MALUHREINA 27 - Mara Bible RV (BSI)

Zelôphehâ sawchanôzy ryuto

¹ Zelôphehâ sawchanôzy a vy ei ta. Zelôphehâ cha Hepha sawchapawpa châ ta, Hepha cha Kilia sawchapawpa châ ta, Kilia cha Mâkhi sawchapawpa châ ta, Mâkhi cha Manase sawchapawpa châ ta, Manase cha Zawsi sawchapawpa a châ. Zelôphehâ sawchanôzy cha Mâhlâ, Noâh, Hôkalâ nata Tizah zy ama châ.

² Mawsi nata theihthaipa Eliaza nata beimachâzy nata zawpi zydua hmiakô liata ahmaohna poh o chhikao liata a kei duah ei ta, ama hnohta,

³ “Eima paw cha râhchawhpa liata thi ha ta, Abeipa a dyuh awpa ta a paraohpa ta a hmaohpakhypa Kôrâ py liata deikua a hlao vei. Ano moleina vâ tlai ta a thipa a châ. Sawchapaw hnei vei.

⁴ Sawchapaw a hnei leipa vâta, khazia eima paw moh cha a phoheihzy hry tawhta a lei aw? Eima paw unawhzy hry liata ryuto miah pie hra teh u,” tah ei ta.

⁵ Mawsi ta ama bie cha Abeipa hmiakô liata tlôkhei ta.

⁶ Abeipa ta Mawsi hnohta,

⁷ “Zelôphehâ sawchanôzy reipa cha hmo dopa a châ. Ama paw unawhzy hry liata ama ryuto râh na pie hra awpa ei châ ta, ama paw ryuto râh cha âmo na pie awpa ei a châ.

⁸ Izarei sawzy hnohta, ‘Chyhsa ta sawchapaw hnei leipa ta a thi khiahta cha, a ryu cha a sawchanô nama pie awpa a châ.

⁹ Sawchanô a hnei vei khiahta cha, a ryu cha a unawhzy nama pie awpa a châ.

¹⁰ Unawh a hnei vei khiahta cha, a ryu cha a paw unawhzy nama pie awpa a châ.

¹¹ A paw ta unawhzy a hnei vei khiahta cha, a ryu cha a pho liata a heinawh a hnia chaipa pie aw ei chi ta, ano ta a pakhy aw. Abeipa ta Mawsi bie a piepa hawhta, cha cha Izarei sawzy châta pachiana ryhpa a châ aw,’ tah mah y,” tah ta.

Zawsua ta Mawsi â thla

¹² Abeipa ta Mawsi hnohta, “Abari tlâh lâ khi khy la, Izarei sawzy ei piepa râh cha kaw sai mah y.

¹³ Na hmô khai tawhta, na unawhpa Arawna a chiheihzy hnohta pahlyhpa a châpa hawhna khata, nâ chhao na chiheihzy hnohta pahlyhpa na châ aw.

¹⁴ Zini râhchawhpa liata zawpi ta einâ dyuh no ei ta, nâmo pano chhao ei biepiepa a dyuh hra ei chi ta, tizy kiah liata zawpi hmiakô liata eina palyupalih leipa vâ ei chi ta a châ,” tah ta. Cha tizy cha Zini râhchawhpa liata Kâdesâ liata Meribâ tizy a châ.

¹⁵ Mawsi ta Abeipa hnohta,

¹⁶ “Zawpizy he chhihtha awpa ta, Abeipa, chyhsa zydua thlahpa Khazohpa ta chyhsa pakha rao mawh sy.

¹⁷ Ano chata zawpizy hmia lâta pua aw ta, a tlôkhei aw ei. Zawpizy chhihtha aw ta, â ngiakhei aw ei. Chatanachata Abeipa chyhsa zawpizy cha vaituhpa hnei leipa mietaku hawhta y aw veih ei,” tah ta.

¹⁸ Abeipa ta Mawsi hnohta, “Nunâ sawchapawpa Zawsua, thlahpa ta a ylâhpa chyhsa kha a chhi la, a chô liata na ku pahnieh mah y.

¹⁹ Theihthaipa Eliaza nata zawpi zydua hmiakô liata paduasa aw chi ta, ama mohmô liata biehneina na pie aw.

²⁰ Izarei zawpizy ta a rei amâ ngiah thei nawpa ta, na biehneina ano hnohta na hlâ aw.

²¹ Ano cha theihthaipa Eliaza hmiakô liata a duah aw ta, theihthaipa Eliaza ta Abeipa hmiakô liata Uri hmâpa ta pachiana bie a hiahripa tyh aw. Ano nata a hnohta a ypa Izarei zawpi zydua ano rei sai ta pua aw ei ta, ano rei sai ta amâ ngia aw,” tah ta.

²² Mawsi ta Abeipa biepiepa hawhta tao ta. Zawsua cha a chhi ta, Eliaza nata zawpi zydua hmiakô liata paduasa ta.

²³ A chô liata a ku pahnieh ta, Mawsi hmâpa ta Abeipa biereipa hawhta biehneina cha pie ta.