MALUHREINA 30 - Mara Bible RV (BSI)

Bietaizy

¹ Mawsi ta Izarei chi hyutuhpazy chho ta, “He he Abeipa biepiepa a châ:

² Chyhsa ta Abeipa liata bietai a tao khiahta tlyma, hmo tao awpa ta anosasyh â chahry khiahta tlyma, a bie a phie awpa châ vei. A pakah tawhta a puapa zydua hawhta a tao awpa a châ.

Chanôzy bietai

³ “Chanô laihsa ta a paw o liata a y thlâh ha nota, Abeipa liata bietai a tao khiahta tlyma, tao awpa ta anosasyh â chahry khiahta tlyma,

⁴ a bietai nata tao awpa ta anosasyh ta â chahrypa kyh cha a paw ta thei sala, â chalihsai thlâh ha khiahta cha, a bietai zydua nata tao awpa ta anosasyh ta â chahrypa zydua â duah aw.

⁵ Châhrasala a paw ta a thei nahta, a pakhâ ha khiahta cha, a bietai nata tao awpa ta anosasyh ta â chahrypazy miakha hmah a duah aw vei. A paw ta a pakhâ hapa vâta Abeipa ta â ngiahthai aw.

⁶ “Chanô ta a chô liata bietai a y thlâh ha nota tlyma, a hmao ta bie â taih chatlie tupa vâta anosasyh â chahryna daihti chhôh liata tlyma vahpa hnei sala,

⁷ a vahpa ta a bietai thâtih cha thei sala, a thei noh ta â chalihsai thlâh ha khiahta cha, a bietai cha a duah aw ta, tao awpa ta anosasyh â chahrypazy chhao â duah aw.

⁸ Châhrasala a vahpa ta a thei noh ta a pyh leipa sala a pakhâ ha khiahta cha, a lapinô chô liata bietai a ypa nata a hmao ta bie a taih chatlie tupa vâta anosasyh â chahrypazy cha, a vahpa ta pachhâsa aw ta, Abeipa ta â ngiahthai aw.

⁹ “Nôhmei tlyma, vahpa nata a chhaihpa chanô tlyma ta bietai a taopa nata tao awpa ta anosasyh â chahrypazy deikua cha, a chô liata â duah aw.

¹⁰ “Chanô ta a vahpa o liata a y thlâh ha nota bietai a tao khiahta tlyma, tao awpa ta anosasyh â chahry khiahta tlyma,

¹¹ a vahpa ta thei sala, a chalihsaipa ta, a pakhâ leipa khiahta cha, a bietai zydua a duah aw ta, anosasyh ta â chahrypa zydua chhao â duah aw.

¹² Châhrasala a vahpa ta a pahno noh ta, bie tloh leipa ta taopa ta, a pachhâsa ha khiahta cha, a hmao tawhta a puapa bietai tlyma, tao awpa ta anosasyh ta â chahrypa hmo tlyma a duah aw vei. A vahpa ta bie tloh leipa ta tao ha ta, Abeipa ta â ngiahthai aw.

¹³ Chanô bietai kheihawhpa tlyma, sasyh apakyna bietai chhao rai châ sala, a vahpa ta pa-i thei ta, a pachhâsa thei.

¹⁴ Châhrasala a vahpa ta, bietai kyh liata noh chareih â chalihsai thlâh ha khiahta cha, a lapinô bietai zydua nata tao awpa ta â chahrypa zydua cha a pa-ipa a châ. A pahno noh ta â chalihsai hapa vâta a pa-ipa a châ.

¹⁵ A thei noh tawhta daihti khachâ rakha ma a sie tawhta bie tloh leipa ta taopa ta, a pachhâsa khiahta cha, a vahpa ta a lapinô paraona maoh a phaoh aw,” tah ta.

¹⁶ Chazy cha chapaw nata a lapinô likah nata paw nata a sawchanô laihsa a paw o liata a y thlâh ha chypa likah liata bieraopa, Abeipa ta Mawsi hnohta bie a piepazy cha a châ.