MALUHREINA 22 - Mara Bible RV (BSI)

Bâlâka ta Bâlâma a paawsa

¹ Izarei sawzy cha sie lymâ ei ta, Zawdâh khô lâ Zerikô dady liata Môabâ bypizy liata riehmo paryh ei ta.

² Zipô sawchapawpa Bâlâka ta Amawri mo chô liata Izarei hmotaopa zydua pahno ta.

³ Môabâ ta Izarei sawzy cha, ama hluh ngaitapa vâta chi ngaita ta. Izarei sawzy vâta Môabâ cha nôpopa ta y ta.

⁴ Môabâ mo ta Midia machâzy hnohta, “He phopi heta, viahchao tôhpa ta sibiepa a bâpa hawhta, eima chheipâh liata chyhsa zydua ama bâ khai aw,” tah ei ta. Zipô sawchapawpa Bâlâka cha, cha daihti liata Môabâ bei châ ta.

⁵ Bâlâka ta a pina râh Chavah kiah Pethô khih liata a ypa Beô sawchapawpa Bâlâma lâ chyhsa tuah ta, a hnohta, “Izi râh tawhta phopi miakha kaw pua ei ta, leilô zydua bie khai ei ta, tahmâ keima dady liata ama pahrâ.

⁶ Ngiachhiepa ta a vy la, he chyhsazy he chhie na vaw sapa mah y. Kei châta ama tha a tlô tu haw. Chatanachata âmo cha pahnie thei aw ei na ta, he râh tawhta ei papua thei ngyu aw ei. Byhnâ na awpa maih byhnâ to ei ta, chhie na sapa maih chhiesapa ta ama y tyh tahpa ei pahno,” tah ta.

⁷ Môabâ machâzy nata Midia machâzy cha pachaona ty a cheipa ta pua ei ta. Bâlâma kô ama tlô nahta, Bâlâka bietapa cha chho ei ta.

⁸ Bâlâma ta ama hnohta, “Tazâ he liata a rie u la, Abeipa ta eina chhopa hawhta nama hnohta bie ei vaw tlôkhei aw,” tah ta. Chatanachata Môabâ beimachâzy cha Bâlâma hnohta a rie ei ta.

⁹ Khazohpa cha Bâlâma lâ a vy ta, “Na hnohta a ypa chyhsazy kha ahyzy ma ama châ?” tah ta.

¹⁰ Bâlâma ta Khazohpa hnohta, “Zipô sawchapawpa Môabâ bei Bâlâka ta ei hnohta,

¹¹ ‘Izi râh tawhta phopi miakha kaw pua ei ta, leilô zydua ama bie khai haw. Chavâta tahmâ a vy la, âmo cha chhie na sapa mah y. Chatanachata âmo cha a dyuh thei aw na ta, ei papua thei ngyu aw ei,’ tahpa ta chyhsa a vaw tuah,” tah ta.

¹² Khazohpa ta Bâlâma hnohta, “Ama hnohta na sie awpa châ leipa ta, cha phopi cha chhie na sapa awpa châ hra vei. Âmo cha byhnâ a topa ama châ,” tah ta.

¹³ Bâlâma cha my ta thyu ta, Bâlâka beimachâzy hnohta, “Nama râh lâ a lie teh u. Nama hnohta ei sie awpa Abeipa ta pasaih vei,” tah ta.

¹⁴ Môabâ beimachâzy cha thyu ei ta, Bâlâka lâ a lie ei ta, a hnohta, “Bâlâma cha eima hnohta a vy khoh vei,” tah ei ta.

¹⁵ Bâlâka ta beimachâ hluh via, âmo hlâta zachhih viapazy tuah heih ta.

¹⁶ Bâlâma kô kei tlô ei ta, a hnohta, “Zipô sawchapawpa Bâlâka ta hetana heta a tah: ‘Kei lâ a vy awpa ta khâpa ta hmah cha pakhâ khah sy.

¹⁷ Chyhsa rônah ngaitapa ta cha tao aw na ta, ei hnohta na reipa maih ei tao aw. Chavâta a vy tlai la, he phopi he chhie na sapa mah y,’ a tah,” tah ei ta.

¹⁸ Châhrasala Bâlâma ta Bâlâka chakaotuhpazy cha a chhy ta, ama hnohta, “Bâlâka ta tâkâ nata ngôh ta a biepa a o taihta eina piepa chhao ta, Abeipa ei Khazohpa bie khô lâ cha, hmo chyhpa tlyma, hmo laipa tlyma, khâpa hmah tao thei va na.

¹⁹ Chavâta Abeipa ta ei hnohta bie a rei via awpa a y ma tahpa ei pahno thei nawpa ta, tazâ chhao, he liata a rie heih chy muh vy,” tah ta.

²⁰ Cha zâ liata, Khazohpa cha Bâlâma lâ a vy heih ta, a hnohta, “Chyhsazy cha nâma dy awpa ta a vypa ama châ khiahta cha, thyu la, ama hnohta sie mah y. Anodeikua ei cha chhopa deita na tao awpa a châ,” tah ta.

Vâlyuhchâpa nata Bâlâma alâ

²¹ Bâlâma cha mydi ta thyu ta, alâ ky padia ta, Môabâ beimachâzy hnohta sie ta.

²² Châhrasala a siepa vâta Khazohpa cha a pathi ia ta. Chavâta Bâlâma a dyuh awpa ta, Abeipa vâlyuhchâpa ta lâpi liata a vaw duakhâh ta. Bâlâma cha a alâ kiahpa ta sie ta, a chakaotuhpa pano a hnohta sie ei ta.

²³ Alâ ta Abeipa vâlyuhchâpa cha zaozi chabapa ta lâpi liata â duapa hmô ta. Chavâta alâ cha lâpi tleipa ta lyurâhpa lâ sie ta. Bâlâma ta alâ cha lâpi lâ pakuasa a chhuahpa ta chhei ta.

²⁴ Abeipa vâlyuhchâpa cha kre sadô diahpai nata diahpai likawh lâpi buahpa liata a vaw duah ta.

²⁵ Alâ ta Abeipa vâlyuhchâpa a hmô nahta, diahpai cha kei chatôh ta, Bâlâma phei cha diahpai liata charieh ta. Chavâta Bâlâma ta alâ cha chhei heih ta.

²⁶ Abeipa vâlyuhchâpa cha a khô via lâ vawh ta, su buahpa, chachâh lâ tlyma, chavei lâ tlyma, tleina y leina liata a vaw duah heih ta.

²⁷ Alâ ta Abeipa vâlyuhchâpa a hmô nahta, Bâlâma cha a byukhei ha ta. Bâlâma cha a pathi ia ta, a chôchahrei ta alâ cha chhei ta.

²⁸ Abeipa ta alâ pakah pahy ta, Bâlâma hnohta, “Na chô liata khâpa hmo tao na ta ma, ei thôh dua eina chhei chi?” tah ta.

²⁹ Bâlâma ta alâ hnohta, “Eina pasipasawhpa vâ chi ta a châ. Zaozi a chaba chhochhi aw sah la, ei cha thie ha aw,” tah ta.

³⁰ Alâ ta Bâlâma hnohta, “Kei he na hro chhôh zydua ta na kiah chi ta, tahmâ taihta na kiapa na alâ châ va na mâ? Kha hawhta ei cha tao beih ma?” tah ta. Ano ta, “Tao beih va chi,” tah ta.

³¹ Abeipa ta Bâlâma cha a mo pavâsa ta, zaozi chabapa ta lâpi liata a duahpa Abeipa vâlyuhchâpa cha hmô ta. A bôh ta, a hmia alei lâ a khupa ta pao ta.

³² Abeipa vâlyuhchâpa ta Bâlâma hnohta, “Khazia na alâ kha ei thôh dua na chhei? Pachâ teh, na siena chhâpa kha ei hmiakô liata raona a châpa vâta, cha pakhâ awpa ta ei vaw pua.

³³ Alâ ta cha na hmô ta, ei hmiakô liata ei thôh dua a tlei. Kei tawhta tlei vei mawh sala, ano pahlôh aw na ta, nâ ei cha thie ha bâ aw,” tah ta.

³⁴ Bâlâma ta vâlyuhchâpa hnohta, “Ei vaw molei ha na. Na pakhâ awpa ta lâpi liata nâ vaw duah tahpa ei pahno leipa vâta a châ. Chavâta ei sie awpa he na hmiakô liata hmo pha leipa a châ khiahta cha, tahmâ he ei kua aw,” tah ta.

³⁵ Abeipa vâlyuhchâpa ta Bâlâma hnohta, “Chyhsazy hnohta sie mah y. Anodeikua ei cha chhopa bie deita na reih awpa a châ,” tah ta. Chatanachata Bâlâma cha Bâlâka beimachâzy hnohta sie ta.

Bâlâma nata Bâlâka

³⁶ Bâlâka ta Bâlâma â vy tahpa a thei nahta, Anaw lâta ama râhri chhâna Môabâ khihpi taih kei dy ta.

³⁷ Bâlâka ta Bâlâma hnohta, “Hmo chatliepa a châpa vâta ei cha vaw padysapa a châ. Khazia nâ vy khoh vei? Lymâ châ pie thei lei awpa hawhta ma eina pachâ chi?” tah ta.

³⁸ Bâlâma ta Bâlâka hnohta, “Moh teh, nâ lâ ei vy ha hih! Châhrasala keima kho ta bie to rei theina biehneina hnei va na. Khazohpa ta ei pakah liata a sopa bie deita ei rei awpa a châ,” tah ta.

³⁹ Chatanachata Bâlâma cha Bâlâka hnohta sie ta, Kiria-huzô khihpi tlô ei ta.

⁴⁰ Bâlâka ta viahchao tôhpa nata mietaku ta atheihna hlâ ta. Atheihna sa cha Bâlâma nata a hnohta a ypa beimachâzy paphao ta.

⁴¹ A mylâ my ta Bâlâka ta Bâlâma cha a chhi ta, Bâlâ su sâhpazy lâ khykhei ta. Cha su tawhta Izarei zawpi yna su thokha cha hmô theipa châ ta.