MALUHREINA 26 - Mara Bible RV (BSI)

Maluh reina einona

¹ Potlana a pai tawhta Abeipa ta Mawsi nata theihthaipa Arawna sawchapawpa Eliaza cha bie a chho ta, ama hnohta,

² “Izarei chyhsa zydua maluh reih u la, kô kih tawhta chô lâ, a chhôh chhôh ta, Izarei râh liata a pahrâpa adyuhna lâ sie thei awpa zydua reih khai teh u,” tah ta.

³ Mawsi nata theihthaipa Eliaza ta Zerikô dady ta a ypa Zawdâh kiah liata Môabâ bypi liata Izarei sawzy cha bie chho ei ta, ama hnohta,

⁴ “Abeipa ta Mawsi bie a piepa hawhta, kô kih tawhta chô lâ zydua maluh reih teh u,” tah ei ta. Hezy he Izi râh tawhta a kaw puapa Izarei sawzy ama châ.

⁵ Izarei sawchapaw uhtheipa cha Rubena châ ta, Rubena pathlazy cha, Hanô tawhta Hanô phozy, Pâluh tawhta Pâluh phozy;

⁶ Hezrô tawhta Hezrô phozy nata Kâmi tawhta Kâmi phozy ama châ.

⁷ Âmo cha Rubena pathla phozy châ ei ta, ama maluh rei theipa zydua cha 43,730 ama châ.

⁸ Pâluh sawchapawpa cha Eliabâ a châ.

⁹ Eliabâ sawchapawzy cha Nemua, Dâthâ nata Abirâ zy ama châ. Dâthâ nata Abirâ cha zawpi hry tawhta a tlyhpazy châ ei ta, Abeipa amâ dyuh nota, Kôrâ nata a pakaohpa ta Mawsi nata Arawna a chakhiapazy kha ama châ.

¹⁰ Alei ta a pakah â ta, âmo cha Kôrâ nata hmaohkha ta a palâ ha ei. Mei ta Kôrâ nata a py manôh 250 a kâsao nota, âmo chhao kâsao ta, zikyurâna ta ama vaw châ haw.

¹¹ Kôrâ sawchapawzy deikua cha thi veih ei.

¹² A pho pho ta reipa ta, Simeôna pathlazy cha, Nemua tawhta Nemua phozy, Zami tawhta Zami phozy, Zakhi tawhta Zakhi phozy;

¹³ Zerâ tawhta Zerâ phozy nata Sawla tawhta Sawla phozy ama châ.

¹⁴ Âmo cha Simeôna pathla phozy châ ei ta, ama zydua ta 22,200 ama châ.

¹⁵ A pho pho ta reipa ta, Kâdâ pathlazy cha, Zephô tawhta Zephô phozy, Hâki tawhta Hâki phozy, Suni tawhta Suni phozy;

¹⁶ Ôzni tawhta Ôzni phozy; Eri tawhta Eri phozy;

¹⁷ Arô tawhta Arô phozy nata Areli tawhta Areli phozy ama châ.

¹⁸ Âmo cha Kâdâ pathla phozy châ ei ta, ama maluh rei theipa zydua cha 40,500 ama châ.

¹⁹ Zudâh pathlazy cha Erâ nata Ônâ châ ei ta. Erâ nata Ônâ cha Kâna râh liata thi ha ei ta.

²⁰ A pho pho ta reipa ta, Zudâh pathlazy cha, Selâh tawhta Selâh phozy; Phare tawhta Phare phozy nata Zerâ tawhta Zerâ phozy ama châ.

²¹ Phare pathlazy cha, Hezrô tawhta Hezrô phozy nata Hâmu tawhta Hâmu phozy ama châ.

²² Âmo cha Zudâh pathla phozy châ ei ta, ama maluh rei theipa zydua cha 76,500 ama châ.

²³ A pho pho ta reipa ta, Iskâra pathlazy cha, Tola tawhta Tola phozy, Puvâ tawhta Puvâ phozy;

²⁴ Zasu tawhta Zasu phozy nata Simrô tawhta Simrô phozy ama châ.

²⁵ Âmo cha Iskâra pathla phozy châ ei ta, ama maluh rei theipa zydua cha 64,300 ama châ.

²⁶ A pho pho ta reipa ta, Zebulawna pathlazy cha, Sere tawhta Sere phozy, Elaw tawhta Elaw phozy nata Zali tawhta Zali phozy ama châ.

²⁷ Âmo cha Zebulawna pathla phozy châ ei ta, ama maluh rei theipa zydua cha 60,500 ama châ.

²⁸ A pho pho ta reipa ta, Manase nata Epharai chizy tawhta a puapa Zawsi pathlazy cha, hezy he ama châ.

²⁹ Manase sawchapawpa Mâkhi tawhta Mâkhi pho vaw pua ei ta, Mâkhi ta Kilia sa ta, Kilia tawhta Kilia pho ama vaw pua.

³⁰ Kilia pathlazy châ, Izah tawhta Izah phozy, Hele tawhta Hele phozy;

³¹ Asrie tawhta Asrie phozy, Sekhe tawhta Sekhe phozy;

³² Semidâ tawhta Semidâ phozy nata Hepha tawhta Hepha phozy ama châ.

³³ Hepha sawchapawpa Zelôphehâ cha sawchapaw hnei leipa ta, sawchanôzy deita hnei ta, Zelôphehâ sawchanôzy moh cha Mâhlâ, Noâh, Hôkalâ, Milkâ nata Tizah zy ama châ.

³⁴ Âmo cha Manase pathla phozy châ ei ta, ama maluh rei theipa zydua cha 52,700 ama châ.

³⁵ A pho pho ta reipa ta, Epharai pathlazy cha, Suthelâ tawhta Suthelâ phozy; Bekhe tawhta Bekhe phozy nata Tahâ tawhta Tahâ phozy ama châ.

³⁶ Suthelâ pathla Erâni tawhta Erâni pho a vaw pua.

³⁷ Âmo cha Epharai pathla phozy châ ei ta, ama maluh rei theipa zydua cha 32,500 ama châ. Chazy cha a pho pho ta reipa ta Zawsi pathlazy ama châ.

³⁸ A pho pho ta reipa ta, Benzami pathlazy cha, Belâ tawhta Belâ phozy, Asbe tawhta Asbe phozy, Ahirami tawhta Ahirami phozy;

³⁹ Sephupha tawhta Sephupha phozy nata Hupha tawhta Hupha phozy ama châ.

⁴⁰ Belâ ta Aradâ nata Nâmâ sa ta, Aradâ tawhta Aradâ phozy vaw pua ta, Nâmâ tawhta Nâmâ phozy a vaw pua.

⁴¹ Âmo cha Benzami pathla phozy châ ei ta, ama maluh rei theipa zydua cha 45,600 ama châ.

⁴² A pho pho ta reipa ta, hezy he Dânâ pathlazy ama châ. Suhâ tawhta Suhâ phozy vaw pua ei ta, âmo cha a pho pho ta reipa ta, Dânâ pathlazy ama châ.

⁴³ Suhâ pathla pho maluh rei theipa zydua cha 64,400 ama châ.

⁴⁴ A pho pho ta reipa ta, Asera pathlazy cha, Imnâ tawhta Imnâ phozy, Isvi tawhta Isvi phozy nata Beriah tawhta Beriah phozy ama châ.

⁴⁵ Beriah pathla Hebe tawhta Hebe phozy vaw pua ei ta, Malkie tawhta Malkie phozy ama vaw pua.

⁴⁶ Asera ta sawchanô hnei ta, a moh cha Serâ a châ.

⁴⁷ Âmo cha Asera pathla phozy châ ei ta, ama maluh rei theipa zydua cha 53,400 ama châ.

⁴⁸ A pho pho ta reipa ta, Nâthalai pathlazy cha, Zazi tawhta Zazi phozy, Kuni tawhta Kuni phozy;

⁴⁹ Zeze tawhta Zeze phozy nata Sile tawhta Sile phozy ama châ.

⁵⁰ Âmo cha Nâthalai pathla phozy châ ei ta, ama maluh rei theipa zydua cha 45,400 ama châ.

⁵¹ Chazy cha Izarei saw maluh rei theipazy châ ei ta, ama zydua ta 601,730 ama châ.

Nuby a daopa ta râh amâ rai

⁵² Abeipa ta Mawsi chho ta:

⁵³ “He sahlaozy hnohna heta ama maluh hawhta ryuto râh rai awpa a châ.

⁵⁴ Maluh hluh viapa hnohta ryuto râh lai viapa pie aw chi ta, maluh chyh viapa hnohta ryuto râh chyh via na pie aw. Chi to hnohta ama maluh hluhnazie hawhta ryuto râh pie chyu awpa a châ.

⁵⁵ Nuby a daopa ta râh cha rai awpa châ ta, ama pathlatuhpa chi moh ta râh cha ryuto châta ama to awpa a châ.

⁵⁶ Nuby a daozie hawhta chi lai viapa nata chi chyh viapazy hnohta ryuto râh rai awpa a châ,” tah ta.

Livai chi

⁵⁷ Hezy he a pho pho ta reipa Livai pathlazy ama châ: Kesao tawhta Kesao phozy, Kôhâ tawhta Kôhâ phozy nata Merâri tawhta Merâri phozy ama châ.

⁵⁸ Libni phozy, Hebraw phozy, Mâhli phozy, Musi phozy nata Kôrâ phozy chhao Livai phozy ama châ hra. Kôhâ cha Amrâ paw châ ta,

⁵⁹ Amrâ lapinô moh cha Livai sawchanô Zôkebe châ ta, Izi râh liata Livai ta a sapa a châ. Ano chata Amrâ liata Arawna nata Mawsi nata ama sietanô Miria zy a sa ei.

⁶⁰ Arawna ta Nâdâ, Abihu, Eliaza nata Ithamâ sa ta.

⁶¹ Nâdâ nata Abihu deikua cha Abeipa hmiakô liata pasai leipa mei ama hlâ raruah nota ama thi haw.

⁶² Livai chi maluh rei theipa chapaw thla kha tawhta chô lâ zydua cha 23,000 ama châ. Âmo cha Izarei sawzy hry liata ryuto râh pie leipa ama châpa vâta, Izarei sawzy maluh reina liata rei pâpa châ veih ei.

Kâlebâ nata Zawsua deita pahlôhpa ama châ

⁶³ Chazy cha Mawsi nata theihthaipa Eliaza rei theipa maluhzy châ ei ta, chazy cha Zerikô dady Zawdâh chavah kiah Môabâ bypi liata ama reipazy ama châ.

⁶⁴ Chazy hry liana chata Sinai râhchawhpa liata Mawsi nata theihthaipa Arawna ta maluh ama vaw reipa Izarei sawzy pakha hmahta a hlao khao veih ei.

⁶⁵ Abeipa ta, “Râhchawhpa liata ama thi thlyu awpa a châ,” a tah hapa vâta, Zephune sawchapawpa Kâlebâ nata Nunâ sawchapawpa Zawsua dei leipa ta cha, pakha hmah ahrohpa y veih ei.