MALUHREINA 35 - Mara Bible RV (BSI)

Livai chi khihpizy

¹ Zerikô dady Zawdâh kiapâh Môabâ bypi liata Abeipa ta Mawsi bie a chho ta, a hnohta,

² “Izarei sawzy hnohta, ryuto râh ama hneipa tawhta Livai chi pahrâ nawpa khihpizy châta râh a chhaih awpa ta biepie teh. Khihpizy chaby liata sibiepa suzy chhao sahroh pasana châta nama pie pâ aw.

³ Khihpizy cha ama pahrâ nawpa châta châ aw ta, sibiepa suzy cha ama viahchao, ama sahroh nata ama sa zydua châta a châ aw.

⁴ Livai chi na pie awpa sibiepa suzy cha khihpi thokhy tawhta dy sâh kha a kawh awpa a châ.

⁵ Khihpi cha a liah liata sopa ta, khihpi thokhy tawhta thlie aw chi ta, nochhi lâta dy sâh no, chho lâta dy sâh no, notla lâta dy sâh no, maw lâta dy sâh no a châ aw.

⁶ “Livai chi nama pie awpa khihpizy hry liata khihpi miacharupazy cha abohna khihpizy châ aw ta, lianycheihpazy a râ nawpa khihpizy a châ aw. Cha khihpizy thota khihpi sypalih nata miano nama baichha aw.

⁷ Livai chi nama pie awpa khihpi zydua cha, ama sibiepa suzy chhaota, khihpi sypalih nata miacharie a châ aw.

⁸ Izarei sawzy nama pie awpa ryuto râhzy tawhta, ama ryuto râh lai nata chyh mopa ta, chi lai viapazy tawhta râh lai via la aw ei chi ta, chi chyh viapazy tawhta râh chyh via la aw ei chi ta, Livai chi hnohta khihpizy ama pie chyu aw,” tah ta.

Abohna khihpizy

⁹ Abeipa ta Mawsi bie a chho ta, a hnohta,

¹⁰ “Izarei sawzy chho la, ama hnohta hetana heta reih teh: Zawdâh chakapa ta Kâna râh namâ ngia tita,

¹¹ chyhsa a thie tlamawpa lianycheihpa a râ nawpa ta, khihpi thokha cha abohna khihpizy ta nama rao aw.

¹² Lianycheihtuhpa cha a thâtih pachia awpa ta zawpi hmia liata â duah hlâta a thi lei nawpa ta, cha khihpizy cha phuh latuhpazy tawhta namâ bohna a châ aw.

¹³ Khihpi nama pie awpazy tawhta abohna khihpi miacharu nama rao aw.

¹⁴ Zawdâh haosâ lâ khih thôh rao aw ei chi ta, Kâna râh liata khih thôh châ aw ta, chazy cha abohna khihpizy a châ aw.

¹⁵ Cha khihpi miacharupazy cha, Izarei sawzy châta abohna khihpizy châ aw ei ta, chihropa nata ama hnohta a pahrâpazy châta abohna khihpizy châ hra aw ta, chyhsa a thie tlamawpa maihta amâ râ nawpa khihpizy a châ aw.

¹⁶ “Thua chhaichhi hmâpa ta chyhsa phy sala, cha chyhsa cha a thi khiahta deikua cha, liany a cheihpa châ ta, lianycheihtuhpa cha thie thlyu awpa a châ.

¹⁷ Chyhsa thi theina alô chhaichhi hmâpa ta chyhsa phy sala, cha chyhsa cha a thi khiahta cha, liany a cheihpa châ ta, lianycheihtuhpa cha thie thlyu awpa a châ.

¹⁸ Chyhsa thi theina tho chhaichhi hmâpa ta phy sala, cha chyhsa cha a thi khiahta cha, liany a cheihpa châ ta, lianycheihtuhpa cha thie thlyu awpa a châ.

¹⁹ Thisaih phuh latuhpa ta lianycheihtuhpa cha a thie awpa châ ta, a hmô tita a thie aw.

²⁰ “Chyhsa ta ahaona vâta chyhsa chatitha sala tlyma, a byhkhâhpa ta khâpa tlyma ta vawh sala tlyma, cha chyhsa cha a thi khiahta tlyma,

²¹ cha leipa chhao ta, ahaona vâta a ku ta a chôpa ta, cha chyhsa cha a thi khiahta tlyma, kupathlatuhpa cha thie thlyu awpa a châ. Liany a cheihpa châ ta, thisaih phuh latuhpa ta a hmô tita a thie aw.

²² “Châhrasala ahaona vâta châ leipa ta, chatitha tlamawpa vâta tlyma, a byhkhâh leipa ta khâpa tlyma ta vawh tlamawpa vâta tlyma,

²³ hmô leipa ta, chyhsa thi theina alô pathla thlu tlamawpa vâta tlyma, cha chyhsa cha thi sala, a chariahpa châ leipa sala, pasasa â chhuahpa a châ vei khiahta cha,

²⁴ he ryhpazy he hmâpa ta, lianycheihtuhpa nata thisaih phuh latuhpa likah liata zawpi ta ama pachiapa aw.

²⁵ Zawpizy ta lianycheihtuhpa cha thisaih phuh latuhpa ku tawhta pachha aw ei ta, a boh awpa ta â râna, â bohna khihpi liata ama paysa aw. Sathaw pathaihpa ta sathawthupa theihthai beichaipa a thi hlâlei, cha liata a y thlâh ha awpa a châ.

²⁶ Khatino rai ta, lianycheihtuhpa ta â râna abohna khihpi râhri khô lâ pua sala,

²⁷ thisaih phuh latuhpa ta ano cha abohna khihpi râhri khô lâta hmô sala, thisaih phuh latuhpa ta lianycheihtuhpa cha a thie khiahta deikua cha, thisaih phuh latuhpa chô liata thisaih maoh y aw vei.

²⁸ Liahnycheihtuhpa cha, theihthai beichaipa a thi hlâlei abohna khihpi liata pahrâ aw ta, theihthai beichaipa a thi tawhta deikua cha, a ryuto râh lâ â lie thei aw.

²⁹ “Cha hmozy cha, nama pahrâna su zydua liata nama chhâ zydua châta bieraopa nata pachianazy a châ aw.

³⁰ Chyhsa ta chyhsa a thie khiahta cha, pahnotuhpazy pakah tawhta bie a puapa ta thie awpa a châ. Châhrasala pahnotuhpa pakha bie dei ta chyhsa ahy hmah thie awpa châ vei.

³¹ Cha dei châ vei, liahnycheihtuhpa chatlaina sôh nama la awpa châ vei. Thina taihta thailei a châpa châ ta, thie thlyu awpa a châ.

³² Abohna khihpi lâ a râpa châta chhao, theihthai beichaipa a thi hlâta a râh lâ â lie thei nawpa ta chatlaina sôh nama lapa awpa châ vei.

³³ Nama pahrâna râh nama papuapalei awpa châ vei. Thisaih ta râh papuapalei ta, thisaih palotuhpa thisaih dei leipa ta cha, khâpa chatlaina ta hmah râh chô liata thisaih palo thlupa cha pathaisa thei vei.

³⁴ Kei Abeipa he Izarei sawzy hry liata pahrâ tlôh na ta, chavâta nama hnohta ei yna râh, nama pahrâna râh he nama papuapalei awpa châ vei,” tah ta.