ tah heih ei ta. Châhrasala sona cha a hmotaopazy tawhta â dozie â lâ tyh,” tah ta.

Molei ro leipa khihpizy hupona

²⁰ Hmonoâhpa a tao hluh chaina khihpizy cha, ama ro leipa vâta ra ta.

²¹ “Kôrâzi, na hu a po na! Besaidâ, na hu a po na! Nâmo liata hmonoâhpa taopazy kha, Tyre nata Sidaw liata taopa châ sala, latho poh a bupa ta, buchâh a mia aw ei ta, ama ro ha awpa tlai.

²² Châhrasala ei cha chho ei, ryureina noh liata la nâmo pasa taopa hlâta Tyre nata Sidaw pasa tao awpa a zie a y via aw.

²³ Nâ, Kâpynia, avâ taihta palyupalihpa ta na y aw ma? Athihkhih lâ a daophi pathlahpa na châ aw. Nâma liata hmonoâhpa taopazy kha, Sawdawmâ liata taopa châ sala, Sawdawmâ kha tanoh taihta a y thlâh ha awpa tlai.

²⁴ Châhrasala ei cha chho ei, ryureina noh liata la, nâma pasa taopa hlâta Sawdawmâ râh pasa taopa a zie a y via aw,” tah ta.

Zisu liata apahâna

²⁵ Cha daihti liata Zisu ta, “Hy ei Paw, lei nata vâ Beipa, nâ ta he hmozy he chyhsa sopa nata novâhpazy liata nyu chi ta, hawti chyhpazy hnohta na phuahpa vâta ei châ ly ngaita.

²⁶ A châ na, ei Paw, cha hawhpa cha na khopa châ tlôh ta.

²⁷ Ei Paw ta ato zydua eina hlâ haw. Paw dei leipa ta cha, ahy hmahta Sawchapawpa he pahno leipa ei ta, Sawchapawpa nata ano ta a hnohta a palâhâhpa tah dei leipa ta cha, ahy hmahta Paw pahno veih ei.

²⁸ Nâmo, hriapasapa nata phaohripa zydua saih u, kei lâ a vy u la, ei cha pahâsa aw ei.

²⁹ Ei raopaky a ky u la, kei tawhta a chu teh u. Kei cha areisipa nata palôh nônaipa ei châ. Nama thlahpazy châta apahâna nama hmô aw.

³⁰ Ei raopaky cha pha ta, ei phao chhao â hua,” tah ta.