MALUHREINA 25 - Mara Bible RV (BSI)

Peô liata Bâlâ achhyna

¹ Siti liata Izarei a y nota, Izarei sawzy ta Môabâ chanôzy sihryhkhei ei ta.

² Chanôzy ta ama khazohzy lâta atheihna hlânazy liata Izarei sawzy cha hrua ei ta. Izarei sawzy ta atheihnazy cha niepa ta, Môabâ khazohzy lâta a bôh ei ta.

³ Cha hawhna chata Izarei ta Peô liata Bâlâ nata azaona tao ta. Chavâta Izarei chô liata Abeipa pathi ia ta.

⁴ Abeipa ta Mawsi hnohta, “Izarei phopi chhituhpa zydua a chhi la, Abeipa pathiiana ru ngaitapa he Izarei chô tawhta a pai nawpa ta, âmo cha Abeipa hmiakô liata nohchhô sawhvaw ta paaosao teh,” tah ta.

⁵ Chatanachata Mawsi ta Izarei ryureituhpazy hnohta, “Peô liata Bâlâ nata azaona a taopa nama chyhsazy kha, nâmo tlai ta thie khai teh u,” tah ta.

⁶ Ahmaohna poh o chhikao liata ama cha hai nota, Izarei chyhsa pakha ta Midia chanô pakha Mawsi mohmô nata Izarei zawpi mohmô liata a o lâ a vaw chhi ta.

⁷ Theihthaipa Arawna sawchapawpa Eliaza sawchapawpa Phinehâ ta a hmô nahta, thyu ta, asei a la ta, zawpi hry tawhta pua ta.

⁸ Izarei chyhsa cha poh o chhôh lâ a ngiahnao ta, Izarei chyhsa nata chanô cha ama pano ta ama py liata a chô ta. Chatanachata potlana cha Izarei sawzy tawhta a pai haw.

⁹ Potlana liata a thipa zydua 24,000 ama châ.

¹⁰ Abeipa ta Mawsi hnohta,

¹¹ “Theihthaipa Arawna sawchapawpa Eliaza sawchapawpa Phinehâ ta Izarei chô liata ei hiehâhna a papai haw. Ama chô liata ei hiatliana liata ano chhao a hia eina tliakhei hrapa vâta, ei hiatliana ta Izarei sawzy cha pahleipadia khao aw va na.

¹² Chavâta a hnohta hetana heta chho teh, ‘A hnohta adyhna biehrai ei tao aw.

¹³ A Khazohpa châta a hiatlia ta, Izarei sawzy châta chatlaina a taopa vâta, cha cha ano nata a hnôhlâ ta a pathlazy châta chhâzaw ta theihthaipa châna biehrai a châ aw,’” tah ta.

¹⁴ Izarei chyhsa ama thiepa, Midia chanô nata hmaohkha ama thiepa moh cha Salu sawchapawpa Zimri châ ta, Simeôna chi liata pho kha hyutuhpa a châ.

¹⁵ Midia chanô ama thiepa moh cha Zuri sawchanô Kôzabi châ ta, Midia chi liata pho kha hyutuhpa sawchanô a châ.

¹⁶ Abeipa ta Mawsi hnohta,

¹⁷ “Midia mo kha ama nô papo u la, thie teh u.

¹⁸ Peô kyh liata cha dôveipa ta nama nô cha papo ei ta. Peô vâta potlana a y nota ama sietanô Kôzabi, Midia hyutuhpa sawchanô cha thiepa châ ta, cha kyh liata chhao piehpie ngaitapa ta châ dôveituhpa ama châ,” tah ta.