MALUHREINA 24 - Mara Bible RV (BSI)

Bâlâma chhochhieliena eipalihna

¹ Izarei châta byhnâ awpa cha Abeipa a palysa tahpa Bâlâma ta a pahno nahta, a noh hro ta a tao tyhpa hawhta pachao awpa ta sie khao leipa ta, râhchawhpa lâ tlao a pangai haw.

² Bâlâma cha mohmia pasaih ta, Izarei sawzy a chi chi ta riehmo ama paryhpa hmô ta. Khazohpa Thlahpa a chô liata vaw tlô ta,

³ chatanachata a bie daopa cha thaoh ta, “He he Beôrâ sawchapawpa Bâlâma bie daopa châ ta, Mo pavâsapa chyhsa bie daopa a châ.

⁴ Khazohpa biezy thei ta, Atotaotheipa aluahna hmô ta, Pao ta, mâ lâ hawhta y ta, Châhrasala a mo a padeih thlâhpa bie daopa a châ:

⁵ Hy Zakaw, na poh ozy â ngia kaw dia, Hy Izarei, na byureihzy â ngia kaw dia!

⁶ Saikao dia zualuapazy lyu ta, Chavah kiah liata sadôzy a lyu; Abeipa lopa tlôma-uzy lyu ta, Tizy kiah liata sidy thozy a lyu.

⁷ A chiahzy tawhta ti loh aw ta, Ti hluhpizy liata a chi a y aw; A bei cha Akâ hlâta rônah via aw ta, Â beinarâh cheihchalopa a châ aw.

⁸ Izarei cha Khazohpa ta Izi tawhta a kaw chhi papua ta, Ano châta chaoliah tôhpa ki hawhta a châ; A chariahpa râhzy palâ khai aw ta, Ama ruzy a tlawh ta pakeichheihpa ta, A châtaizy ta âmo a chhô pahlie aw.

⁹ Chakeibarôhneipa tôhpa hawhta a byu ta, Chakeibarôhneipa panô hawhta â zia; Ahy a pathyu ngâh aw? Byhnâ châ awpatuhpa cha byhnâ to sala, Chhie châ sapatuhpa cha chhiesapa châ mawh sy,” tah ta.

¹⁰ Chatawhcha Bâlâka cha Bâlâma chô liata a pathi ia ta, a ku nata a ku thata a chô ta, Bâlâka ta Bâlâma hnohta, “Ei chariahpazy chhiesapa awpa ta cha aw na ta, pachâ teh, ei thôh dua byhnâ na awpa ei.

¹¹ Chavâta tahmâ na o lâ a râ teh. Rônah ngaitapa ta cha tao awpa a chhuah na ta, châhrasala Abeipa ta na rônah awpa a cha pakhâ haw,” tah ta.

¹² Bâlâma ta Bâlâka cha a chhy ta, “Kei lâta na vaw tuapa na chyhsazy hnohta,

¹³ ‘Bâlâka ta tâkâ nata ngôh ta a biepa a o taihta eina piepa chhao ta, Abeipa bie khô lâ cha a phapa tlyma, a chhiepa tlyma, keima kho ta khâpa hmah tao thei va na. Abeipa ta a reipa deita ei reih aw,’ tah ha va na ma?

¹⁴ Tahmâ cha ei phopi lâ ei sie aw. A vy teh, noh a vaw tlô awpazy liata, he phopi ta na phopi chô liata ama tao awpa ei cha pahnosa aw,” tah ta.

Bâlâma chhochhieliena chhâna

¹⁵ Chatanachata Bâlâma ta a bie daopa cha thaoh ta, “He he Beôrâ sawchapawpa Bâlâma bie daopa châ ta, Mo pavâsapa chyhsa bie daopa a châ.

¹⁶ Khazohpa biezy thei ta, Chônôchaipa pahnona pahno ta, Atotaotheipa aluahna hmô ta, Pao ta, mâ lâ hawhta y ta, Châhrasala a mo a padeih thlâhpa bie daopa a châ:

¹⁷ Ano cha hmô na ta, Châhrasala tahmâ châ vei; Moh na ta, Châhrasala a hnia vei; Zakaw tawhta awhsi vaw pua aw ta, Izarei tawhta bei a vaw pua aw. Môabâ râh zydua pahnie aw ta, Sethâ saw zydua a pahleipadia khai aw.

¹⁸ Edômâ cha pahniepa châ aw ta, A chariahpazy ta Seirâ ama tiah aw; Izarei deikua a chhyu rili aw.

¹⁹ Zakaw tawhta bei vaw pua aw ta, Khihpizy liata laibâhpazy a pahleipadia aw,” tah ta.

²⁰ Chatawhcha Amale lâ a heih ta, a bie daopa thaoh ta, “Amale cha phopi hmiatuapa châ ta, A chhâna deikua tlokhuh leidiana a châ,” tah ta.

²¹ Keni mo lâ a heih ta, a bie daopa thaoh ta, “Na pahrâna su a i ta, Lôpanô liata bu na tu.

²² Châhrasala Asuria ta sei ta a châ chhi tita, Keni cha mei ta rao khaipa a châ aw,” tah ta.

²³ A bie daopa thaoh heih ta, “Cha hmo cha Khazohpa ta a tao tita, Ahy a hroh thei aw tly?

²⁴ Kiti tawhta balyhzy vaw tlô aw ta, Asuria a panawh aw; Ebe chhao panawh aw ta, Chhâzaw ta a leidia aw,” tah ta.

²⁵ Cha khai tawhta Bâlâma cha thyu ta, a yna lâ sie ta, Bâlâka chhao cha a o lâ a di ha hra ta.