MALUHREINA 20 - Mara Bible RV (BSI)

Meribâ Lôpanô ti

¹ Izarei sawzy cha, thla khana liata ama zydua ta Zini râhchawhpa tlô ei ta. Zawpizy cha Kâdesâ liata y ei ta. Cha liata Miria thi ta, cha liata ama pabu.

² Zawpi châta ti y leipa ta. Chavâta Mawsi nata Arawna chakhia awpa ta zawpi a hmaohpakhy ei ta.

³ Zawpi ta Mawsi cha a hryuh ei ta, a hnohta, “Abeipa hmiakô liata eima unawhzy ama thi nona khata, keimo chhao vaw thi ha hra sih la a pha via awpa tlai!

⁴ Khazia Abeipa chyhsa zawpizy he, keimo nata eima sahrohzy chhaota thi khai awpa ta, he râhchawhpa lâ he miah nâ vaw chhi?

⁵ Khâpa vâta ma Izi râh tawhta miah kaw puakhei chi ta, he râh pha leipa lâ he miah nâ kaw chhi? Sâhzy, theikuzy, kre zôhzy, pawmikarânâzy y leina su châ ta, ti do awpa chhao y vei,” tah ei ta.

⁶ Mawsi nata Arawna cha zawpi mohmô tawhta pua ei ta, ahmaohna poh o chhikao lâ vawh ei ta, cha liata â khu lâta pao ei ta. Abeipa rônahna ama hnohta a vaw luah ta.

⁷ Abeipa ta Mawsi hnohta,

⁸ “Chôchahrei la la, nâ nata na unawhpa Arawna ta zawpizy pahmaoh u la, ti papua awpa ta, ama mohmô liata lôpanô chho mah y. Lôpanô tawhta ti a puapa cha âmo lâ cheih aw chi ta, zawpi nata ama sahrohzy cha ti do awpa na pie aw ei,” tah ta.

⁹ Abeipa ta bie a piepa hawhta, Mawsi ta chôchahrei cha Abeipa hmiakô tawhta la ta.

Mawsi ta lôpanô a tu

¹⁰ Mawsi nata Arawna ta zawpizy cha lôpanô hmiakô liata pahmaoh ei ta. Mawsi ta ama hnohta, “Nâmo, chhorupa saih u, tahmâ nathlie teh u, he lôpanô tawhna heta ma ti eima cha thaipa aw?” tah ta.

¹¹ Mawsi cha a ku hy ta, a chôchahrei ta lôpanô cha ei no tu ta. Ti thata vaw pua ta, zawpi nata ama sahrohzy ta ti cha doh ei ta.

¹² Châhrasala Abeipa ta Mawsi nata Arawna hnohta, “Na ngâ leipa ei chi ta, ei pathaihna hawhta Izarei sawzy mohmô liata eina palyupalih leipa vâ ei chi ta, he zawpizy he âmo ei piepa râh tlôkhei aw veih ei chi,” tah ta.

¹³ Cha cha Meribâ tizy châ ta, cha liata Izarei sawzy ta Abeipa a hryuh ei ta, Abeipa ta ti hmâpa ta ama hry liata â palyupalihna su a châ.

Edômâ bei ta a râh siepahlie pasaih vei

¹⁴ Mawsi ta Kâdesâ tawhta Edômâ bei lâ lyuhchâpa tuah ta, “Na unawhpa Izarei ta hetana heta a tah: Eima chô liata rairuna a tlôpa zydua na pahno khai.

¹⁵ Miah pathlatuhpazy Izi râh lâ zu ei ta, Izi râh liata bohpi pahrâ pi ta, Izi mo ta keimo nata miah pathlatuhpazy miah ama taochhiezie kha na pahno.

¹⁶ Abeipa pado pi ta, ano ta eima ao thei ta, vâlyuhchâpa vaw tuah ta, Izi râh tawhta miah â chhi papua haw. Tahmâ he na râh kiah liata Kâdesâ khihpi liata eima y.

¹⁷ Ngiachhiepa ta na râh siepahlie awpa miah pasai mah y. Lyu tlyma, kre sadô tlyma, siepahlie leipa aw pi ta, tikhaoh tizy doh hra aw ma pi. Abei Lâlai liata sie aw pi ta, na râh eima khô hlâlei cha, chachâh lâ tlyma, chavei lâ tlyma tlei aw ma pi,” tah ta.

¹⁸ Châhrasala Edômâ ta a hnohta, “Ei râh na siepahlie awpa châ vei. Na siepahlie khiahta cha, zaozi chhaota vaw thyu aw na ta, ei châ dyuh aw,” tah ta.

¹⁹ Izarei sawzy ta Edômâ hnohta, “Lâlai a chhih aw pi ta, keimo nata eima sahrohzy ta na ti eima doh khiahta cha, a mâ eima cha pie aw. Hmo hropa khâpa hmah tao aw ma pi. Phei ta siepahlie awpa rie miah pasaih mah y,” tah ei ta.

²⁰ Ano ta, “Siepahlie aw veih ei chi,” tah ta. Chatanachata Edômâ cha Izarei sawzy a dyuh awpa ta pheisaih thatlôpa hluhpi chhaota vaw pua ta.

²¹ Edômâ ta Izarei cha a râh siepahlie awpa a pasai leipa vâta, Izarei cha Edômâ tawhta a lie ha ta.

Arawna thina

²² Izarei sawzy cha, ama zydua ta Kâdesâ tawhta pua ei ta, Hôri Tlâh kei tlô ei ta.

²³ Abeipa ta Mawsi nata Arawna cha Edômâ râhri khô liata a ypa Hôri Tlâh liata bie a chho ta, ama hnohta,

²⁴ “Arawna cha a chiheihzy hnohta pahlyhpa a châ aw. Meribâ tizy liata ei biepiepa namâ dyuhpa vâna khata, Izarei sawzy ei piepa râh liata a ngia aw vei.

²⁵ Arawna nata a sawchapawpa Eliaza kha a chhi la, Hôri Tlâh lâ khykhei teh.

²⁶ Arawna chysiazy kha pahluh la, a sawchapawpa Eliaza paky mah y. Arawna cha a chiheihzy hnohta pahlyhpa châ aw ta, cha liata a thi aw,” tah ta.

²⁷ Abeipa biepiepa hawhta Mawsi ta tao ta. Zawpi zydua mohmô ta Hôri Tlâh lâ cha khy ei ta.

²⁸ Mawsi ta Arawna chysiazy cha pahluh ta, a sawchapawpa Eliaza paky ta. Chatanachata Arawna cha tlâh laki liata thi ha ta. Mawsi nata Eliaza cha tlâh tawhta za chô ei ta.

²⁹ Arawna a thi haw tahpa zawpi ta ama pahno nahta, Izarei pathla zydua ta noh sythôh mâchhiesa ei ta.