MALUHREINA 32 - Mara Bible RV (BSI)

Zawdâh nochhi lâta a pahrâpazy

¹ Rubena nata Kâdâ pathlazy cha sahroh hluhpi hnei ei ta. Zaze râh nata Kilia râh hmô ei ta. A su cha sahroh châta su pha ngaitapa châ ta.

² Kâdâ pathlazy nata Rubena pathlazy ta Mawsi nata theihthaipa Eliaza nata zawpi chhituhpazy hnohta,

³ “Atarô, Dibô, Zaze, Nimrâ, Hesbaw, Eliale, Sebâ, Nebô nata Biô râhzy cha,

⁴ Izarei zawpi hmiakô liata Abeipa ta a panawhpa râh, sahroh châta a pha ngaitapa râh a châ. Châ chakaotuhpazy he sahroh hnei pi ta.

⁵ Chavâta na mo eimâ dy khiahta cha, Zawdâh miah chakasa leipa la, ngiachhiepa ta he râh he eima pahrâ nawpa ta miah pie mah y,” tah ei ta.

⁶ Mawsi ta Kâdâ pathlazy nata Rubena pathlazy hnohta, “He liata nâmo a tyuh aw ei chi ta ma, nama unawhzy adyuhna lâ ama sie aw?

⁷ Khazia Abeipa ta âmo a piepa râh liata a ngia lei awpa ta Izarei sawzy palôh nama padua aw?

⁸ Châ pathlatuhpazy chhao ta, râh moh awpa ta Kâdesbânia tawhta ei tua no ei ta, cha hawhta ama tao hra.

⁹ Eskaw saikao ama tlô nahta, râh cha hmô ei ta, Abeipa piepa râh liata amâ ngia lei nawpa ta, Izarei sawzy palôh padua ei ta.

¹⁰ Cha noh liata, Abeipa cha a pathi ia ta, chhie sa ta,

¹¹ ‘Izi râh tawhta a kaw puapa, kô kih tawhta chô lâ chyhsazy cha, palôh tlokhuh ta eina zi leipa vâ ei ta, ahy hmah Abarahâ, Aisika nata Zakaw zy hnohta pie awpa ta bie ei taihpa râh hmô aw veih ei.

¹² Keni chi Zephune sawchapawpa Kâlebâ nata Nunâ sawchapawpa Zawsua deikua cha, palôh tlokhuh ta Abeipa ama zipa vâta ama hmô aw,’ tah ta.

¹³ Abeipa cha Izarei chô liata a pathi ia ta, chavâta Abeipa mohmô ta hmo pha leipa a taotuhpa chhâ zydua ama leidia khai hlâlei, râhchawhpa liata kô sypalih chhôh a paviavisa ei.

¹⁴ Châ pathlatuhpazy kha moleipa pathlazy châ ei ta, nâmo chhao âmo su a thlapa ta, Izarei chô liata Abeipa pathiiana chichhihpa nama baichha via rili he zaw!

¹⁵ Abeipa pazina tawhta nama tleisai khiahta cha, Abeipa ta zawpizy he râhchawhpa liata siesai heih aw ta, he chyhsa zydua he nâmo ta nama pahleipadia khaipa a châ aw,” tah ta.

¹⁶ Kâdâ pathlazy nata Rubena pathlazy ta Mawsi cha a kei hnia ei ta, a hnohta, “He liata eima sahroh châta mietaku sadôzy nata eima sawzy châta khihpizy eima padua aw.

¹⁷ Keimo deikua cha, chariah chhaichhizy a tobi aw pi ta, Izarei sawzy ama pahrâ nawpa su eima tlôkhei hlâlei cha, ama hmia lâta eima sie aw. He râh liata a pahrâpa chyhsazy vâta, eima sawzy cha, thokhy ta dôhpa khihpizy liata ama pahrâ aw.

¹⁸ Izarei saw zydua ta ama ryuto râh ama to khai hlâlei eima o lâ a vaw lie aw ma pi.

¹⁹ Zawdâh hesâ nochhi lâ liana heta eima to awpa râh a ypa vâta, keimo cha Izarei sawzy hnohta Zawdâh haosâ nata a khô lâ râh to hra aw ma pi,” tah ei ta.

²⁰ Mawsi ta ama hnohta, “Cha hawhta tao u la, chariah chhaichhi a tobipa ta Abeipa hmiakô ta adyuhna lâ sie teh u.

²¹ Chariah chhaichhi a tobipa maihta a chariahpazy a hmiakô tawhta papuapa a châ hlâlei cha, Abeipa hmiakô liata Zawdâh haosâ lâ y mawh sy.

²² Abeipa hmiakô liata râh nama la khai hlâlei namâ dyuh aw. Cha khai tawhta a vaw lie aw ei chi ta, Abeipa chô liata nata Izarei chô liata nama maophaohna nama chô liata y khao aw vei. Chatanachata he râh he Abeipa hmiakô liata nama ryuto râh a châ aw.

²³ Cha hawhta nama tao leipa khiahta deikua cha, pachâ teh u, Abeipa chô liata moleipa châ aw ei chi ta, nama moleina ta a cha hmô papua aw ei tahpa pahno muh vy.

²⁴ Nama sawzy châta khihpizy cha padua u la, nama mietakuzy châta sadôzy chhao cha tao u la, bie namâ taihpa hawhta tao teh u,” tah ta.

²⁵ Kâdâ pathlazy nata Rubena pathlazy ta Mawsi hnohta, “Châ chakaotuhpazy heta eima zibeipa biepiepa hawhta eima tao aw.

²⁶ Eima sawzy, eima lapinôzy, eima mietaku zawzy nata eima viahchao hri zydua Kilia khihpizy liata vaw y aw ei ta,

²⁷ châ chakaotuhpazy deikua pi cha, eima zibeipa biepiepa hawhta, Zawdâh chaka aw pi ta, chariah chhaichhi a tobipa maihta Zawdâh cha Abeipa hmiakô liata eima chaka aw,” tah ei ta.

²⁸ Chatanachata Mawsi ta Kâdâ nata Rubena pathlazy kyh liata, theihthaipa Eliaza nata Nunâ sawchapawpa Zawsua nata Izarei chi chhôhkha pawhrâhpazy biepie ta.

²⁹ Mawsi ta ama hnohta, “Kâdâ pathla nata Rubena pathla, chariah chhaichhi a tobipa maih Abeipa hmiakô liata nama hnohta Zawdâh chaka hra aw ei ta, râh cha pahniepa a châ khiahta cha, Kilia râh he âmo ryuto châta nama pie aw.

³⁰ Chariah chhaichhi a tobipa ta nama hnohta ama chaka hra vei khiahta deikua cha, Kâna râh liata nama hry liata ryuto ama hnei hra aw,” tah ta.

³¹ Kâdâ pathlazy nata Rubena pathlazy ta, “Abeipa ta châ chakaotuhpazy hnohta a reipa hawhta eima tao aw.

³² Chariah chhaichhi a tobipa ta, Abeipa hmiakô liata Zawdâh cha chaka aw pi ta, Kâna râh liata eimâ ngia aw. Râh eima to awpa deikua cha Zawdâh hesâ lâ he a châ aw,” tahpa ta a chhy ei ta.

³³ Chatanachata Mawsi ta Kâdâ pathlazy, Rubena pathlazy nata Zawsi sawchapawpa Manase pathla khophiezy hnohta Amawri bei Sihaw khinarâh nata Bâsanâ bei Ôkâ khinarâhzy cha, a khihpizy, khihpi râhzy nata a chheipâh râh khihpizy chhaota a pie ei.

³⁴ Kâdâ pathlazy ta Dibô, Atarô, Arôe,

³⁵ Atarôsôpha, Zaze, Zôbehâ,

³⁶ Benirâ nata Beharâ khihpizy ama padua. Chazy cha thokhy nata mietaku sadô a hneipa khihpizy a châ.

³⁷ Rubena pathlazy ta Hesbaw, Eliale, Kiriathai,

³⁸ Nebô, Bâlâmeô nata Sibmâ khihpizy padua ei ta, khihpi ama paduapa thokha mohzy cha pananopa ta moh hropa ama bi.

³⁹ Manase chi Mâkhi pathlazy ta Kilia râh siehnao ei ta, râh cha la ei ta, cha liata a pahrâpa Amawri mo papua ei ta.

⁴⁰ Mawsi ta Kilia râh cha Manase chi Mâkhi pathlazy pie ta, cha liata ama pahrâ.

⁴¹ Manase pathla Zairâ ta cha râh liata khitawzy siehnao ta, la ta, a moh Havôzairâ a bi.

⁴² Nôbâ ta Kenathâ khihpi nata a khichapeihzy siehnao ta, la ta, ano moh pachyuhpa ta Nôbâ a bi.