MALUHREINA 28 - Mara Bible RV (BSI)

Noh to hlânazy

¹ Abeipa ta Mawsi hnohta,

² “Izarei sawzy biepie la ama hnohta hetana heta chho teh: ‘Kei lâta mei ta nama hlâ tyh awpa niepa hlânazy cha a daihti raopa liata nama hlâ tyh awpa a châ. Cha cha kei châta ropahâhpa a châ,’ tah ta.

³ He he mei ta hmohlâpa Abeipa lâta nama hlâ awpa a châ: Noh kha ta mietakutaw chapawpa kô khapa seina hnei leipa pô no lymâ ta, noh chareih ta raopa hlâna châta nama hlâ aw.

⁴ Mietakutaw pô kha my ta hlâ aw ei chi ta, pô kha zâlâ ta nama hlâ aw.

⁵ Niepa hlâna châta viahdie dipa kachu su hrawh su kha nata sathaw saohpa chhiehraôh ôh kha hlâ pâ awpa a châ.

⁶ Cha cha tao lymâ awpa raopa hlâna, Abeipa lâta mei ta hmohlâpa ropahâhpa châ ta, Sinai Tlâh liata chahnao pa-ipa kha a châ.

⁷ Mietakutaw pô kha hlâna liata, dopa hlâna chhiehraôh ôh kha lymâ hlâ aw chi ta, Abeipa lâta dopa hlâna ta hlâ awpa kresawhti patapa cha su pathaihpa liata na patlai aw.

⁸ Zâlâ ta mietakutaw hropa hlâ aw chi ta, my ta na hlâpa niepa hlâna nata â chakaihpa dopa hlâna hawhna khata, Abeipa châta ropahâhpa mei ta hmohlâpa cha na hlâ aw.

Pahânoh nata thla to hlânazy

⁹ “Pahânoh ta mietakutaw chapawpa, kô khapa seina hnei leipa pô no hlâ aw chi ta, â chakaihpa niepa hlâna châta viahdie dipa kachu su hrawh su no sathaw pahlaopa nata dopa hlâna na hlâ aw.

¹⁰ Cha cha Pahânoh maihta hlâ tyhpa raopa hlâna châ ta, raopa hlâna hlâ tyhpa nata â chakaihpa dopa hlâna thota hlâ awpa a châ.

¹¹ “Nama thla thiehpa maihta, Abeipa lâta raopa hlâna, viahchao tôh dawpa pô no nata mietaku tôhpa pô kha nata mietakutaw chapawpa kô khapa seina hnei leipa pô sari nama hlâ tyh aw.

¹² Viahchao tôhpa pô kha liata niepa hlâna châta viahdie dipa sathaw pahlaopa kachu su hrawh su thôh; mietaku tôhpa pô kha liata niepa hlâna viahdie dipa sathaw pahlaopa kachu su hrawh su no;

¹³ mietakutaw pô kha liata niepa hlâna châta viahdie dipa sathaw pahlaopa kachu su hrawh su kha zy cha raopa hlâna ropahâhpa, Abeipa lâta mei ta hmohlâpa ta nama hlâ tyh aw.

¹⁴ Raopa hlâna ta â chakaihpa dopa hlâna châta, viahchao tôhpa pô kha liata kresawhti chhiehraôh ôh no châ aw ta, mietaku tôhpa pô kha liata chhiehraôh ôh kha nata khophie châ aw ta, mietakutaw pô kha liata chhiehraôh ôh kha a châ aw. Cha cha kô chhôh thla thiehpa maihta raopa hlâna hlâ awpa cha a châ.

¹⁵ Raopa hlâna hlâ tyhpa nata â chakaihpa dopa hlâna thota, Abeipa lâta moleina hlâna châta mie tôhpa pô kha nama hlâ aw.

Kyhchhi raopa liata hlânazy

¹⁶ “Thla khana, noh hrawh hleipalihna noh cha Abeipa zawpakhô kyhchhi a châ.

¹⁷ Cha thla, noh hrawh hleipangawhna noh cha kyhchhi noh châ ta, noh sari chhôh viahchhâ thinô pahlao leipa nie awpa a châ.

¹⁸ Noh khana noh cha pakhypi pathaihpa châ aw ta, rai rupa nama hria awpa châ vei.

¹⁹ Mei ta hmohlâpa raopa hlâna deikua cha Abeipa lâ nama hlâ aw. Viahchao tôh dawpa pô no, mietaku tôhpa pô kha nata mietakutaw chapawpa kô khapa pô sari, seina hnei leipazy nama hlâ aw.

²⁰ Raopa hlâna ta â chakaihpa niepa hlâna châta viahchao tôhpa pô kha liata viahdie dipa sathaw pahlaopa kachu su hrawh su thôh, mietaku tôhpa pô kha liata su hrawh su no,

²¹ mietakutaw pô saripazy châta mietakutaw pô kha liata su hrawh su kha lymâ ta nama hlâ aw.

²² Nama châta chatlaina tao nawpa ta moleina hlâna châta mie tôhpa pô kha nama hlâ aw.

²³ Chazy cha my ta raopa hlâna nama hlâ tyhpa thota nama hlâ awpa a châ.

²⁴ Cha hawhna chata Abeipa lâta mei ta hmohlâpa niepa hlâna cha, noh sari chhôh, noh chareih ta nama hlâ aw. Cha cha Abeipa châta ropahâhpa châ ta, raopa hlâna hlâ tyhpa nata â chakaihpa dopa hlâna thota hlâ awpa a châ.

²⁵ Noh sarina noh ta pakhypi pathaihpa hnei aw ei chi ta, rai rupa nama hria awpa châ vei.

Hâta kyhchhi hlâna

²⁶ “Nama hâta kyhchhi chhôh ta, Abeipa lâta niepa hlâna sâh thiehpa, thei hmiatuapazy nama hlâna noh ta, pakhypi pathaihpa hnei aw ei chi ta, rai rupa nama hria awpa châ vei.

²⁷ Raopa hlâna ta viahchao tôh dawpa pô no, mietaku tôhpa pô kha, mietakutaw chapawpa kô khapa pô sari nama hlâ aw. Cha cha Abeipa châta ropahâhpa a châ.

²⁸ Raona hlâna ta â chakaihpa niepa hlâna châta viahdie dipa sathaw pahlaopa cha, viahchao tôhpa pô kha liata kachu su hrawh su thôh, mietaku tôhpa pô kha liata su hrawh su no,

²⁹ mietakutaw pô saripazy châta mietakutaw pô kha liata su hrawh su kha lymâ ta nama hlâ aw.

³⁰ Nama châta chatlaina tao nawpa ta, mie tôhpa pô kha nama hlâ pâ aw.

³¹ Chazy cha raopa hlâna ta â chakaihpa dopa hlânazy chhaota pachhuahpanoh aw ei chi ta, raopa hlâna nata niepa hlâna hlâ tyhpazy thota hlâ awpazy a châ. Sahroh hlâ awpazy cha seina hnei leipazy ama châ awpa a châ.