MALUHREINA 34 - Mara Bible RV (BSI)

Bietai râh râhrizy

¹ Abeipa ta Mawsi hnohta,

² “Izarei sawzy chho la, ama hnohta hetana heta biepie teh: Kâna râh nama tlô tita, nama ryuto râh a châ awpa Kâna râhri cha he hawhta a châ aw.

³ Chho lâta Zini râhchawhpa tawhta Edômâ râh a ripa ta sie aw ta, chho lâta nama râhri cha Tilaipi Iahpa chhâna tawhta nochhi lâta a sie aw.

⁴ Nama râhri cha Akarâbi lâ kiana chho lâ chhâh ta pako aw ta, Zini lâ sie aw ta, Kâdesbânia chho lâta pua aw ta, Hâzarâdy chapiapa ta, Azmaw lâta a sie aw.

⁵ Râhri cha Azmaw tawhta Izi Chavah lâ pako aw ta, tilaipi liata a chhâ aw.

⁶ “Notla lâ cha Tilaipi Kawhpa taih châ aw ta, cha cha notla lâta nama râhri a châ aw.

⁷ “He he Maw lâta nama râhri a châ aw: Tilaipi Kawhpa tawhta Hôri Tlâh lâta sie aw ta,

⁸ Hôri Tlâh tawhta Lebô-hâmâ lâ sie aw ta, Zedâ liata a chhâ aw.

⁹ Cha tawhna chata râhri cha Ziparaw lâta sie aw ta, Hâzarenâ liata a chhâ aw. Cha cha maw lâta nama râhri a châ aw.

¹⁰ “Nochhi lâta nama râhri cha Hâzarenâ tawhta Sephe taih a châ aw.

¹¹ Râhri cha Sephe tawhta Aina nochhi lâta Riblâ taih a zu aw. Râhri cha zu lymâ aw ta, Chinere Tipo nochhi lâ tlôna taihta a sie aw.

¹² Cha tawhna chata râhri cha Zawdâh lâta zu aw ta, Tilaipi Iahpa liata a chhâ aw. Cha râhri pakhâhpazy chhôh cha nama râh a châ aw,” tah ta.

¹³ Mawsi ta Izarei sawzy biepie ta, ama hnohta, “Cha râh cha Abeipa ta chi chaki nata chi khophiepa pie awpa ta bie a piepa, nuby a daopa ta nama to awpa ryuto râh a châ.

¹⁴ Rubena pathla nata Kâdâ pathla chizy deikua cha a chhôh chhôh ta ryuto râh to ha ei ta, Manase chi khophie chhao ama to ha hra.

¹⁵ Chi nopazy nata chi khophie cha, ama ryuto râh châta Zerikô dady ta a ypa Zawdâh haosâ, nochhi baih lâta râhzy ama to haw,” tah ta.

Izarei chi chhituhpazy

¹⁶ Abeipa ta Mawsi hnohta,

¹⁷ “Hezy he ryu ta nama to awpa râh châ rai awpa chyhsazy moh a châ: Theihthaipa Eliaza nata Nunâ sawchapawpa Zawsua ta ryuto râh cha ama cha rai aw.

¹⁸ Ryuto râh raina liata âmo bao awpa ta, chi to tawhta chhituhpa pakha chyu nama rao aw.

¹⁹ Cha chyhsazy moh cha, Zudâh chi tawhta Zephune sawchapaw Kâlebâ;

²⁰ Simeôna chi tawhta Amihu sawchapaw Samuela;

²¹ Benzami chi tawhta Kislaw sawchapaw Eliadâ;

²² Dânâ chi tawhta Zôkali sawchapaw Buki;

²³ Zawsi pathla Manase chi tawhta chhituhpa pakha, Ephô sawchapaw Hânie;

²⁴ Epharai chi tawhta chhituhpa pakha, Siphatâ sawchapaw Kemua;

²⁵ Zebulawna chi tawhta chhituhpa pakha, Pânâ sawchapaw Elizaphâ;

²⁶ Iskâra chi tawhta chhituhpa pakha, Azani sawchapaw Pâtie;

²⁷ Asera chi tawhta chhituhpa pakha, Selômi sawchapaw Ahihu nata

²⁸ Nâthalai chi tawhta chhituhpa pakha, Amihu sawchapaw Pedahe zy ama châ aw,” tah ta.

²⁹ Âmo cha Kâna râh liata Izarei sawzy ryuto râh rai awpa ta Abeipa ta bie a piepazy ama châ.