MALUHREINA 8 - Mara Bible RV (BSI)

Meiôh miasari

¹ Abeipa ta Mawsi hnohta,

² “Arawna chho la, a hnohta, ‘meiôhzy na pakhaih tita, meiôh miasari ta meiôh tôh hmia lâ a khaih awpa a châ,’ tah teh,” tah ta.

³ Abeipa ta Mawsi bie a piepa hawhta Arawna ta tao ta, meiôhzy cha meiôh tôh hmialâ ta pakhaih ta.

⁴ He he ngôh ta daipa meiôh tôh taozie a châ. A tôh thaby tawhta a pawzy taihta daipa ta taopa châ ta, Abeipa ta a taozie awpa Mawsi a pahmôsapa hawh tlai ta, meiôh tôh cha taopa a châ.

Livai chizy pananona

⁵ Abeipa ta Mawsi chho ta,

⁶ “Izarei sawzy hry tawhta Livai pathlazy panano la, âmo cha pathaisa mah y.

⁷ Âmo pathaisa awpa ta, hetana heta ama chô liata na tao aw: Ama chô liata pathaisana ti thia aw chi ta, ama pôhpa hmi zydua a ngyu aw ei ta, ama chysiazy pasu aw ei ta, amâ pathai aw.

⁸ Chatawhcha viahchao tôh dawpa pô kha, niepa hlâna viahdie dipa sathaw pahlaopa chhaota a chhi aw ei ta, moleina hlâna châta viahchao tôh dawpa pô kha nâ chhi pâ aw.

⁹ Livai pathlazy cha ahmaohna poh o hmiakô lâ a chhi aw chi ta, Izarei zawpi zydua na awpakhy aw ei.

¹⁰ Livai pathlazy cha Abeipa hmiakô lâ a chhi aw chi ta, Izarei sawzy ta Livai pathlazy chô liata ama ku ama pahnieh aw.

¹¹ Arawna ta Livai pathlazy cha, Izarei sawzy tawhta chaluahpa hlâna ta Abeipa hmiakô liata hlâ aw ta, chatanachata Abeipa chakaona rai ama hria thei aw.

¹² Livai pathlazy ta viahchao tôhpazy luh liata ama ku pahnieh aw ei ta, âmo châta chatlaina tao nawpa ta, moleina hlâna châta pô kha hlâ aw chi ta, raopa hlâna ta pô kha na hlâ aw.

¹³ Livai pathlazy cha Arawna nata a sawchapawzy hmiakô liata paduasa aw chi ta, Abeipa lâta chaluahpa hlâna ta na chaluah aw ei.

¹⁴ Cha hawhna chata Izarei sawzy hry tawhta Livai pathlazy cha panano aw chi ta, Livai pathlazy cha kei eih ama châ aw.

¹⁵ Âmo cha pathaisapa ta chaluahpa hlâna ta na chaluah khai tawh ei ta, Livai pathlazy cha chakaona rai hria awpa ta ahmaohna poh o liata amâ ngia aw.

¹⁶ Âmo cha Izarei sawzy hry tawhta kei lâta tlokhuh hlâpa châ ei ta, chhi a pahypa, Izarei pathlazy sawchapaw uhtheipa zydua vyuhpa ta kei eih châ awpa ta ei la ei.

¹⁷ Izarei sawzy hry liata sawchapaw uhtheipa zydua cha, chyhsapa chhao, sahroh chhao, kei eih ama châ. Izi râh liata sawchapaw uhtheipa zydua ei thie khai nota, âmo cha kei châta ei pathaisapazy ama châ.

¹⁸ Chavâta Izarei sawzy hry liata sawchapaw uhtheipa zydua vyuhpa ta, Livai pathlazy cha kei eih ta ei la ei.

¹⁹ Izarei sawzy châta ahmaohna poh o liata chakaona rai hria awpa nata Izarei sawzy ta supathaihpa amâ hnia tita ama hry liata potlana a y lei nawpa ta chatlaina taopa awpa ta, Izarei sawzy hry tawhta Livai pathlazy cha Arawna nata a sawchapawzy hnohta hmosaipiepa ta ei pie ei,” tah ta.

²⁰ Cha hawhna chata Mawsi nata Arawna nata Izarei zawpi zydua ta Livai pathlazy chô liata tao ei ta. Livai pathlazy kyh liata Abeipa ta Mawsi bie a piepa hawhta, Izarei sawzy ta ama chô liata ama tao.

²¹ Livai pathlazy cha ama moleina tawhta a pathai ei ta, ama chysiazy pasu ei ta, Arawna ta âmo cha chaluahpa hlâna ta Abeipa hmiakô liata hlâ ta, âmo pathaisa nawpa ta Arawna ta chatlaina a taopa ei.

²² Cha khai tawhta Livai pathlazy cha Arawna nata a sawchapawzy hmiakô liata chakaona rai hria awpa ta ahmaohna poh o chhôh lâ a ngia ei ta, Livai pathlazy kyh liata Abeipa ta Mawsi bie a piepa hawhta ama chô liata ama tao.

Livai chi chakaona rai nata daihti

²³ Abeipa ta Mawsi hnohta,

²⁴ “He he Livai pathlazy zyh awpa ryhpa a châ. Kô kih nata kô pangawh tawhta chô lâ Livai pathlazy ta ahmaohna poh o liata chakaona rai hria awpa ta amâ ngia aw.

²⁵ Kô sypangawh tawhta cha chakaona rai amâ pahâsai awpa châ ta, ama chakao awpa châ khao vei.

²⁶ Ahmaohna poh o mohôhna kyh liata ama unawhzy rai bao tyh aw ei ta, chakaona rai deikua cha hria khao aw veih ei. Cha hawhna chata Livai pathlazy cha ama raihria awpa na raopa aw ei,” tah ta.