MALUHREINA 6 - Mara Bible RV (BSI)

Nâzarai chyhsa châta ryhpa

¹ Chatawhcha Abeipa ta Mawsi hnohta,

² “Izarei sawzy chho la ama hnohta hetana heta reih teh: Chapaw tlyma, chanô tlyma ta Abeipa châta panano eihpa Nâzarai chyhsa châ awpa ta bietai a ipa a tao khiahta cha,

³ kresawhti nata paritheipazy â taih awpa a châ. Kresawhti thaopa nata hmo thaopa tizy a doh awpa châ leipa ta, kre ti a doh awpa châ hra leipa ta, kre thei hrohpa nata chawhpazy a nie awpa châ vei.

⁴ Nâzarai a châ chhôh zydua cha kre zôh tawhta a puapa kheihawhpa rai a nie awpa châ leipa ta, kre hmô nata a hyh zy chhao a nie awpa châ vei.

⁵ “Nâzarai châ awpa ta bie â taih chhôh zydua a luh â ngyu awpa châ vei. Abeipa châta â pananona noh â ki hlâlei a pathaih awpa châ ta, a luh sâ â paseih awpa a châ.

⁶ “Abeipa châta â panano chhôh zydua athihpa ri â hnia awpa châ vei.

⁷ Khazohpa châta â pananona a luh liata a ypa vâta, a paw tlyma, a nô tlyma, a unawhpa tlyma, a sietanô tlyma ama thipa chhao ta, ama ri a hniapa ta â papuapalei awpa châ vei.

⁸ Â panano chhôh zydua Abeipa châta pathaihpa a châ aw.

⁹ “Chyhsa ta eikhapi ta a kiapâh liata thi sala, â pananona luh a papuapalei khiahta cha, ano pathaisana noh, a noh sarina noh ta a luh â ngyu awpa a châ.

¹⁰ A noh chariena noh ta theihthaipa hnohta vachhuh pô no tlyma, pivaw pô no tlyma ahmaohna poh o chhikao liata vaw cheih aw ta,

¹¹ theihthaipa ta pô kha moleina hlâna châta hlâ aw ta, ahropa raopa hlâna ta a hlâ aw. Cha hawhna chata athihpa ri vâta a moleina cha chatlaina taopa aw ta, cha noh lia tlai ta a luh cha a pathaisa aw.

¹² Thaileichâna hlâna châta mietakutaw chapawpa kô khapa cheih aw ta, Nâzarai a châna nohzy Abeipa lâta a pazao heih aw. Â pananona papuapaleipa a châ hapa vâta, hmialâ ta â pananona nohzy reipa châ khao aw vei.

¹³ “He he Nâzarai chyhsa châta ryhpa, â pananona noh â ki tita tao awpa a châ. Ahmaohna poh o chhikao liata a chhipa châ aw ta,

¹⁴ Abeipa lâta a hmohlâpa a hlâ aw. Raopa hlâna châta mietakutaw chapawpa kô khapa seina hnei leipa pô kha, moleina hlâna châta mietakutaw chanôpa kô khapa seina hnei leipa pô kha, aryhna hlâna châta mietaku tôhpa seina hnei leipa pô kha a hlâ aw.

¹⁵ Niepa hlâna nata dopa hlânazy chhao hlâ aw ta, cha liata thinô pahlao leipa viahchhâ nata viahdie dipa sathaw pahlaopa ta pakâhpa viahchhâzy nata thinô pahlao leipa viahchhâ apapa sathaw hniapa zy hrâbyh hmo kha a hlâ aw.

¹⁶ Theihthaipa ta chazy cha Abeipa hmiakô lâ cheih aw ta, moleina hlâna nata raopa hlâna cha a hlâpa aw.

¹⁷ Thinô pahlao leipa viahchhâ hrâbyh chhaota mietaku tôhpa cha aryhna hlâna ta Abeipa lâ hlâ aw ta, amâ chakaihpa niepa hlâna nata dopa hlânazy chhao theihthaipa ta a hlâ aw.

¹⁸ Nâzarai chyhsa ta â pananona luh cha ahmaohna poh o chhikao liata ngyu aw ta, â pananona luh liata a sâ la aw ta, aryhna hlâna atheihna ry liata mei liata a phôh aw.

¹⁹ Nâzarai chyhsa ta â pananona luh â ngyuh khai tawhta, theihthaipa ta mietaku tôhpa palaih pasyu chiehpa la aw ta, hrâbyh liata thinô pahlao leipa viahchhâ tlâ kha nata thinô pahlao leipa viahchhâ apapa tlâ kha la aw ta, Nâzarai chyhsa ku liata a chabasa aw.

²⁰ Theihthaipa ta chazy cha chaluahpa hlâna ta Abeipa hmiakô liata a chaluah aw. Chaluahpa palôh nata chalopa phei cha theihthaipa tovyuh pathaihpa a châ. Cha khai tawhta Nâzarai cha kresawhti a doh thei aw.

²¹ “Chazy cha Nâzarai chyhsa châta ryhpa a châ. A hneina ta tloh sala, Nâzarai bietai a lapa hleikhô ta, Abeipa lâta hmohlâpa pie awpa bie â taih chhi khiahta cha, a bietai a patlô awpa châ ta, cha cha Nâzarai chyhsa tao awpa ryhpa hleikhô ta a tao chhi awpazy a châ,” tah ta.

Theihthaipa byhnâ awna

²² Abeipa ta Mawsi hnohta,

²³ “Arawna nata a sawchapawzy chho teh, Izarei sawzy châta hetana heta byhnâ aw awpa a châ,” tah ta:

²⁴ “Abeipa ta byhnâ cha pie ei sala, Cha vaih lymâ mawh ei sy!

²⁵ Abeipa ta a hmia nama chô liata pakhaihsa sala, Cha ngiachhie mawh ei sy!

²⁶ Abeipa ta nâmo lâ a vaw heih sala, Thlalôhna cha pie mawh ei sy!”

²⁷ “Cha hawhna chata Izarei sawzy chô liata ei moh paysa aw ei ta, kei ta âmo cha byhnâ ei pie aw ei,” tah ta.