MALUHREINA 4 - Mara Bible RV (BSI)

Livai chi rai hria awpa

¹ Abeipa ta Mawsi nata Arawna chho ta,

² “Livai pathlazy hry liata Kôhâ pathlazy cha, a pho pho ta nata a chhôh chhôh ta ama maluh reih u la,

³ kô sythôh tawhta chô lâ kô sypangawh taih, ahmaohna poh o liata chakaona rai a hria thei awpa maluh zydua nama reih khai awpa a châ.

⁴ Hezy he ahmaohna poh o liata Kôhâ sawchapawzy hria awpa, hmo pathaih chaipazy mohôhna chakaona rai a châ.

⁵ “Riehmo a pasie awpa a châna maihta Arawna nata a sawchapawzy a ngia aw ei ta, pohraipa pathla aw ei ta, cha chata Biehrai Byh ama khu aw.

⁶ Cha cha tilaipi viahchao vo ta khu pachhuah aw ei ta, cha chô liata poh nohpa ta khu aw ei ta, a lâzy ama chahraoh aw.

⁷ “Ypâna viahchhâ tlâhkhai chô liata poh nohpa phaw aw ei ta, cha chô liata beikohzy, phiahthlazy, biebuhzy nata dopa hlâna patlai nawpa nyuzy soh aw ei ta, chiepadâh leipa ta viahchhâ so tyhpa chhao tlâhkhai chô liata a y awpa a châ.

⁸ Chazy cha poh nohsaihpa ta khu aw ei ta, tilaipi viahchao vo ta khu pachhuah aw ei ta, a lâzy ama chahraoh aw.

⁹ “Khaihna a pie awpa meiôh sona tôhzy, a meiôhzy, a chaikiezy, meipaoh sonazy nata sathaw ôh zydua poh nohpa ta ama khu khai aw.

¹⁰ Cha cha nata a chhaichhi zydua cha tilaipi viahchao vo ta taopa khuna poh ta chaty aw ei ta, asyna lâzy chô liata ama soh aw.

¹¹ “Ngôh maisâh chô liata poh nohpa phaw aw ei ta, tilaipi viahchao vo ta khu aw ei ta, a lâzy ama chahraoh aw.

¹² Supathaihpa liata hmâpa chakaona hmobaoh zydua la aw ei ta, poh nohpa ta chaty aw ei ta, tilaipi viahchao vo ta khu aw ei ta, asyna lâ chô liata ama soh aw.

¹³ Maisâh liata meipaoh hru aw ei ta, a chô liata poh nohpa ama phaw aw.

¹⁴ Cha chô liata maisâh liata chakaona châta hmâpa hmobaoh zydua soh aw ei ta, mei lanazy, sa thaona thuakuzy, buchâh linazy, rahôzy, maisâh hmobaoh zydua cha soh aw ei ta, chazy cha tilaipi viahchao vo ta khu aw ei ta, a lâzy ama chahraoh aw.

¹⁵ “Arawna nata a sawchapawzy ta supathaihpa nata supathaihpa hmobaoh zydua ama khu khai tawhta, riehmo a pasie awpa a châ tita, Kôhâ pathlazy ta supathaihpa nata a hmobaohzy cha amâ sy tyh aw. Hmo pathaihpazy deikua ama hria awpa châ vei. Chataleipatala ama thi pathlei aw. Chazy cha Kôhâ sawchapawzy ta ahmaohna poh o liata ama chakaona rai hria awpazy a châ.

¹⁶ “Theihthaipa Arawna sawchapawpa Eliaza mohôh awpazy cha meiôh pakhaih nawpa sathaw, ropahâhpa, a daihtita ta niepa hlâna tao tyhpa nata sathaw pathaihpa zy châ aw ta, achhyna byureih nata a chhôh liata hmo a ypa zydua nata supathaihpa nata a hmobaohzy chhao a mohôh aw,” tah ta.

¹⁷ Abeipa ta Mawsi nata Arawna hnohta,

¹⁸ “Kôhâ pathla chi nata phozy Livai chi tawhta chhawh pathlahpa ta ama y awpa châ vei.

¹⁹ Chavâta hmo pathaih chaipazy amâ hnia nota thi leipa ta ama y thei nawpa ta, hetana heta âmo châta ryh nama rao aw: Arawna nata a sawchapawzy ta supathaihpa lâ a ngia aw ei ta, Kôhâ chizy hria awpa nata maophaohnazy ama rai aw.

²⁰ Khupa hmo pathaihpazy moh awpa ta deikua amâ ngia awpa châ vei. Chataleipatala ama thi pathlei aw,” tah ta.

²¹ Abeipa ta Mawsi chho ta,

²² “Kesao pathlazy chhao a pho pho ta nata a chhôh chhôh ta ama maluh reih teh.

²³ Kô sythôh tawhta a chô lâ kô sypangawh taih, ahmaohna poh o liata chakaona rai a hria thei awpa maluh zydua na reih khai awpa a châ.

²⁴ Kesao pathlazy hria awpa cha chakaona nata hmo phaona lâ a châ aw.

²⁵ Achhyna byureih nata ahmaohna poh o pohraipazy, a khuna poh nata a khu pachhuahna tilaipi viahchao vo nata ahmaohna poh o chhikao pohraipa,

²⁶ dôhpachhôh tlyhmia pohraipazy, achhyna byureih kiapâh liata dôhpachhôh tlyhmia chhikao nata maisâh chadô pohraipazy nata chaorizy phaoh aw ei ta, chazy nata a zaokhipa chakaona rai zydua ama hria khai aw.

²⁷ Kesao pathlazy raihria awpa zydua cha, ama phao awpa nata ama hria awpa kyh zydua liata, Arawna nata a sawchapawzy biehneina ry liata a y khai aw. Hmo ama phao awpa zydua liata maophaohna chaba awpa ta, Arawna nata a sawchapawzy na rao aw ei.

²⁸ Chazy cha ahmaohna poh o liata Kesao chi nata phozy chakaona rai hria awpa châ ta, theihthaipa Arawna sawchapawpa Ithamâ chhihthana ry liata ama hria aw.

²⁹ “Merâri pathlazy maluh chhao a pho pho ta nata a chhôh chhôh ta reih aw chi ta,

³⁰ kô sythôh tawhta chô lâ kô sypangawh taih, ahmaohna poh o liata chakaona rai a hria thei awpa maluh zydua na reih khai awpa a châ.

³¹ Hezy he ahmaohna poh o liata chakaona rai hria awpa ta ama hnohta maophaohna piepa a châ: Achhyna byureih thophiazy, thophia tlâhzy, thophia tôhzy nata thophia patyunazy,

³² dôhpachhôh tlyhmia dôhna tôhzy, a patyunazy, a khaipânazy, a chaorizy, a chhaichhi zydua nata a hmobaoh hropa zydua phaoh aw ei ta, ama phao awpazy cha ama moh ta na rai tyh aw ei.

³³ Chazy cha ahmaohna poh o liata Merâri chi nata phozy chakaona rai hria awpa châ ta, theihthaipa Arawna sawchapawpa Ithamâ chhihthana ry liata ama hria aw,” tah ta.

³⁴ Kôhâ pathlazy maluh cha, Mawsi nata Arawna nata zawpi hyutuhpazy ta a pho pho ta nata a chhôh chhôh ta reih ei ta,

³⁵ kô sythôh tawhta chô lâ kô sypangawh taih, ahmaohna poh o liata chakaona rai a hria thei awpa,

³⁶ a pho pho ta reipa Kôhâ pathla maluh cha 2,750 a châ.

³⁷ Chazy cha, Abeipa ta Mawsi hmâpa ta bie a piepa hawhta, ahmaohna poh o liata chakaona rai a hriapa Kôhâ pathlazy maluh, Mawsi nata Arawna ta ama reipazy a châ.

³⁸ Kesao pathlazy maluh chhao a pho pho ta nata a chhôh chhôh ta reipa châ ta,

³⁹ kô sythôh tawhta chô lâ kô sypangawh taih, ahmaohna poh o liata chakaona rai a hria thei awpa,

⁴⁰ a pho pho ta nata a chhôh chhôh ta reipa Kesao pathla maluh cha 2,630 ama châ.

⁴¹ Chazy cha, Abeipa biepiepa hawhta, ahmaohna poh o liata chakaona rai a hriapa Kesao pathlazy maluh, Mawsi nata Arawna ta ama reipazy a châ.

⁴² Merâri pathlazy maluh chhao a pho pho ta nata a chhôh chhôh ta reipa châ ta,

⁴³ kô sythôhpa tawhta a chô lâ kô sypangawhpa taih, ahmaohna poh o liata chakaona rai a hria thei awpa,

⁴⁴ a pho pho ta reipa Merâri pathla maluh cha 3,200 ama châ

⁴⁵ Chazy cha, Abeipa ta Mawsi hmâpa ta bie a piepa hawhta, ahmaohna poh o liata chakaona rai a hriapa Merâri pathlazy maluh, Mawsi nata Arawna ta ama reipazy a châ.

⁴⁶ Livai chi maluh zydua cha, Mawsi nata Arawna nata Izarei hyutuhpazy ta a pho pho ta nata a chhôh chhôh ta reih ei ta,

⁴⁷ kô sythôh tawhta chô lâ kô sypangawh taih, ahmaohna poh o liata chakaona rai a hria thei awpa nata ahmaohna poh o hmobaoh a phaoh thei awpa,

⁴⁸ Livai chi maluh rei theipa cha 8,580 a châ.

⁴⁹ Mawsi hmâpa ta Abeipa biepiepa hawhta, chyhsa to chakaona raihria awpa nata hmo phao awpa zy rao khaipa a châ. Chatanachata Abeipa ta Mawsi bie a piepa hawhta, Livai chi maluh cha rei khaipa a châ.