MALUHREINA 9 - Mara Bible RV (BSI)

Zawpakhô chayna

¹ Izi râh ama puasai tawhta kô nona thla khana liata, Abeipa ta Sinai râhchawhpa liata Mawsi bie a chho ta, a hnohta,

² “Izarei sawzy ta daihti raopa liata zawpakhô kyhchhi ama hnei tyh awpa a châ.

³ He thla noh hrawh hleipalihna noh zâlâ nohtla daihti he, daihti raopa châta hnei aw ei chi ta, zawpakhô bieraopa nata ryhpa zydua hawhta nama chay tyh aw,” tah ta.

⁴ Cha hawhna chata Mawsi ta Izarei sawzy cha zawpakhô kyhchhi chay awpa ta chho ta.

⁵ Chatanachata thla khana noh hrawh hleipalih noh zâlâ nohtla daihti liata, Sinai râhchawhpa liata zawpakhô kyhchhi cha chay ei ta. Abeipa ta Mawsi bie a piepa zydua hawhta Izarei sawzy ta ama tao.

⁶ Thokha deikua cha athihpa ri vâta pathaih leipa châ ha ei ta, cha noh liata zawpakhô kyhchhi chay thei veih ei. Chavâta cha noh liata Mawsi nata Arawna hmiakô liata a vy ei ta,

⁷ Mawsi hnohta, “Athihpa ri vâta pathaih leipa châ ha pi ta, châhrasala khazia daihti raopa liata Izarei sawzy hry liata Abeipa lâta hmohlâpa eima hlâ hra awpa cha pakhâpa ta eima y?” tah ei ta.

⁸ Mawsi ta ama hnohta, “Vaw hâ chy teh u, nâmo kyh liata Abeipa ta kheihta ma bie a pie aw tahpa ei nathlie ha tua aw,” tah ta.

⁹ Abeipa ta Mawsi hnohta,

¹⁰ “Izarei sawzy hnohta hetana heta chho teh: Nâmo tlyma, nama pathlazy hry liata ahy tlyma, athihpa ri vâta pathaih leipa nata khitlyhpazy ama y khiahta cha, Abeipa zawpakhô kyhchhi ama chay hra awpa a châ.

¹¹ Thla nona, noh hrawh hleipalihna noh zâlâ nohtla daihti liata chay aw ei ta, viahchhâ thinô pahlao leipa nata âhnalasi khapazy chhaota ama nie awpa a châ.

¹² A mylâ my taihta khâpa hmah ama pahlôh awpa châ leipa ta, a rupa rai ama thlie awpa châ vei. Zawpakhô kyhchhi liata tao awpa raopa zydua hawhta ama chay awpa a châ.

¹³ Chyhsa pathaihpa châ ta, khitlyna hnei tlôh leipa ta, zawpakhô kyhchhi a chay leipa khiahta deikua cha, cha chyhsa cha a phopi tawhta chhawh pathlahpa a châ aw. Daihti raopa liata Abeipa lâta hmohlâpa a hlâ leipa vâta, cha chyhsa cha a moleina maoh a phaoh aw.

¹⁴ Chihropa chyhsa nama hnohta a pahrâpa ta Abeipa zawpakhô kyhchhi a chay khoh hra khiahta cha, zawpakhô kyhchhi bieraopa nata ryhpa hawhta a chay hra aw. A râh chyhsa nata chihropazy châta ryhpa miakha nama hnei awpa a châ,” tah ta.

Achhyna byureih chô liata meihdo

¹⁵ Achhyna byureih padua noh ta, pahnokheina poh o achhyna byureih cha meihdo ta vaw pahly ta. Zâlâ tawhta my taihta achhyna byureih chô liata mei hawhta a vaw luah ta.

¹⁶ Cha hawhna chata y thlâh ha tyh ta. Nohchhô ta meihdo ta pahly ta, azo ta mei hawhta a luah ta.

¹⁷ Meihdo ta poh o â pasâhsai nahta, Izarei sawzy cha a pasie ei ta, meihdo â duana su liata Izarei sawzy cha a rie tyh ei ta.

¹⁸ Abeipa biepiepa ta Izarei sawzy cha sie lymâ ei ta, Abeipa biepiepa ta a rie ei ta, achhyna byureih chô liata meihdo â chhoh chhôh zydua cha amâ rie thlâh ha tyh.

¹⁹ Meihdo ta achhyna byureih chô liata noh hluhpi a ypa chhao ta, Izarei sawzy cha Abeipa bie zyh ei ta a pasie veih ei.

²⁰ A châh ta meihdo cha achhyna byureih chô liata noh chyhta dei y ta, chatanachata Abeipa biepiepa hawhta a rie ei ta, Abeipa biepiepa hawhta ama sie tyh.

²¹ A châh ta meihdo cha zâlâ tawhta my taihta y ta, my ta meihdo â pasâh nahta sie ei ta, chhô nah zâ ta meihdo â chhoh ha khiahta cha, meihdo â pasâh nahta ama sie tyh.

²² Achhyna byureih chô liata meihdo cha noh no tlyma, thla kha tlyma, kô kha tlyma rai y sala, cha liata â chhoh ngâ thlâh ha khiahta cha, Izarei sawzy cha riehmo liata y thlâh ha ei ta, sie veih ei. Meihdo â pasâh nahta ama sie tyh.

²³ Abeipa biepiepa ta a rie ei ta, Abeipa biepiepa ta sie ei ta, Mawsi hmâpa ta Abeipa biepiepa hawhta, Abeipa bie cha ama zyh lymâ.