MALUHREINA 33 - Mara Bible RV (BSI)

Izarei siena lâpi

¹ Hezy he Izarei sawzy ta Izi râh ama puasai nota, Mawsi nata Arawna chhihthana ry liata a chhâh chhâh ta nata a py py ta ama siena su mohzy a châ.

² Abeipa biepie hawhta, Mawsi ta a chhâh chhâh ta ama siena su mohzy cha roh ta, hezy he a chhâh chhâh ta ama siena su mohzy cha a châ.

³ Izarei sawzy cha thla khana liata Râmese tawhta pua ei ta. Thla khana, noh hrawh hleipangawhna noh, Zawpakhô noh mylâ ta, Izarei sawzy cha Izi mo zydua mohmô liata hmiakai kawpa ta ama pua.

⁴ Izi mo ta Abeipa ta ama sawchapaw uhtheipa a thie khai hapazy ama pabu hai nota, Izarei sawzy cha pua ei ta. Abeipa ta Izi mo khazohzy chô liata chhao hriena a patlôsa ha hra.

⁵ Izarei sawzy cha Râmese tawhta pua ei ta, Sukô liata riehmo paryh ei ta.

⁶ Sukô tawhta pua ei ta, râhchawhpa tytuapa Ethamâ liata riehmo ama paryh.

⁷ Ethamâ tawhta pua ei ta, Bâlâzephô nochhi lâta a ypa Pihahirô lâ kua ei ta, Mikadô kiapâh liata riehmo ama paryh.

⁸ Pihahirô tawhta pua ei ta, tilaipi liah liata siepahliepa ta râhchawhpa lâ a ngia ei ta, Ethamâ râhchawhpa liata noh thôh sie ei ta, Marâh liata riehmo ama paryh.

⁹ Marâh tawhta pua ei ta, tihnawh hnawh hrawh hleino nata thiahrâ kô kô sysari yna Elima tlô ei ta, cha liata riehmo ama paryh.

¹⁰ Elima tawhta pua ei ta, Tilaipi Saihpa kiapâh liata riehmo ama paryh.

¹¹ Tilaipi Saihpa tawhta pua ei ta, Sini râhchawhpa liata riehmo ama paryh.

¹² Sini râhchawhpa tawhta pua ei ta, Dôpakâ liata riehmo ama paryh.

¹³ Dôpakâ tawhta pua ei ta, Alusa liata riehmo ama paryh.

¹⁴ Alusa tawhta pua ei ta, Rephidi liata riehmo ama paryh. Cha cha zawpi do awpa ti y leina su kha a châ.

¹⁵ Rephidi tawhta pua ei ta, Sinai râhchawhpa liata riehmo ama paryh.

¹⁶ Sinai râhchawhpa tawhta pua ei ta, Kibarôhâtavâ liata riehmo ama paryh.

¹⁷ Kibarôhâtavâ tawhta pua ei ta, Hazerô liata riehmo ama paryh.

¹⁸ Hazerô tawhta pua ei ta, Rithamâ liata riehmo ama paryh.

¹⁹ Rithamâ tawhta pua ei ta, Rimôpere liata riehmo ama paryh.

²⁰ Rimôpere tawhta pua ei ta, Libnâ liata riehmo ama paryh.

²¹ Libnâ tawhta pua ei ta, Risâ liata riehmo ama paryh.

²² Risâ tawhta pua ei ta, Kehelathâ liata riehmo ama paryh.

²³ Kehelathâ tawhta pua ei ta, Sephe Tlâh liata riehmo ama paryh.

²⁴ Sephe Tlâh tawhta pua ei ta, Hâradâ liata riehmo ama paryh.

²⁵ Hâradâ tawhta pua ei ta, Mâkhelô liata riehmo ama paryh.

²⁶ Mâkhelô tawhta pua ei ta, Tahâ liata riehmo ama paryh.

²⁷ Tahâ tawhta pua ei ta, Terâ liata riehmo ama paryh.

²⁸ Terâ tawhta pua ei ta, Mithakâ liata riehmo ama paryh.

²⁹ Mithakâ tawhta pua ei ta, Hasmônâ liata riehmo ama paryh.

³⁰ Hasmônâ tawhta pua ei ta, Môserô liata riehmo ama paryh.

³¹ Môserô tawhta pua ei ta, Benezakâ liata riehmo ama paryh.

³² Benezakâ tawhta pua ei ta, Hôhakikâ liata riehmo ama paryh.

³³ Hôhakikâ tawhta pua ei ta, Zôbathâ liata riehmo ama paryh.

³⁴ Zôbathâ tawhta pua ei ta, Abarônah liata riehmo ama paryh.

³⁵ Abarônah tawhta pua ei ta, Eziôkebe liata riehmo ama paryh.

³⁶ Eziôkebe tawhta pua ei ta, Zini râhchawhpa liata riehmo ama paryh. Cha cha Kâdesâ tahpa a châ hra.

³⁷ Kâdesâ tawhta pua ei ta, Edômâ râh pai liata Hôri Tlâh liata riehmo ama paryh.

³⁸ Theihthaipa Arawna cha Abeipa biepiepa hawhta, Hôri Tlâh lâ kiah ta, Izarei sawzy Izi râh tawhta ama kaw pua tawhta kô sypalihna, thla pangawhna, noh khana noh ta, cha liata a thi haw.

³⁹ Hôri Tlâh liata a thi nota Arawna cha kô 123 uhtheipa a châ.

⁴⁰ Kâna râh Neke liata a ypa, Kâna chyhsa Aradâ bei ta, Izarei sawzy ama vaw tlôpa thei ta.

⁴¹ Izarei sawzy cha Hôri Tlâh tawhta pua ei ta, Zalmônâ liata riehmo paryh ei ta.

⁴² Zalmônâ tawhta pua ei ta, Punô liata riehmo ama paryh heih.

⁴³ Punô tawhta pua ei ta, Ôbô liata riehmo ama paryh.

⁴⁴ Ôbô tawhta pua ei ta, Môabâ râh Iziabari liata riehmo ama paryh.

⁴⁵ Iziabari tawhta pua ei ta, Dibôkadâ liata riehmo ama paryh.

⁴⁶ Dibôkadâ tawhta pua ei ta, Almawdibalâthai liata riehmo ama paryh.

⁴⁷ Almawdibalâthai tawhta pua ei ta, Nebô kiapâh liata Abari tlâhzy liata riehmo ama paryh.

⁴⁸ Abari tlâhzy tawhta pua ei ta, Zerikô dady Zawdâh kiah liata Môabâ bypi liata riehmo paryh ei ta,

⁴⁹ Zawdâh kiah Bezesimô tawhta Abesiti taihta Môabâ bypi liata riehmozy ama paryh lymâ.

Kâna chyhsazy papuana

⁵⁰ Zerikô dady Zawdâh kiah Môabâ bypi liata, Abeipa ta Mawsi hnohta,

⁵¹ “Izarei sawzy chho la, ama hnohta, ‘Zawdâh chakapa ta Kâna râh namâ ngia tita,

⁵² a râh chyhsa zydua nama hmiakô tawhta nama papua khai awpa a châ. Ama lô nothlahpa zydua parao khai aw ei chi ta, ama thua nothlah leihpa zydua chhao parao khai aw ei chi ta, ama su sâhpa zydua nama phie khai aw.

⁵³ Râh cha hnei aw ei chi ta, cha liata nama pahrâ aw. Cha râh cha hnei awpa ta ei cha piepa ei a châ.

⁵⁴ A pho pho ta nuby a dao aw ei chi ta, râh cha ryuto châta namâ rai aw. Chi lai viapazy cha ryuto râh lai via pie aw ei chi ta, chi chyh viapazy cha ryuto râh chyh via nama pie aw. Nuby ta a tlupa hawhta ama tovyuh a châ lymâ aw. Ryuto râh cha châ pathlatuhpazy chi yzie lymâ hawhta nama to awpa a châ.

⁵⁵ A râh liata a pahrâpazy nama hmiakô tawhta nama papua khai vei khiahta deikua cha, nama paysapazy cha nama mo liata mobâ hawhta châ aw ei ta, nama kâ liata ahloh hawhta cha chho aw ei ta, nama pahrâna râh liata châ patypamâtuhpazy ama châ lymâ aw.

⁵⁶ Ama chô liata tao awpa ei pachâpa cha, nama chô liata ei tao aw,’ tah mah y,” tah ta.