MALUHREINA 29 - Mara Bible RV (BSI)

Chiahmie kyhchhi

¹ “Thla sarina noh khana noh liata pakhypi pathaihpa hnei aw ei chi ta, rai rupa nama hria awpa châ vei. Nama châta chiahmiezy tôna noh a châ aw.

² Raopa hlâna châta viahchao tôh dawpa pô kha, mietaku tôhpa pô kha, mietakutaw chapawpa kô khapa seina hnei leipa pô sari nama hlâ aw. Cha cha Abeipa châta ropahâhpa a châ aw.

³ Â chakaihpa niepa hlâna châta viahchao tôhpa pô kha liata viahdie dipa sathaw pahlaopa kachu su hrawh su thôh, mietaku tôhpa pô kha liata su hrawh su no,

⁴ mietakutaw pô saripazy châta pô kha liata su hrawh su kha lymâ ta nama hlâ aw.

⁵ Nama châta chatlaina tao nawpa ta, moleina hlâna mie tôhpa pô kha nama hlâ pâ aw.

⁶ Chazy cha, thla thieh raopa hlâna nata â chakaihpa niepa hlâna, raopa hlâna hlâ tyhpa nata â chakaihpa niepa hlâna nata dopa hlânazy thota, taozie awpa hawhta taopa ta, Abeipa châta ropahâhpa châta mei ta hmohlâpa hlâ awpazy a châ.

Chatlaina Noh

⁷ “Thla sarina noh hrawhna noh liata pakhypi pathaihpa nama hnei aw. Kâhvileipa ta y aw ei chi ta, khâpa rai hmah nama hria awpa châ vei.

⁸ Abeipa châta ropahâhpa raopa hlâna deikua cha hlâ aw ei chi ta, viahchao tôhpa pô kha, mietaku tôhpa pô kha, mietakutaw chapawpa kô khapa seina hnei leipa pô sari nama hlâ aw.

⁹ Â chakaihpa niepa hlâna châta viahchao tôhpa pô kha liata viahdie dipa sathaw pahlaopa kachu su hrawh su thôh, mietaku tôhpa pô kha liata su hrawh su no,

¹⁰ mietakutaw pô saripazy châta mietakutaw pô kha liata su hrawh su kha nama hlâ aw.

¹¹ Moleina hlâna châta chhao mie tôhpa pô kha nama hlâ aw. Chazy cha chatlaina châta moleina hlâna nata raopa hlâna hlâ tyhpazy nata amâ chakaihpa niepa hlâna nata dopa hlânazy thota nama hlâ awpazy a châ.

Byureih kyhchhi

¹² “Thla sarina, noh hrawh hleipangawhna noh liata pakhypi pathaihpa hnei aw ei chi ta, rai rupa nama hria awpa châ vei. Abeipa châta noh sari chhôh kyhchhi nama hmâh aw.

¹³ Abeipa châta ropahâhpa, mei ta hmohlâpa raona hlâna viahchao tôh dawpa pô hrawh hleithôh, mietaku tôhpa pô no, mietakutaw chapawpa kô khapa seina hnei leipa pô hrawh hleipalih nama hlâ aw.

¹⁴ Amâ chakaihpa niepa hlâna châta hlâ awpa viahchao tôhpa pô hrawh hleithôh châta viahchao tôhpa pô kha liata viahdie dipa sathaw pahlaopa kachu su hrawh su thôh, mietaku tôhpa pô no châta mietaku tôhpa pô kha liata su hrawh su no,

¹⁵ mietakutaw pô hrawh hleipalih châta mietakutaw pô kha liata su hrawh su kha nama hlâ aw.

¹⁶ Moleina hlâna châta chhao mie tôhpa pô kha hlâ aw ei chi ta, chazy cha raopa hlâna hlâ tyhpa nata â chakaihpa niepa hlâna nata dopa hlânazy thota hlâ awpazy a châ.

¹⁷ “Noh nona liata viahchao tôh dawpa pô hrawh hleino, mietaku tôhpa pô no, mietakutaw chapawpa kô khapa seina hnei leipa pô hrawh hleipalih nama hlâ aw.

¹⁸ Amâ chakaihpa niepa hlâna nata dopa hlânazy cha, taozietyhpa nata sahroh hlâpa zie lymâ hawhta, viahchao tôhpa châta zy, mietaku tôhpa châta zy, mietakutaw châta zy nama hlâ aw.

¹⁹ Moleina hlâna châta chhao mie tôhpa pô kha hlâ aw ei chi ta, chazy cha raopa hlâna hlâ tyhpa nata â chakaihpa niepa hlâna nata dopa hlânazy thota hlâ awpazy a châ.

²⁰ “Noh thôhna noh ta viahchao tôhpa pô hrawh hleikha, mietaku tôhpa pô no, mietakutaw chapawpa kô khapa seina hnei leipa pô hrawh hleipalih nama hlâ aw.

²¹ Amâ chakaihpa niepa hlâna nata dopa hlânazy cha, taozietyhpa nata sahroh hlâpa zie lymâ hawhta, viahchao tôhpa châta zy, mietaku tôhpa châta zy, mietakutaw châta zy nama hlâ aw.

²² Moleina hlâna châta chhao mie tôhpa pô kha hlâ aw ei chi ta, chazy cha raopa hlâna hlâ tyhpa nata â chakaihpa niepa hlâna nata dopa hlânazy thota hlâ awpazy a châ.

²³ “Noh palihna noh ta viahchao tôhpa pô hrawh, mietaku tôhpa pô no, mietakutaw chapawpa kô khapa seina hnei leipa pô hrawh hleipalih nama hlâ aw.

²⁴ Amâ chakaihpa niepa hlâna nata dopa hlânazy cha, taozietyhpa nata sahroh hlâpa zie lymâ hawhta, viahchao tôhpa châta zy, mietaku tôhpa châta zy, mietakutaw châta zy nama hlâ aw.

²⁵ Moleina hlâna châta chhao mie tôhpa pô kha hlâ aw ei chi ta, chazy cha raopa hlâna hlâ tyhpa nata â chakaihpa niepa hlâna nata dopa hlânazy thota hlâ awpazy a châ.

²⁶ “Noh pangawhna noh ta viahchao tôhpa pô chaki, mietaku tôhpa pô no, mietakutaw chapawpa kô khapa seina hnei leipa pô hrawh hleipalih nama hlâ aw.

²⁷ Amâ chakaihpa niepa hlâna nata dopa hlânazy cha, taozietyhpa nata sahroh hlâpa zie lymâ hawhta, viahchao tôhpa châta zy, mietaku tôhpa châta zy, mietakutaw châta zy nama hlâ aw.

²⁸ Moleina hlâna châta chhao mie tôhpa pô kha hlâ aw ei chi ta, chazy cha raopa hlâna hlâ tyhpa nata â chakaihpa niepa hlâna nata dopa hlânazy thota hlâ awpazy a châ.

²⁹ “Noh charuna noh ta viahchao tôhpa pô charie, mietaku tôhpa pô no, mietakutaw chapawpa kô khapa seina hnei leipa pô hrawh hleipalih nama hlâ aw.

³⁰ Amâ chakaihpa niepa hlâna nata dopa hlânazy cha, taozietyhpa nata sahroh hlâpa zie lymâ hawhta, viahchao tôhpa châta zy, mietaku tôhpa châta zy, mietakutaw châta zy nama hlâ aw.

³¹ Moleina hlâna châta chhao mie tôhpa pô kha hlâ aw ei chi ta, chazy cha raopa hlâna hlâ tyhpa nata â chakaihpa niepa hlâna nata dopa hlânazy thota hlâ awpazy a châ.

³² “Noh sarina noh ta viahchao tôhpa pô sari, mietaku tôhpa pô no, mietakutaw chapawpa kô khapa seina hnei leipa pô hrawh hleipalih nama hlâ aw.

³³ Amâ chakaihpa niepa hlâna nata dopa hlânazy cha, taozietyhpa nata sahroh hlâpa zie lymâ hawhta, viahchao tôhpa châta zy, mietaku tôhpa châta zy, mietakutaw châta zy nama hlâ aw.

³⁴ Moleina hlâna châta chhao mie tôhpa pô kha hlâ aw ei chi ta, chazy cha raopa hlâna hlâ tyhpa nata â chakaihpa niepa hlâna nata dopa hlânazy thota hlâ awpazy a châ.

³⁵ “Noh chariena noh ta pakhypi pathaihpa hnei aw ei chi ta, rai rupa nama hria awpa châ vei.

³⁶ Raopa hlâna ta viahchao tôhpa pô kha, mietaku tôhpa pô kha nata mietakutaw chapawpa kô khapa seina hnei leipa pô sari nama hlâ aw. Cha cha Abeipa châta ropahâhpa, mei ta hmohlâpa a châ.

³⁷ Amâ chakaihpa niepa hlâna nata dopa hlânazy cha, taozietyhpa nata sahroh hlâpa zie lymâ hawhta, viahchao tôhpa châta zy, mietaku tôhpa châta zy, mietakutaw châta zy nama hlâ aw.

³⁸ Moleina hlâna châta chhao mie tôhpa pô kha hlâ aw ei chi ta, chazy cha raopa hlâna hlâ tyhpa nata â chakaihpa niepa hlâna nata dopa hlânazy thota hlâ awpazy a châ.

³⁹ “Nama bietai hmohlâpazy, nama lôhthai hmohlâpazy, nama raopa hlânazy, nama niepa hlânazy, nama dopa hlânazy nata nama aryhna hlânazy thota, chazy cha nama kyhchhi raopazy liata Abeipa lâ nama hlâ awpa a châ.”

⁴⁰ Cha hawhna chata Mawsi ta Abeipa biepiepa zydua cha Izarei sawzy chho ta.