MALUHREINA 31 - Mara Bible RV (BSI)

Midia mo viarithôna

¹ Abeipa ta Mawsi hnohta,

² “Midia mo chô liata Izarei sawzy phuh la teh. Cha khai tawhta na chiheihzy hnohta pahlyhpa na châ aw,” tah ta.

³ Mawsi ta zawpizy hnohta, “Midia mo chô liata Abeipa phuh lana patlôsa awpa ta sie awpa ta, nama hry liata chapawzy cha adyuhna chariah chhaichhi ta tobi teh u.

⁴ Izarei chi zydua ta chi kha tawhta sâh kha lymâ ta adyuhna lâ nama pasiesa awpa a châ,” tah ta.

⁵ Chatanachata Izarei saw sâh hluhpi hry tawhta chi kha tawhta sâh kha chyu papua ei ta, pheisaih thy kha nata sâh no cha, adyuhna lâta sie awpa ta chariah chhaichhi ta tobi ei ta.

⁶ Mawsi ta âmo cha adyuhna lâ pasiesa ta, chi to hry tawhta sâh kha chyu pua ei ta, theihthaipa Eliaza sawchapawpa Phinehâ chhao, hmobaoh pathaihpazy nata biepie nawpa ta chiahmiezy chabapa ta adyuhna lâ sie hra ta.

⁷ Abeipa ta Mawsi bie a piepa hawhta, Midia mo cha a dyuh ei ta, chapaw zydua ama thie khai haw.

⁸ Midia beizy chhao, ama chyhsa thiepazy hry liata thie pâ hra ei ta, Midia bei papangawh, Ivi, Reke, Zuri, Hurâ nata Rebâ nata Beô sawchapawpa Bâlâma chhao zaozi ta ama thie haw.

⁹ Izarei sawzy ta Midia chanôzy nata ama hawtizy cha sei ta a chhi ei ta, ama viahchao zydua, ama mietaku zydua nata ama hmobaoh zydua hraona sôh ta la ei ta.

¹⁰ Ama pahrâna khihpi zydua nata ama riehmo zydua mei ta rao khai ei ta.

¹¹ Ama hraopa nata lapa zydua, chyhsapa chhao, sahroh chhao, ama siekhei haw.

¹² Seizy, sahrohzy nata hraopazy cha, Zerikô dady Zawdâh kiapâh ta Môabâ bypi riehmo liata a ypa Mawsi nata theihthaipa Eliaza nata Izarei zawpizy lâ vaw tlô khei ei ta.

¹³ Mawsi nata theihthaipa Eliaza nata zawpi hyutuhpa zydua ta riehmo khôtho lâ kei dy ei ta.

¹⁴ Mawsi cha adyuhna chakaona rai lâ tawhta a vaw tlôpa pheisaih hyutuhpa, sâh kha chô liata hyutuhpazy nata za kha chô liata hyutuhpazy chô liata a pathi ia ta.

¹⁵ Mawsi ta ama hnohta, “Chanôzy cha ahrohpa ta ma nama pahlôh khai haw?

¹⁶ Pachâ teh u, âmo kha Bâlâma ryhraona ta Peô liata Izarei sawzy Abeipa chô liata paraona a pataosatuhpazy châ ei ta, âmo vâta Abeipa chyhsazy chô liata potlana a vaw tlôpa kha.

¹⁷ Chavâta tahmâ he chapaw hawti zydua kha thie khai u la, chapaw a ziakhei ta, a pahnopathei hapa chanô zydua chhao thie khai teh u.

¹⁸ Chapaw a ziakhei beih leipa nata a pahno pathei beih leipa chanô hawti zydua deikua cha, namâ pahlôh aw.

¹⁹ Riehmo khôtho lâ noh sari a rie aw ei chi ta, ahy rai chyhsa a thiepa nata ama thiepa a hriapa maih, nâmo chhao, nama seizy chhao, noh thôhna noh nata noh sarina noh ta namâ pathaisa aw.

²⁰ Chysia to, savo ta taopa hmo to, mie hmi ta taopa hmo zydua nata tho ta taopa hmo zydua nama pathaisa khai aw,” tah ta.

²¹ Theihthaipa Eliaza ta adyuhna lâ a siepa pheisaihzy hnohta, “He he Abeipa ta Mawsi hnohta bie a piepa ryhpa bieraopa a châ:

²² Ngôh, tâkâ, dawh, thua, râhvâ nata ky zy,

²³ mei ta a parao thei leipa maih cha, mei liata pasiesa aw ei chi ta, chatanachata a vaw pathaih aw. Cha thota pathaisana ti ta pathaisa pâ awpa a châ. Mei ta a parao theipazy deikua cha, ti liata nama pasiesa aw.

²⁴ Noh sarina noh ta nama chysiazy pasu aw ei chi ta, chatanachata nama pathaih ha aw. Cha khai tawhta riehmo lâ namâ ngia thei aw,” tah ta.

Hraona sôh araina

²⁵ Abeipa ta Mawsi chho ta,

²⁶ “Nâ nata theihthaipa Eliaza nata zawpi hry tawhta chipho hyutuhpazy ta hraona sôh lapazy reih u la, chyhsapa chhao, sahroh chhao, reih khai teh u.

²⁷ Hraona sôhzy cha adyuhna lâ a siepa pheisaihzy nata zawpi zydua rai awpa ta su no ta nama pachhaih aw.

²⁸ Adyuhna lâ a siepa pheisaihzy tawhta Abeipa châta thyuna khei aw ei chi ta, za pangawh liata miakha lymâ ta, chyhsapazy, viahchaozy, alâzy, mietakuzy nama khei aw.

²⁹ Nama kheipa khophie cha Abeipa tovyuh châ ta, theihthaipa Eliaza hnohta nama pie aw.

³⁰ Izarei sawzy ta khophie ama topa tawhta, sypangawh liata miakha lymâ ta, chyhsapazy, viahchaozy, alâzy, mietakuzy, miezy nata sahroh zydua khei aw ei chi ta, Abeipa achhyna byureih mohôhtuhpa Livai chizy nama pie aw,” tah ta.

³¹ Abeipa ta Mawsi bie a piepa hawhta, Mawsi nata theihthaipa Eliaza ta tao ei ta.

³² Pheisaihzy ta amâ lapa hraona sôh rei leipa ta, zawpi ta amâ lapa hraona sôh zydua cha, mietaku 675,000,

³³ viahchao 72,000,

³⁴ alâ 61,000 nata

³⁵ chyhsa 32,000 a châ. Chyhsazy cha chapaw a ziakhei beih leipa nata a pahnopathei beih leipa chanôzy ama châ.

³⁶ Adyuhna lâ a siepazy tovyuh awpa hraona sôh khophie liata mietaku 337,500 y ta,

³⁷ cha tawhta Abeipa râhpaw cha mietaku 675 a châ.

³⁸ Viahchao 36,000 y ta, cha tawhta Abeipa râhpaw cha viahchao 72 a châ.

³⁹ Alâ 30,500 y ta, cha tawhta Abeipa râhpaw cha alâ 61 a châ.

⁴⁰ Chyhsapa 16,000 y ei ta, cha tawhta Abeipa râhpaw cha 32 ama châ.

⁴¹ Abeipa ta Mawsi bie a piepa hawhta, Abeipa châta thyupa râhpaw cha, Mawsi ta theihthaipa Eliaza hnohta a pie.

⁴² Cha hawhna chata Mawsi ta hraona sôhzy cha, adyuhna lâ siepa pheisaihzy nata zawpizy châta khophie ta pachhaih ta, zawpi tovyuh cha,

⁴³ mietaku 337,500,

⁴⁴ viahchao 36,000,

⁴⁵ alâ 30,500 nata

⁴⁶ chyhsapa 16,000 a châ.

⁴⁷ Abeipa ta Mawsi bie a piepa hawhta, Izarei sawzy ta khophie ama topa tawhta, Mawsi ta chyhsapa nata sahrohzy tawhta, sypangawh liata miakha lymâ ta la ta, Abeipa achhyna byureih mohôhtuhpa Livai chizy hnohta a pie ei.

⁴⁸ Pheisaih sâh hluhpi chô liata hyutuhpazy, sâh kha hyutuhpazy nata za kha hyutuhpazy ta Mawsi a kei hnia ei ta,

⁴⁹ Mawsi hnohta, “Châ chakaotuhpazy ta eima biehneina ry liata a ypa pheisaihzy maluh reih pi ta, eima hry liata pakha hmah a ki leipa y veih ei.

⁵⁰ Tahmâ he eima hmôpa chyu tawhta, Abeipa châta eima thyuna ngôh hmobaohzy, karuzy, lâkyuzy, moh chahnaona kusadizy, rahyzy, pachhihzy cha eimâ chatlaina châta Abeipa hmiakô liata eima vaw cheih,” tah ei ta.

⁵¹ Mawsi nata theihthaipa Eliaza ta ngôh ta daipa hmobaoh zydua cha âmo tawhta a hlâh ei ta.

⁵² A sâh chô liata hyutuhpazy nata a za chô liata hyutuhpazy ta Abeipa lâta ngôh ama vaw hlâpa zydua cha sekel 16,750 a châ.

⁵³ Pheisaihzy ta hraona sôh cha âmo châ chyu ta amâ vaw la hapa a châ.

⁵⁴ Chatanachata Mawsi nata theihthaipa Eliaza ta a sâh chô liata hyutuhpazy nata a za chô liata hyutuhpazy tawhta ngôh cha a hlâh ei ta, Izarei sawzy ta Abeipa hmiakô liata amâ thei thlâh ha nawpa ta, ahmaohna poh o chhôh liata a ngiakhei ei ta.