MALUHREINA 2 - Mara Bible RV (BSI)

Riehmo paryhnazie

¹ Abeipa ta Mawsi nata Arawna hnohta hetana heta chho ta:

² “Izarei sawzy ta ama chhôhkha ngiana poh chaluah chyupa ta, ahmaohna poh o nata a hnia tu leipa ta ahmaohna poh o chadôpa ta, a py py ta ama poh o ama rai aw.

³ “Noh vaw chhina nochhi lâta poh o a rai awpazy cha Zudâh py châ aw ei ta, a py py ta poh o rai aw ei ta, Zudâh pathlazy hyutuhpa cha Aminadâ sawchapawpa Nâsaw châ aw ta,

⁴ pheisaih 74,600 a hnei aw.

⁵ A pazipa ta poh o a rai awpazy cha Iskâra chi châ aw ei ta, Iskâra pathlazy hyutuhpa cha Zuâ sawchapawpa Nethane châ aw ta,

⁶ pheisaih 54,400 a hnei aw.

⁷ Zebulawna pathlazy hyutuhpa cha Helawnâ sawchapawpa Eliabâ châ aw ta,

⁸ pheisaih 57,400 a hnei aw.

⁹ Zudâh py liata sopa pheisaih py nanopazy cha, ama zydua ta 186,400 ama châ. Âmo ta hmia amâ sah lymâ aw.

¹⁰ “Chho lâta Rubena py y aw ei ta, Rubena pathlazy hyutuhpa cha Seidia sawchapawpa Elizu châ aw ta,

¹¹ pheisaih 46,500 a hnei aw.

¹² A pazipa ta poh o a rai awpa cha Simeôna chi ama châ aw. Simeôna pathlazy hyutuhpa cha Zurisadai sawchapawpa Selumie châ aw ta,

¹³ pheisaih 59,300 a hnei aw.

¹⁴ Cha khai tawhta Kâdâ chi ta pazi aw ei ta, Kâdâ pathlazy hyutuhpa cha Rue sawchapawpa Eliasaphâ châ aw ta,

¹⁵ pheisaih 45,600 a hnei aw.

¹⁶ Rubena py liata sopa pheisaih py nanopazy cha, ama zydua ta 151,450 ama châ. Âmo cha a py nona ta ama sie aw.

¹⁷ “Ahmaohna poh o nata Livai pathlazy poh ozy a liah liata y aw ta, ama sie tita, ahmaohna poh o nata Livai pathlazy cha a liah liata ama sie aw. Chyhsa to ama su chyu liata ypa ta ama sie aw.

¹⁸ “Notla lâta Epharai py y aw ei ta, Epharai pathlazy hyutuhpa cha Amihu sawchapawpa Elisâmâ châ aw ta,

¹⁹ pheisaih 40,500 a hnei aw.

²⁰ A pazipa ta Manase chi y aw ei ta, Manase pathlazy hyutuhpa cha Pedazu sawchapawpa Kâmalia châ aw ta,

²¹ pheisaih 32,200 a hnei aw.

²² Cha khai tawhta Benzami chi ta pazi aw ei ta, Benzami pathlazy hyutuhpa cha Kidiôni sawchapawpa Abidanâ châ aw ta,

²³ pheisaih 35,400 a hnei aw.

²⁴ Epharai py liata sopa pheisaih py nanopazy cha, ama zydua ta 108,100 ama châ. Âmo cha py thôhna ta a sie awpa ama châ.

²⁵ “Maw lâta Dânâ py y aw ei ta, Dânâ pathlazy hyutuhpa cha Amisadai sawchapawpa Ahieze châ aw ta,

²⁶ pheisaih 62,700 a hnei aw.

²⁷ A pazipa ta poh o a rai awpa cha, Asera chi châ aw ei ta, Asera pathlazy hyutuhpa cha Okarâ sawchapawpa Pâkie châ aw ta,

²⁸ pheisaih 41,500 a hnei aw.

²⁹ Cha khai tawhta Nâthalai chi ta pazi aw ei ta, Nâthalai pathlazy hyutuhpa cha Enâ sawchapawpa Ahirâ châ aw ta,

³⁰ pheisaih 53,400 a hnei aw.

³¹ Dânâ py liata sopa pheisaih py nanopazy cha, ama zydua ta 157,600 ama châ. Âmo cha a py py ta a hnôh chai ta a sie awpazy ama châ,” tah ta.

³² Chazy cha Izarei sawzy maluh ama chhôhkha chyu ta reipazy cha châ ei ta, a py py ta reipa ta ama zydua ta 603,550 ama châ.

³³ Abeipa ta Mawsi hnohta bie a piepa hawhta, Livai chi deikua cha Izarei sawzy hry liata rei pâpa châ veih ei.

³⁴ Cha hawhna chata Abeipa ta Mawsi bie a piepa zydua cha Izarei sawzy ta tao ei ta, a py py ta riehmo paryh ei ta, a pho pho ta nata a chhôh chhôh ta puapa ta ama sie lymâ.