MALUHREINA 3 - Mara Bible RV (BSI)

Livai chizy nata ama raihria

¹ Hezy he Abeipa ta Sinai Tlâh liata Mawsi bie â chho nota, Arawna nata Mawsi pathla a ypazy ama châ.

² Hezy he Arawna sawchapawzy moh a châ: Sawchapaw uhtheipa cha Nâdâ châ ta, a pazipazy cha Abihu, Eliaza nata Ithamâ zy ama châ.

³ Chazy cha Arawna sawchapawzy moh châ ta, âmo cha sathawthupa theihthaipazy châ ei ta, theihthaipa chakaona rai hria awpa ta chahnaopazy ama châ.

⁴ Nâdâ nata Abihu cha, mei ta hlâlei awpa chi Sinai râhchawhpa liata Abeipa hmiakô ta ama hlâ nota, Abeipa hmiakô liata thi ha ei ta, saw hnei veih ei. Chavâta ama paw Arawna hro chhôh cha, Eliaza nata Ithamâ ta theihthaipa chakaona rai ama hria lymâ.

Livai chi tao awpazy

⁵ Abeipa ta Mawsi chho ta,

⁶ “Livai chizy a vaw chhi la, theihthaipa Arawna ama chakao thei nawpa ta âmo cha a hmiakô liata paysa mah y.

⁷ Âmo ta theihthaipa Arawna nata zawpi zydua chakaona rai ahmaohna poh o hmiakô liata hria aw ei ta, achhyna byureih chakaona rai ama hria aw.

⁸ Ahmaohna poh o hmobaoh zydua a vao aw ei ta, achhyna byureih chakaona rai hriapa ta Izarei sawzy ama mohôh aw.

⁹ Livai pathlazy cha Arawna nata a sawchapawzy hnohta na pie aw ei. Âmo cha Izarei sawzy hry tawhta Arawna hnohta pie khaipa ama châ.

¹⁰ Arawna nata a sawchapawzy cha theihthaipa châta rao aw chi ta, ama theihthai châna ama pazao lymâ aw. Khôtho chyhsa ta theihthaipa chakaona rai hria awpa ta achhyna byureih â hnia khiahta cha, thie awpa a châ,” tah ta.

¹¹ Abeipa ta Mawsi chho ta,

¹² “Pachâ teh, Livai pathlazy cha Izarei sawzy hry liata chhi a pahy tuapa sawchapaw uhtheipazy vyuhpa ta Izarei sawzy tawhta ei lapazy ama châ. Chavâta Livai pathlazy cha kei eih ama châ aw.

¹³ Sawchapaw uhtheipa zydua cha kei eih ama châ. Izi râh liata sawchapaw uhtheipa zydua ei thie khai nona khata, Izarei sawzy hry liata sawchapaw uhtheipazy deikua cha, chyhsapa chhao sahroh chhao, ei châta ei pathaisa ei. Chavâta kei eih ama châ aw. Kei he Abeipa ei châ,” tah ta.

¹⁴ Abeipa ta Sinai râhchawhpa liata Mawsi hnohta,

¹⁵ “Livai pathlazy a pho pho ta nata a chhôh chhôh ta ama maluh reih la, chapaw thla kha tawhta chô lâ zydua reih khai mah y,” tah ta.

¹⁶ Chatanachata Mawsi ta Abeipa bie hawhta, a hnohta biepiepa hawh tlai ta, ama maluh cha reih ta.

¹⁷ Hezy he Livai sawchapawzy moh a châ: Kesao, Kôhâ nata Merâri.

¹⁸ Hezy he ama pho ta a laichadaipa ta Kesao sawchapawzy moh a cha: Libni nata Simei.

¹⁹ Kôhâ sawchapawzy cha ama pho ta a laichadaipa ta Amrâ, Iza, Hebraw nata Uzie zy ama châ.

²⁰ Merâri sawchapawzy cha, ama pho ta a laichadaipa ta, Mâhli nata Musi zy ama châ. Chazy cha a chhôh chhôh ta a laichadaipa ta Livai phozy ama châ.

²¹ Kesao cha Libni pho nata Simei phozy pathlatuhpa châ ta, hezy he Kesao pathlazy ama châ.

²² Chapaw thla kha tawhta chô lâ maluh reipa zydua 7,500 ama châ.

²³ Kesao phozy cha achhyna byureih hnôh lâta notla baih lâta ama poh o rai aw ei ta,

²⁴ Kesao pathlazy hyutuhpa cha Lâe sawchapawpa Eliasaphâ a châ aw.

²⁵ Kesao sawchapawzy ta ahmaohna poh o liata ama mohôh awpazy cha, achhyna byureih, poh o nata khuna pohzy, ahmaohna poh o chhikao pohraipazy,

²⁶ dôhpachhôh tlyhmia pohraipazy, achhyna byureih kiapâh liata dôhpachhôh tlyhmia chhikao nata maisâh chadôpa ta pohraipazy nata chaorizy châ aw ta, chazy nata a zaokhipa chakaona rai zydua chhao ama hria khai aw.

²⁷ Kôhâ cha Amirâ pho zy, Izah pho zy, Hebraw pho nata Uzie phozy pathlatuhpa châ ta, hezy he Kôhâ pathlazy ama châ.

²⁸ Chapaw thla kha tawhta chô lâ maluh zydua 8,600 châ ei ta, âmo cha su pathaihpa mohôhtuhpa ama châ aw.

²⁹ Kôhâ sawchapawzy tawhta pho a puapazy cha achhyna byureih chho lâ chhâh ta ama poh o rai aw ei ta,

³⁰ Kôhâ pathla phozy hyutuhpa cha Uzie sawchapawpa Elizaphâ a châ aw.

³¹ Ama mohôh awpazy cha Biehrai Byh, tlâhkhai, meiôh sona, maisâh, supathaihpa liata theihthaipa chakaona chhaichhizy nata pohraipa zy châ aw ta, chazy nata a zaokhipa chakaona rai zydua ama mohôh khai aw.

³² Theihthaipa Arawna sawchapawpa Eliaza cha Livai chi hyutuhpazy hyutuhpa châ aw ta, supathaihpa mohôhtuhpazy mohôhtuhpa a châ aw.

³³ Merâri cha Mâhli pho nata Musi phozy pathlatuhpa châ ta, hezy he Merâri pathlazy ama châ.

³⁴ Chapaw thla kha tawhta chô lâ maluh reipa zydua 6,200 ama châ.

³⁵ Merâri pathlazy hyutuhpa cha Abihai sawchapawpa Zurie châ aw ta, âmo cha achhyna byureih maw lâ chhâh ta ama poh o ama parai aw.

³⁶ Merâri sawchapawzy ta ama mohôh awpazy cha achhyna byureih thophiazy, a tlâhzy, a tôhzy, a patyunazy nata chazy châta a chhaichhi zydua châ aw ta, chazy nata a zaokhipa chakaona zydua ama mohôh aw.

³⁷ Tlyhmia dôhna tôhzy, a patyunazy, a khaipânazy nata a chaorizy chhao ama mohôh aw.

³⁸ Nochhi lâ chhâh ta achhyna byureih hmia lâ, ahmaohna poh o laihmia lâta noh vaw chhi tyhna dady ta poh o a parai awpa cha, Mawsi nata Arawna nata a sawchapawzy châ aw ei ta, âmo ta supathaihpa mohôh aw ei ta, Izarei sawzy ama mohôh aw. Khôtho chyhsa theihthaipa chakaona rai hria awpa ta achhyna byureih a hniapa maih cha thiepa a châ aw.

³⁹ Abeipa biepiepa hawhta, Mawsi nata Arawna ta Livai chizy cha a chhôh chhôh ta ama maluh reih ei ta, chapaw thla kha tawhta chô lâ ama reipa zydua cha 22,000 ama châ.

Livai chizy nata sawchapaw uhtheipa chatlaina

⁴⁰ Abeipa ta Mawsi hnohta, “Izarei sawzy hry liata sawchapaw uhtheipa thla kha tawhta chô lâ zydua reih la, ama moh roh khai teh.

⁴¹ Izarei pathla sawchapaw uhtheipazy vyuhpa ta Livai pathlazy na lapa aw chi ta, Izarei sawzy sahroh pataw tuapazy vyuhpa ta Livai sahrohzy eina lapa aw chi. Kei he Abeipa ei châ,” tah ta.

⁴² Mawsi ta Abeipa biepiepa hawhta Izarei sawzy hry liata sawchapaw uhtheipa zydua reih ta.

⁴³ Thla kha tawhta chô lâ sawchapaw uhtheipa zydua maluh, ama moh paziahpa tlai ta reipa zydua cha, 22,273 ama châ.

⁴⁴ Abeipa ta Mawsi chho ta,

⁴⁵ “Izarei pathla sawchapaw uhtheipazy vyuhpa ta Livai pathlazy la la, ama sahroh vyuhpa ta Livai pathlazy sahroh la mah y. Livai pathlazy cha kei eih ama châ aw. Kei he Abeipa ei châ.

⁴⁶ Izarei sawzy hry liata sawchapaw uhtheipazy maluh cha Livai chi maluh hlâta 273 ta a hluh viapa vâta, âmo chatlai nawpa ta,

⁴⁷ pakha châta sekel tlaw pangawh lymâ la aw chi ta, sekel reizie cha supathaihpa sekel reizie châ aw ta, kerâ miakih ta sekel tlaw kha reizie hawhta a châ aw.

⁴⁸ Izarei saw hluh viapazy chatlaina sôh cha Arawna nata a sawchapawzy na pie aw ei,” tah ta.

⁴⁹ Livai chi maluh ta a chatlai theipa hlâta hluh viapa sawchapaw uhtheipazy chatlaina sôh cha Mawsi ta la ta.

⁵⁰ Supathaihpa tâkâ reizie ta reipa ta, Izarei sawchapaw uhtheipazy chatlaina sôh sekel 1,365 pakhy ta.

⁵¹ Abeipa bie hawhta, Abeipa ta Mawsi bie a piepa hawh tlai ta, Mawsi ta chatlaina sôh cha Arawna nata a sawchapawzy hnohta hlâ ta.