MALUHREINA 5 - Mara Bible RV (BSI)

Pathaih leipazy papuana

¹ Abeipa ta Mawsi chho ta,

² “Izarei sawzy chho la, ama hnohta hetana heta reih teh: Phawhpa tlyma, thihniah lohpa tlyma, athihpa vâta tlyma, pathaih leipa zydua riehmo tawhta papua khai awpa a châ.

³ Ama hry liata ei pahrâna ama riehmo ama papuapalei lei nawpa ta, chapaw chhao, chanô chhao, riehmo tawhta papua khai awpa a châ,” tah ta.

⁴ Izarei sawzy ta cha hawhna chata tao ei ta, pathaih leipazy cha riehmo khôtho lâ paysa ei ta, Abeipa ta Mawsi hnohta a reipa hawh tlai ta Izarei sawzy ta tao ei ta.

Hmo paraopa ty thôna ryhpa

⁵ Abeipa ta Mawsi hnohta,

⁶ “Izarei sawzy chho la ama hnohta hetana heta reih teh: Chapaw tlyma, chanô tlyma, chyhsazy hmo parao tyhpa kheihawhpa tlyma paraopa ta, Abeipa chô liata ngâchhih leipa ta y sala, thailei a châ khiahta cha,

⁷ moleina hmo a taopa cha phuah aw ta, a hmo paraona mâ â kipa ta a thô aw. Cha thota, a paraopa mâ su pangawh su kha baichha aw ta, a hmo a paraopa chyhsa hnohta a pie aw.

⁸ Hmo paraona ty thô awpa chyhsa cha thi ha sala, a ryu a to awpa ama y vei khiahta deikua cha, moleina ty thôna sôh cha Abeipa eih châ aw ta, a molei chatlaina taona mietaku tôhpa chhaota theihthaipa hnohta a pie aw.

⁹ Theihthaipa lâta ama cheipa Izarei sawzy hmohlâpa pathaihpa zydua cha theihthaipa eih a châ aw.

¹⁰ Hmohlâpa pathaihpazy cha a hlâtuhpa eih châ ta, theihthaipa hnohta a piepazy deikua cha theihthaipa eih a châ,” tah ta.

Apheina pasiana

¹¹ Abeipa ta Mawsi hnohta,

¹² “Izarei sawzy chho la ama hnohta hetana heta reih teh: Chyhsa lapinô ta lâpi doleipa lâ tleipa ta, a vahpa châta ngâchhih leipa sala;

¹³ chapaw hropa ta ano cha a ziakheipa ta, chanô cha anosasyh ta â papuapalei hapa chhao ta, arulâta hmotaopa châ ta, a tao hai nota ku patupa a châ leipa vâta a pahnopa y leipa ei ta, chavâta a vahpa ta pahno leipa sala;

¹⁴ châhrasala a vahpa ta hiatliana palôh hneipa ta, a lapinô cha â papuapalei hapa vâ tlai ta a ngâ khao leipa châ sala tlyma, â papuapalei leipa chhao ta, hiatliana palôh vâta a lapinô cha a ngâ khao leipa khiahta cha,

¹⁵ a lapinô cha theihthaipa hnohta a chhi aw ta, a lapinô châta hmo hlâ awpa bâli sâh kachu su hrawh su kha a cheipa aw. Hiatliana niepa hlâna châ ta, paraona atheithlâhna niepa hlâna a châpa vâta, bâli sâh cha sathaw a bao awpa châ leipa ta, deiryh chhao a chô liata a soh awpa châ vei.

¹⁶ “Theihthaipa ta chanô cha a chhi aw ta, Abeipa hmiakô liata a paduasa aw.

¹⁷ Theihthaipa ta alei beih chhôh liata ti pathaihpa ryh aw ta, achhyna byureih siphiah liata buchadoh la aw ta, ti liata a mia aw.

¹⁸ Theihthaipa ta chanô cha Abeipa hmiakô liata paduasa aw ta, a sâ pathliahsa aw ta, atheithlâhna niepa hlâna cha a ku liata a chabasa aw. Cha cha hiatliana niepa hlâna châ ta, theihthaipa ta chhiesana a patlôsapa ti khapa a ku liata â chaba aw.

¹⁹ Chatawhcha theihthaipa ta chanô cha bie pataihsa aw ta, a hnohta, ‘Nâ vahpa ry liata na y thlâh ha nota chapaw hropa ahy hmahta ama châ ziakhei leipa khiahta nata pathaih leipa ta na y leipa khiahta cha, he ti khapa, chhiesana a patlôsapa heta na chô liata biehnei aw vei.

²⁰ Ngâchhih leipa ta y chi ta, na vahpa ry liata na y thlâh ha nota, na vahpa a châ leipa chapaw ta châ ziakheipa ta, nâ papuapalei ha khiahta deikua cha,’

²¹ he liana heta theihthaipa ta chanô cha chhiesana bietai pahneisa aw ta, a hnohta, ‘Abeipa ta na phopi hry liata chhiesapa nata dythapa ta cha tao mawh sy. Na byhpi pazaohsa sala, na py pathlohsa mawh sy.

²² He chhiesana a patlôsapa ti he na py chhôh lâ a ngia sala, na py pathlohsapa ta, na byhpi a pazaohsa mawh sy,’ tah aw ta, chanô ta, ‘Amen, Amen,’ a tah aw.

²³ “Cha khai tawhta theihthaipa ta chhiesana biezy cha châbu liata roh aw ta, ti khapa liata pachie aw ta,

²⁴ chhiesana a patlôsapa ti khapa cha chanô a padosa aw. Chhiesana a patlôsapa ti cha a py chhôh lâ a ngia aw ta, pasana thata a tao aw.

²⁵ Theihthaipa ta hiatliana niepa hlâna cha chanô ku tawhta la aw ta, niepa hlâna cha Abeipa hmiakô liata chaluah aw ta, maisâh lâ â vy khei aw.

²⁶ Theihthaipa ta atheithlâhna hmo châta niepa hlâna cha pazah kha la aw ta, maisâh liata rao aw ta, cha khai tawhta ti cha chanô a padosa aw.

²⁷ Ti a padosa khai tawhta hetana heta a vaw y aw: A papuapaleipa ta, a vahpa châta ngâchhih leipa ta a y ha tlai khiahta cha, chhiesana a patlôsapa ti cha a chhôh lâ a ngia aw ta, thata vaw pasa aw ta, a py vaw thloh aw ta, a byhpi a vaw zaoh aw. Chatanachata chanô cha a phopi hry liata chhiesapa ta a y aw.

²⁸ Chanô cha a papuapalei leipa sala, a pathaih khiahta cha, a chô liata khâpa hmah tlô leipa aw ta, chi chhao a pathla thei aw.

²⁹ “Cha cha hiatliana kyh liata ryhpa cha châ ta, lapinô ta a vahpa ry liata a y thlâh ha nota, ngâchhih leipa ta â papuapaleina kyh liata ryhpa a châ.

³⁰ Chapaw ta hiatliana vaw hnei ta, a lapinô chô liata a hiatlia tita, theihthaipa ta chanô cha Abeipa hmiakô liata paduasa aw ta, cha ryhpa zydua hawhna chata a chô liata a tao aw.

³¹ Chapaw cha paraona tawhta pathaih aw ta, chanô deikua cha a paraona maoh a phaoh aw,” tah ta.