MATHAI 10 - Mara Bible RV (BSI)

Zituhpa pahrawh hleinozy

¹ Zisu ta a pachupa pahrawh hleinozy aw ta, thlahpa puapazy papua thei awpa nata hriiah to nata pasana to patlâh thei awpa ta âmo cha biehneina pie ta.

² Lyuhchâpa pahrawh hleinozy moh cha hezy he ama cha: A hmiatua chai ta, Saimaw, Pity ama bipa nata a unawhpa Adaru; Zebâdi sawchapawpa Zâmie nata a unawhpa Zawhâna;

³ Phili nata Bâthawlawmu; Thawma nata chhiekheituhpa Mathai; Alphu sawchapawpa Zâmie nata Thâdia;

⁴ Zilô py liatapa Saimaw nata a patusatuhpa Zudâh Iskari zy ama châ.

Lyuhchâpazy tuana

⁵ He pahrawh hleinozy he Zisu ta tuah ta, ama hnohta hetana heta bie a pie ei: “Zenitaizy lâpi lâta sie leipa u la, Samâri khihpi liata chhao a ngia hra leipa u la,

⁶ Izarei phopi mietaku a leipazy lâta tlao sie teh u.

⁷ Nama siena liata, ‘Vârâh khinarâh cha â hnia haw,’ tahpa ta chho lymâ teh u.

⁸ Tlâhleipazy patlâh u la, athipazy pathyu u la, phawhpazy pathaisa u la, ahripazy papua teh u. A saipa ta hmô ei chi ta, a saipa ta pie teh u.

⁹ Nama chaisaihna liata ngôh tlyma, tâkâ tlyma, dawh tlyma a phao leipa u la,

¹⁰ nama khitlyna sahria tlyma, viahkao pasipa zo no tlyma, pheikyzy tlyma, chôchahrei tlyma a phao hra khah u. Raihriatuhpa cha a nie tlâh a châ.

¹¹ Khihpi liata tlyma, khitaw liata tlyma namâ ngia tita, cha liata tlô tlâh a châpa chyhsa tlua u la, nama sie hlâlei cha, cha liata y teh u.

¹² O namâ ngia tita a naoh teh u.

¹³ Cha o liata chyhsazy cha a naoh tlâh ama châ khiahta cha, nama thlapalôhna bie ama chô liata tlô sala, a naoh tlâh ama châ vei khiahta deikua cha, nama thlapalôhna bie cha nâmo lâ vaw kua heih mawh sy.

¹⁴ Ahy rai châ ly leipa tlyma, nama biezy a nathlie leipa tlyma cha, cha o tawhta tlyma, cha khih tawhta tlyma nama pua tita, nama phei liata buchadoh chatho thlu teh u.

¹⁵ Hmeiseihta ta ei cha chho ei, ryureina noh liata, cha khih hlâta Sawdawmâ nata Kawmawrâ pasa taopa a zie a y via aw.

Taolana a vaw tlô aw

¹⁶ “Pachâ teh u, changie hry liata mietaku hawhta ei cha tua ei hih. Chavâta parihzy hawhta so u la, vachhuhzy hawhta nônaipa ta y teh u.

¹⁷ Chyhsazy tawhta a vaih teh u. Ryureina lâ cha hlâ aw ei ta, pakhyna ozy liata ama cha tu aw.

¹⁸ Zenitaizy hmiakô liata bie pahnotuhpazy châ awpa ta, keima vâta ryureituhpazy nata abeizy hmiakô liata ama châ chhi aw.

¹⁹ Ama cha patu tita, ‘Kheihta ma bie eima reih aw, khâpa bie ma eima reih aw,’ tahpa ta nama nôpo khah sy. Nama rei awpa cha a daihtita liata piepa nama châ aw.

²⁰ Bie a reih awpa cha nâmo châ veih ei chi, nama Paw Thlahpa ta nâmo hmâpa ta tlao a reih aw.

²¹ Thie awpa ta, unawhpa ta a unawhpa patusa aw ta, paw ta a saw a patusa aw. Sawzy ta nôpawzy a dyuh aw ei ta, ama pathiesa aw.

²² Ei moh vâta chyhsa to a haopa ta y aw ei chi ta, achhâna taihta â ipa ta a duahpa cha pachhapa ta a y aw.

²³ Khihpi miakha liata ama cha taola tita, khihpi hropa lâ a râ teh u. Hmeiseihta ta ei cha chho ei, Chyhsa Sawchapawpa â vy hlâta Izarei khihpi zydua chahryh khai hmâ aw veih ei chi.

²⁴ “Pachupa cha a pachutuhpa chô lâta y leipa ta, sei chhao a zibeipa chô lâta y vei.

²⁵ Pachupa cha ano pachutuhpa a lyupa a daih ta, sei ta a zibeipa a lyupa â daih. O hneituhpa hmahta Belzebu ama tah khiahta cha, a chhôhkhazy chhochhi cha khatlu ta ma ama reipachhie via aw tly!

Chi awpa dopa

²⁶ “Chavâta âmo cha chi khuh vy. A lâ lei awpa ta khupa khâpa hmah y leipa ta, pahno lei awpa ta phihpa khâpa hmah y vei.

²⁷ Zohna liata ei cha chhopa ei he, khaihna liata reih u la, bieparu ta nama theipa kha, vâphuh chô tawhta awh teh u.

²⁸ Pôhpa thie thei ta, thlahpa a thie thei leipazy chi leipa u la, hrienasu liata pôhpa nata thlahpa a pahleipadia theipa cha tlao chi teh u.

²⁹ Boby pô no phusâ miakha ta zuapa châ vei ma? Ama hry liata pô kha chhao nama Paw paryhsana leipa ta alei liata tla aw vei.

³⁰ Nama luh liata sâ zydua chhao reih khaipa a châ.

³¹ Chavâta chi khuh vy, boby hluhpi hlâta nama sôh via.

Krista achâkheina

³² “Ahy rai chyhsa hmiakô liata nâ châhkheipa cha, ei Paw vârâh liata a ypa hmiakô liata a châhkhei aw na ta,

³³ ahy rai chyhsa hmiakô liata nâ paphapa cha, ei Paw vârâh liata a ypa hmiakô liata ei papha hra aw.

Adyhna châ vei, zaozi tlao a châ

³⁴ “Khizaw liata adyhna chareisa awpa ta a vypa hawhta na pachâ khuh vy. Adyhna chareisa awpa châ leipa ta, zaozi chareisa awpa ta a vypa tlao ei châ.

³⁵ Sawchapaw ta a paw, sawchanô ta a nô, myuhnô a nohnô padyuhsa awpa ta a vypa ei châ.

³⁶ Chyhsa chariahpazy cha ano chhôhkhapa cheingei tawhta ama châ aw.

³⁷ Kei hlâta a paw tlyma, a nô tlyma kyh a pachâ viapa cha, ei chyhsa tlâh châ vei. Kei hlâta a sawchapaw tlyma, a sawchanô tlyma kyh a pachâ viapa chhao, ei chyhsa tlâh châ vei.

³⁸ Ahy rai a kraws a piapa ta nâ zi leipa cha, ei chyhsa tlâh châ vei.

³⁹ Ahy rai a hrona a hmôpa ta a hrona pahlei aw ta, keima vâta a hrona a pahleipa ta a hrona a hmô heih aw.

Lymâzy

⁴⁰ “Ahy rai nâmo châ lypa cha keima nâ lypa châ ta, ahy rai kei nâ lypa cha nâ tuahtuhpa a lypa a châ.

⁴¹ Ahy rai hrohsopa cha hrohsopa a châpa vâta a lypa cha, hrohsopa lymâ hmô aw ta, chyhsa siapa cha chyhsa siapa a châpa vâta a lypa chhao, chyhsa siapa lymâ a hmô aw.

⁴² Ahy rai, he chyhsa chyhpatazy hry liata pakha hnohta, ei pachupa a châpa vâta ti chakuapa nyu kha a piepa cha, hmeiseihta ta ei cha chho ei, a lymâ pahlei cheita aw vei.”