MALUHREINA 21 - Mara Bible RV (BSI)

Aradâ khihpi paraona

¹ Neke liata a pahrâpa Kâna chyhsa Aradâ bei ta Izarei cha Athari lâpi lâ tawhta a vaw sie tahpa thei ta. Aradâ bei ta Izarei cha a dyuh ta, Izarei saw thokha sei ta patu ta.

² Chatawhcha Izarei ta Abeipa lâta bietai tao ta, “He phopi he ei ku liata eina pie khiah chi ta cha, ama khihpizy tlokhuh ei pahleipadia khai aw,” tah ta.

³ Abeipa ta Izarei ao cha thei ta, Kâna mo cha a ku liata pie ta. Chatanachata a chyhsazy nata ama khihpizy cha tlokhuh ama pahleipadia khai haw. Chavâta cha su moh cha Hômâ bipa a châ.

Dawh parih

⁴ Izarei sawzy cha Hôri Tlâh tawhta pua ei ta, Edômâ râh chahrihpa ta Tilaipi Saihpa pangaina lâpi lâta chahlô ei ta. Zawpizy cha lâpi liata ama palôh chhâ kaw ta.

⁵ Zawpizy ta Khazohpa nata Mawsi chakhiapa ta bie reih ei ta, “Khazia râhchawhpa liata thi awpa ta Izi râh tawhta miah namâ kaw chhi papua? Viahchhâ y va, ti chhao y va, he pati pasichhihpa he miah a ai tu ha bâ,” tah ei ta.

⁶ Chatawhcha Abeipa ta zawpizy hry liata parih châmaih thatlôpazy tuah ta, chyhsazy pachu ei ta, Izarei chyhsa hluhpi thi ei ta.

⁷ Zawpizy cha Mawsi lâ vawh ei ta, a hnohta, “Abeipa nata nâma chakhiapa ta bie reih pi ta, eima vaw molei ha na. Abeipa lâ thlah miah chhâpa la, parihzy he keimo tawhta la awpa ta miah hiapa teh,” tah ei ta. Chatanachata Mawsi ta zawpizy châta thlahchhâ ta.

⁸ Abeipa ta Mawsi hnohta, “Parih châmaih thatlôpa nothlahpa tao la, atôh liata chaluah mah y. Parih pachupa maihta cha cha ama mo khiahta cha, ama hroh aw,” tah ta.

⁹ Cha hawhna chata Mawsi ta dawh parih tao ta, atôh liata chaluah ta. Parih pachupa maihta dawh parih cha ama moh nahta, hroh lymâ ei ta.

Môabâ chahlôpa ta Izarei sawzy ama sie

¹⁰ Izarei sawzy cha sie lymâ ei ta, Ôbô liata riehmo paryh ei ta.

¹¹ Ôbô tawhta sie heih ei ta, Môabâ dady râhchawhpa liata nochhi lâ chhâh ta a ypa Iziabari liata riehmo paryh ei ta.

¹² Cha tawhna chata sie heih ei ta, Zere saikao liata yna su paryh ei ta.

¹³ Cha tawhna chata sie heih ei ta, Anaw chavah haosâ lâta riehmo paryh ei ta. Anaw chavah cha Amawri mo râh saoh patluapa râhchawhpa liata a ypa a châ. Anaw chavah cha Môabâ râhri, Môabâ nata Amawri mo likawh râhri chavah a châ.

¹⁴ Chavâta Abeipa Adyuhnazy châbu liata, “Supha liata Vâhe nata Anaw saikaozy cha,

¹⁵ A saikao pâdawhzy ta Ari su tlô ta, Môabâ râhri taih a kawh,” tahpa ta reipa a châ.

¹⁶ Cha su tawhta Be khihpi lâ sie ei ta. Be cha tikhaoh tahna châ ta, Abeipa ta Mawsi hnohta, “Zawpizy awpakhy la, ti ei pie aw ei,” a tahna su kha a châ.

¹⁷ Chavâta Izarei ta hetana heta hla a sa: “Hy tikhaoh, ti kaw pali mah y! Tikhaoh lâ hla sa teh u!

¹⁸ Ryureina chôchahrei nata sômasi hmâpa ta, Beizy chaopa tikhaoh lâ hla sa u la, Râh chhituhpazy reipa tikhaoh lâ hla sa teh u!” Izarei sawzy cha râhchawhpa tawhta Matânâ lâ sie ei ta.

¹⁹ Matânâ tawhta Nâhalie lâta, Nâhalie tawhta Bamô lâta,

²⁰ Bamô tawhta Môabâ lyu liata saikao nata râhchawhpa lâ a heihpa Piskâ tlâh laki lâ ama sie.

Izarei ta Sihaw a pahnie

²¹ Izarei ta Amawri bei Sihaw lâ chyhsa tuah ta,

²² “Na râh siepahlie eina pasai awpa chi ta ei châ haw. Lyu lâ tlyma kre sadô lâ tlyma tlei leipa aw pi ta, tikhaoh ti chhao doh hra aw ma pi. Na râh eima khô hlâlei Abei Lâlai liata eima sie aw,” tahpa ta kei pachhosa ta.

²³ Châhrasala Sihaw ta a râh siepahlie awpa ta Izarei cha pasai leipa ta. A pheisaih zydua awpakhy ta, Izarei a dyuh awpa ta râhchawhpa lâ tlao pua ha ta. Zahâza kei tlô ta, cha liata Izarei cha a dyuh ta.

²⁴ Izarei ta zaozi ta Sihaw cha thie ta, Sihaw râh cha Anaw tawhta Zabaw taih la ta, Amawna mo râhri tlôna taih la ta, Amawna mo râhri cha â ipa ta dôhpa châpa vâta.

²⁵ Izarei ta khihpi zydua la khai ta. Chatanachata Izarei cha Amawri mo khihpi zydua nata Hesbaw nata a khitaw zydua liata pahrâ ta.

²⁶ Hesbaw cha Amawri bei Sihaw khihpi châ ta, Sihaw cha Môabâ bei parohpa a dyuh ta, Anaw chavah taihta a râh zydua a latuhpa kha a châ.

²⁷ Chavâta hla phituhpazy ta, “Hesbaw lâ a vy teh u, A khihpi paduapathipa châ sala, Sihaw khihpi cha paduapa châ mawh sy.

²⁸ Hesbaw tawhta mei pua ta, Sihaw khihpi tawhta meipaleih a pua; Môabâ râh Ari khih kâ khai ta, Anaw su sâhpazy a palâ khai haw.

²⁹ Hy Môabâ, na hu a po kaw dia! Hy Khemô phopi, paraopa na châ haw! A sawchapawzy viavipa ta tao ta, A sawchanôzy Amawri bei Sihaw hnohta sei ta a pie ei.

³⁰ Chavâta âmo cha tlokhuh parao pi ta, Hesbaw nata Dibô zy leidia ei ta; Nôpha tawhta Medebâ taihta roryhrapa ta eima tao haw,” tahpa ta hla ama phi.

³¹ Chatanachata Izarei cha Amawri mo râh liata pahrâ ta.

³² Mawsi ta Zaze mohparu awpa ta chyhsa tuah ta, a khihzy la ei ta, cha liata a ypa Amawri mo cha ama pho haw.

Izarei ta Bâsanâ bei Ôkâ a pahnie

³³ Chatawhcha a lie ei ta, Bâsanâ lâpi lâta khy ei ta. Bâsanâ bei Ôkâ cha Izarei sawzy Edarei liata a dyuh awpa ta ano nata a chyhsa zydua chhaota pua ta.

³⁴ Abeipa ta Mawsi hnohta, “Ano kha chi khah y, ano nata a chyhsa zydua nata a râh na ku liata ei cha pie haw. Hesbaw liata a ypa Amawri bei Sihaw chô liata na taopa hawhna khata ano chô liata chhao na tao aw,” tah ta.

³⁵ Chatanachata Bâsanâ bei Ôkâ nata a sawchapawzy nata a chyhsa zydua cha, pakha hmah pahlôh leipa ta ama thie khai haw. A râh chhao ama hnei haw.